«اگه کسی منتظرم بود…» / زامان پاشازاده

۱
صوبحدن بو دؤردونجو دؤوردور بو ایستانسیادان قاییدیرام. تجریش، تهران متروسونون گونئی طرفدن سونونجو دوراغی‌دیر. قاطار بوشالیر و گئری دؤنمک اوچون بیر داها بیر خیل آدام چنته‌سینه دولوشور. الئکتریک ‌سوپورگه زیبیللری سوموران کیمی، قاطار دا آداملاری کیسه‌سینه سومورور. دؤرد گوندور ایش یئریمدن قووولموشام؛ اؤز باشیما فیرلانیرام. دونن پارکلاردا وئیسَلله‌نیردیم، بو گون ایسه قاطارلا سوله‌نیرم. خیوودان آیریلیب اوتوبوسا مینیب تهرانا گلدیییم گوندن، بیر نئچه دوست و شهرداشین ایشله‌دییی بیر شیرکت‌ده ایشه باشلاسام دا هله‌ ده داریخما الینی بوغازیمدان گؤتورمور.
آتامین عینادی بیر یانا، سئودییم قیزین بوتون خاطیره‌لریمیزه آرخا چئویریب «سن مندن یاخشی‌سینا لاییق‌سن» دئییب منی آخماق یئرینه قویماسی، بنزین آنبارینا آتیلان کیبریت چؤپو ایدی؛ یانی جهننم اول گؤزومون قاباغیندان، منیم اوچون لاپ آبیر‌لیسی، یانی ترک ائت بو شهری.‌
صوبح واختلی‌دان آتا-آنام، قارداشیم و حیه‌طیمیزده‌کی نرگیز چیچکلری بئله اویانمادان الیمده بیر بالاجا چانتا تهران اوتوبوسونا مینیب ساری گلین ماهنی‌سینی دوداغیمین آلتیندا میزیلدادیغیم، خییووون بئینیمده قویدوغوم سون نؤقطه‌سی‌ایدی:

بو سئودا نه سئودادیر
سنی منه وئرمزلر
نئلیم آمان آمان…
ائله سون نؤقطه‌نی بوردا قویموشدوم هم خییووا هم عاییله‌یه هم سارای گلینه… قوی جهننم اولسون.
«ایستگاهِ جوانمرد قصاب»- قاطارین بَلَدچی سیستئمی‌تکرارلاییر. جوانمرد قصاب! بو آد باره‌سینده ائشیتدیییم مختلف روایتلردن بیری یادیما دوشور: چوخ مؤمین اولان بو قصابی شیطان آلدادیر، قادین موشتری‌سینین اَلینه الی ایله توخونور سونرا گوناه ایشله‌دیینی دوشونوب، پئشمانلیغیندان اؤز دهره‌سی‌ایله نامحرمه توخوندوغو بارماغینی آتدیریر. بیلمیرم بلکه‌ ده او زاماندا نارکوتیک مادده دوشکونلویو وار‌ایمیش، چکیب توههوم عالمینده بو ایشی گؤروب. یوخسا نه‌یه گؤره؟! کیمه وفادارلیق ائدیرمیش؟ حیات یولداشینا سئوگیسینی ایثباتلاماق اوچون بارماغینی آتدیریب؟ گؤره‌سن سئوگی اینسانی بو قدر اؤزوندن چیخاریب قوربان ائده بیلر؟
بئله‌سینه یوخ، اما کئشکه مندن ده ساری بیریسی بعضی غرور و ایستکلرین قوربان وئره‌یدی. کئشکه منی ده دوشونن اولایدی… یوخ دوشونن اولسایدی چکیب گئتمزدی سارا. دوشونن اولسایدی آتام یالنیز اعتیبار و آبیر دئییلن بیر بهانه‌‌ایله حیاتیمی‌محو ائتمزدی. بورا گلدییمدن بری هئچ آنام دا منی سوراقلامیر. عمومیتله آنام اؤزو دئییل آتامین قرارلاری ایلا دانیشیر؛ آتامین سؤزو ایله دورور اوتورور. یولومو گؤزله‌ین بیریسی یوخدور دئمک…
نه ایسه سوپورگه زیبیللری کیسه‌یه چکیر و بیر داها باش دولاندیران سورعت‌له ایره‌لیله‌ییر.
