اوچورتما
زامان پاشازاده
یوخوما گیرمیش اوچورتماسان
گؤی اوزونو دوستاق ائتدیگیم اوتاقدا
هئی دیکسینیرسن منده کی گؤی اوزو فوبیاسیندان
هئی ییخیلیرام
اوستومه قاپانیر کؤلگم
هئی ایپی‌نین اوجو الیمدن چیخیر.
گئجه نین اولدوزلو پرده سینی سیییریرم
آغلاغان بیر بولود وار گئجه‌نین آرخاسیندا
گولن بیر گونش.
خاطیرلاماغا چالیشدیغیم بیر یوخو کیمی گل-گئتده دیر اوزون
قیریشدیریر قاشینی
گولور
ساچلارینی گونشه دویونله‌میش اوچورتما.
ساچلارین، کولک‌لرین شهرداشی
یئلله‌نیر اوچورتما سایاق
خاطیرلاماغا چالیشیرام گونشه باخاراق
سیزیر یادداشیما یوخومون ریکاوئری وئرژئنی;
یوخوما گیرمیش بیر اوچورتما وار
اوچوروما سوروکله‌ییر ایپی‌نین اوجو،
دیکسینیر منده گؤی اوزو فوبیاسی.
95/۴/۱۲