سول یانیمداکی اوتوراجاقدا بیر معتاد کیشی باشماغینین باغینی باغلاماغا چالیشیر، سانکی فیلم اسلوو مووشن حالتینده گؤستریلیر، یاواش-یاواش دایانا-دایانا اَییلیر، آلنی دیزینه دَییب دیکسیندیینده فیلم فَست‌مووشن اولاراق تئز تئز بوراخیلیر. ساغ طرفده اَلینده دیپلمات ساکینی قیچلارینین آراسینا قویوب اوتورموش گنج بیر اوغلان تئز تئز ساعاتینا باخیر. قاطارین کیشی‌لرله قادینلاری آییران بؤلومو یعنی ایکی کوپه‌نین اورتاسیندا ایسه بایاقدان فیکریمی‌جلب ائدن اسمر بیر قادین آیاق اوسته ایستیل دیرکدن یاپیشیب دایانیب. باشدان آیاغا سوزورم اونو.‌ استئتیک جراحی‌دن فورمالاشمیش کیمی‌گؤرونن بورنو گؤزه وورور. چؤهرایی دوداق بویاسی، آلتین ساچلاری وار. اوزونون چیزگی‌لری ۳۰-۳۵ آراسی یاشی اولدوغونو آندیریر. اونا باخدیغیمی‌دویوب دا ورنی جینسیندن اولان قهوه‌ای ال چانتاسینی قوردالایا قوردالایا گیزلین و مغرورجا منه باخیر.

۲
قفیل بیر قیزدیرما جانیما هوپور. بئینیمده سارانین سون دئدییی چالخالانیر «سن مندن یاخشی‌سینا لاییق‌سن». موبایلیمین گالئریسینده ساخلادیغیم بیر شکیلینی آچیب باخیرام ؛ زووم ائدیرم گؤزلرینین ایچینه. نیفرت ائدیرم داها. بو آن اوزومده‌کی گرگینلیک‌له قاشیمدا یارانمیش قیریشی کیم گؤرسه، نه‌دنسه اینجییب نیفرت ائتدییمی‌تخمین ائده‌بیلر. سانکی دیک گؤزلریمه باخیب بو سؤزو دئیه‌رکن، ایللرین خاطیره و سئوگی‌سینی چئینه‌ییب توپورموشدو. تلفونو آتیب آیاغیمین آلتینا تاپداماق ایسته‌ییرم.
ساغ بؤیرومده‌کی گنج اوغلان‌ین گؤز آلتی شکیله باخدیغینی حیس ائدیرم، بلکه‌ده موبایلیمین ساعاتینا باخماق ایسته‌ییر. سؤندورورم موبایلی شالواریمین ساغ جئبینه تپیب بیر داها قیزا باخماغا دوام ائدیرم. قیزین باخیشینداکی آلوو منی اؤزونه چکیر. اوره‌ییمده ایبهاملی بیر ایستک وار؛ دیرکدن یاپیشمیش، دیرناغی قیرمیزی لاکلانمیش اَلینه توخونماق ایسته‌ییرم، یاخینلاشیب اونو دویماق ایسته‌ییرم. بونو نئجه ائتمه‌ییمی‌دوشونورم. اطرافداکیلارین دویوق دوشمه‌سی خوش حیس یاراتماز هر حالدا. اما بیر تهر بو ایشی گؤرمه‌لی‌یم…
یئریمی‌بایاقدان یانیمدا دا اولسا هئچ گؤرمه‌دییم کاموا بؤرکلو چلیکلی بیر قوجا کیشی‌یه وئریب من ده آیاق اوسته دایانیب دیرک‌دن یاپیشیرام. «زنده باشی جوون، خدا خئیر…» دئیه بیر شئی‌لر دئییر قوجا. قوجا کیشی‌یه رحمیم‌ گلدی یوخسا او قیزا یاخینلاشیم دئیه بو ایشی گؤردوم؟! بیلمیرم. یاواش یاواش جولو بارماغیملا اَلینه توخونورام، جوومرد قصاب یادیما دوشور، بارماغیمین اوجو گیزیلده‌ییر، ایراده‌سیزجه اَلیمی‌چکیرم اَلیندن. هئچ بیر شئیی وئجینه آلمیر. قاطارین رئیللرده هیجانلی سورتوشمه‌سی کیمی‌منده ده هیجان آرتیر. بو بوتون قطارلاردا بئله‌دی، شهر قاطارلاریندا. ائله من ده بونا گؤره مینمیشم بو زهرلی ایلانین بئلینه…
تهران قادینلارینین بو یئنی طرزده گئییملری دونیانین هئچ بیر یئرینده راییج دئییل دوشونورم. حیجابلا چیلپاقلیق آراسیندا بیر طرز. قیسا مانتو، قیسا شالوار و باش اؤرتوسو یئرینه پارچا بیر زولاق. بویون باش ائشیکده قالیر. بوینونا زیلله‌نیرم؛ نه‌سه یازیلیب اورادا، بوینوندان کوره‌یینه ساری نه‌ ایسه دؤیدوروب.
نَزیک و گؤزل خط‌له سورمه رنگینده بیر دؤیمه. باشینی بیر آز ثابیت ساخلاسا اوخویارام: «اگه کسی منتظرم بود و…» یازینین آردی مانتونون آلتیندادیر، اوخونمور. اگه کسی منتظرم بود… نه؟!! فیکر منی بورویور…
الیمی‌چکیرم اَلیندن. هر نه بیر طرفه بو یازی بیر شئیی گون کیمی‌آیدینلادیر: طرف پوزغون بیریسی‌دیر، محلله اوشاقلاریمیز دئمیشکن یاخشی تیکه‌دیر. بئینیمده مین جوره خیالا دالاراق اؤن طرفدن یاخینلاشماغا چالیشیرام.
یاواش بیر سسله پیچیلداماق کیمی‌میزیلداییرام:
-در خدمت باشیم خانم!
سایمازیانا بیر باخیشلا عمللی باشلی منی سوزور. دینمیر. بیر نئچه آندان سونرا باشقا طرزده اوتای بوتایا باخاراق: خانم وقت دارین در خدمت باشیم؟! دئیه سوال شکیلی وئریرم سؤزومه.
«بستگی داره به … » سؤزونون قالانینی باش بارماغی ایلا ایشاره بارماغینی بیر بیرینه سورتوب سانکی پول ساییر کیمی‌بیر حرکتله دوام ائدیر. بو ایشی اطرافدان گیزلی و تک من گؤره‌بیله‌جه‌ییم چوخ مهارتلی بیر طرزده گؤرور. گؤزومون ایچینه زیلله‌نیر دوداغیندا قورنازجاسینا بیر گولوشله. باشیمی‌تصدیق ائتمک علامتی اولاراق ساللاییب اولسون دئییرم.
ایچیمده نه ایسه یئرینه دوشور.

۳
قرارلاشدیغیمیزا گؤره کهریزک دوراغیندان بیر داها شوش مئیدانیا قاییتمالی اولوروق. شوشدا اوچ دوستلا بیرگه توتدوغوموز منزیلی دوشونورم. دار دودوک کوچه‌لرین بیرینده عشرت خانم آدلی بیر قادین، ۲۰۰ مئتیرلیک ایکی قاتلی بیر بینانی اجاره تاماهیندان خیردا خیردا منزیللره بؤلوب ایشچیلره، ایش‌سیزلره، آوارالارا اجاره وئریر. ۱/۵*۳ اوتاقلاردا ایکی نفر یان یانا یاتیرسا یئنه یئر دار گلیر. ائنینه یاتدیقدا دیزلرینی قاتلامالیسان یعنی. هر آیی ۷۰۰ مین تومن اوچ نفره یئنه باهادیر.‌
دوستلاریم بو ساعات ایشده اولورلار. دئمک بیر نئچه ساعات اَیله‌نیب واخت کئچیرمه‌یه واختیم وار.
شوش استانسیاسیندا سوپورگه‌نین کیسه‌سیندن بوشالیریق. تاکسی‌یا مینمه‌لیییک. مترو دوراغیندان ائشییه چیخیب بیر بیریمیزه یاخینلاشیریق. سیرا ایلا موسافیر آختاران تاکسی‌لردن بیرینه مینیب مقصده دوغرو یؤنه‌لیریک.
یول بویو قیزین بوینوندا‌کی یازی‌یا فیکیرلشیرم بیر نئچه‌سئری ده ماراغیمدان گؤزومو زیلله‌ییب باخماغا چالیشسامدا فایداسیزایدی. اگه کسی منتظرم بود ولش نمیکردم؟ اگه کسی منتظرم بود و … یوخ چوخ گولونج سؤزلردیر بونلار. ائله‌ایسه نه اولا بیلر؟! بونو اوخومالی‌یام اؤز گؤیلومده دئییرم. فیکریمی‌عمللی باشلی قاتیب. مقصده یئتیشمه‌یه تله‌سیرم. یازینی اوخوماغا گئدیرم یوخسا او قیزلا اَیله‌نمه‌یه؟! بیلمیرم. هردن اؤز اؤزومه اوشه‌نیرم بوراخ دئییرم، آلچاق ایشدی، جینسی آزغینلیقدی، کیمینسه ناموسونو لکه‌لمک‌دی… اما غریزی حالتده یولا دوام ائدیرم بیر تهر اؤزومو آلدادیرام اوووندورورام.
آرامیزدا بیر نئچه سؤزدن باشقا هئچ سؤز آلیب وئریلمیر؛ آدینی بیلمک اولار؟ نه فرق ائدیر سن صبا سسله، اونسوز دا بیر ساعاتین قوناغی‌یام… سوسماغا قرار وئریرم.
تاکسی دن دوشوب اورتاسیندا ائنسیز بیر سو آرخی اولان دار دودوک کوچه‌نی آددیملاماغا باشلاییریق بیر تک عشرت خانیمین گؤزلرینی اوغورلاماق گؤزومه دوروب. بعضن قاپیسینا بیر صندل قویوب اؤزونو کؤلگه‌یه وئریر کوچه ده. اما گون اورتا اولدوغونا گؤره اولماماق احتمالی چوخدو دوشونورم ایچیمده.
یاخینلاشدیقجا هیجانیم آرتیر آرتیق قارا قهوه‌ای بویانمیش قاپینی گؤرورم. قیز تله‌سدیینی دئییر، -قراریم واردیر تئز قاییتمالی‌یام. شوخلوق ائتمه‌یه چالیشیرام: آی سنین بو قرارین قارا گلسین… اوزونون جیزگی‌لری بئله دَبَرمیر، آلینمیر شوخلوغوم، دوداغیمدا تزه‌جه استارت گؤتورن گولوش اؤله‌زیییر.
بایاقدان الیمده حاضیرلادیغیم آچاری قاپی‌یا سالیرام. شانسدان عشرت خانم دا یوخدو، ایچری تپیلیریک.‌
قیز سانکی بو قیسا متراژلی منزیللرله تانیش‌ایمیش کیمی‌هئچ تعجب ائتمیر، چوخ راحات کئچیب اَیله‌شیر.
یئنه تلسمه‌یینی وورغولاییر، گؤزله‌‌یه‌نیم‌ وار بونو بیر داها دئییر. اللریمی‌تسلیم علامتی اولاراق قالدیریب گولومسه‌ییرم.
فیکریمده، چوخ دا یاخشی، زامانی ایتیرمک اولماز «دؤرد نالا سئویشمک لازیم» دئیه دوشونسمده بوینونداکی یازی هله‌ده بئینیمده‌دی.
کؤینه‌ییمی‌باشیمدان چیخاریرام، دویمه‌لری دوداغیما دَیه دَیه اینجیدیر. جورابلاریما قدر سویونورام.
کئچمیشده قیزلارلا عادی بیر دانیشیق اوچون چوخ چتینلیک چکن من، ایندی اوتانج حیسسینی اوتموشام سانکی. تانیمادیغیم و ایلک اولاراق گؤردویوم بیری‌سی ایله مترودا گؤردویوم ایشلر و بو قدر یولو گلیب گؤزلرینین قاباغیندا سویونماق هئچ عاغلیما دا سیغمازدی. اؤزومدن تعجب ائدیرم بو تعججوبو سانکی قیز دا دویور.
آیاق اوسته هؤروت هؤروت معطل باخیب منی گؤزله‌ین اسمر قادینین الینین دویونونو قوینوندان آچیرام. الینی آتیب آت‌قویروغو شکیلده ییغدیغی ساچی‌نین کئشینی آچیب مانتوسونون جئبینه قویور. ساچلاری داغیلیر.‌ گئییمینین چیخارماسی اوچون یاردیم ائتمک بهانه‌سی ایله آرخاسینا کئچیرم، امان وئرمیر، مانتونو سویونماغا باشلاییر. گؤزومو دیکیرم بوینونون آرخاسینا. ساچلاری چییینیندن اوزو آشاغی تؤکولموش. هیجانیم آرتیر ماراقلا ساچلارینی کنارا چکیرم گؤزومو زیلله‌ییرم یازی‌یا : «اگه کسی منتظرم بود واس تو لخت نمی‌شدم»

۱۳۹۰-۱۳۹۱