چئویرن: بؤیوک‌آغا افندی
ترجمه: بؤیوک‌آغا افندی
بؤیوک‌آغا افندی

بیزم عائیله قوناغی چوخ سئوه‌ر. مخصوصاً بیزیم آقاجان. اصلن قوناقدان اؤتور اؤلر. اونا گؤره ده هرگون یوز دفعه دئییر: قوناق دئدیگین ائو صاحیبی‌نین دوه‌سیدی؛ هاردا خیخلاسان اوردا یاتار.
گونلرین بیر گونونده بیزه بیر قوناق گلدی. قوناق منیم بی بی اوغلومون، بی‌بی اوغلوسونون خالا اوغلوسو ایدی. قاپیدان گیرمه‌میش منی قوجاقلاییب، هر اوزومه اون بئش بانکا سالدی. بیر آنبار سالام یئتیرندن سونرا دستمالیندان بیر بالاجا گودوش، یوغورد چیخارتدی. بیر ساعاتدا او یوغوردی تعریف ائیله‌دی. خولاصه نوبت یئتیشدی بیزه. من هله آغزیمی آچمامیشدیم بیزیم آرواد فوری سسلندی:
–          آی قارداش نه عجب؟ ناواخت گلمیسیز؟ انشالله نه واخت تشریف آپاراجاقسینیز؟
قوناق بویوردو:
–          بوگون گلمیشم، ساغلیق اولسا نئچه گونده خیدمتیزده وارام.
بیزیم آرواد نئچه گونی ائشیتمک همان، سؤزو آغزیندا دوندو. رنگی آتدی، قیافه سی چؤندی؛ دیک دوردو. من سوروشدوم:
–          سن هارا، بورا هارا؟ گون هاردان چیخیب؟ بیزی شرمنده ائیله‌میسن بو بیر پونزا یوغوردنان.
بویوردولار:
–          سیزدن اؤتور اوره‌ییم اسیردی، گونده سیزی یوخودا گؤروردوم. فقط گلمیشم سیزی گورماغا.
هله سؤزون تکینه یئتیشمه‌میشدیم کی خانیم آشپزخانادان چاغیردی:
–          بؤیوک‌آغا ناهار حاضیردی ها.
سوفره‌نی سالدیق. تازا باشلامیشدیق یئمه‌یه. قاپی دؤیولدو.
–          کیمدی؟
چیخدیم قاپییا گؤردوم بیزیم آقاجان..سلام آقاجان بویورون. بیردن بیره آقاجانین گؤزو باشماقلارا ساتاشدی. بویوردی:
–          او باشماقلار کیمیندی؟
دئدیم:
–          قوناغیم وار آقاجان.
بویوردی:
–          گئده گونده- گونده نه قوناقبازلیقدی؟ بیلدیر سنین قوناغین واریدی، گینه کیمدی؟
عرض ائیله‌دیم :
–          بی بی اوغلونون، بی بی اوغلوسونون خالا اوغلوسودو.
یبلاخره آقاجان گلدی ایچری‌یه. هامی دوردو ایاغا. آقاجان بویوردی:
–          ایله شین.
دوز گئتدی قوناغین باشی اوستونه:
–          اوغول نییه گلمیسن؟ نه ایشین وار؟ بیلرم ائله سیزین بورادا ایشینیز اولاندا بیز یادا دوشه‌ریق.
یئرلی- دیبلی توضیحات آلیر، بیر یاریم ساعات بازجولوقدان سونرا  گئتدی اوتوردو موبلون اوستونده. اوزون ده چئویریب پنجره یه طرف.
–          آقاجان بویورون ناهارا.
–          من یئمیرم، وئر ائله قوناغین یئسین.
–          آقاجان دوگودو ها گل بیر تیکه یئه.
–          یایین گونونده نه دوگو بازلیغیدی؟ بیر آز ائیران چالایدیزدا. دئیه‌سن بو بورنی فیرتیقلیلار دوگو یئمه‌سه‌لر عمللری آشماز.
بیردن بیره آقاجان نوشابه‌لری گؤردو. دئدی:
–          او شوشه‌ده کیلر نمنه دی؟
دئدیم:
–           نوشابه دی آقاجان .گل بیر ایستیکان دا سن ایچ.
–          من ایچمیرم،  وئر ائله قوناغین ایچسین.
باشلادی دئینمه‌گه. کاسیبین اوشاغینین عقلی اولماز، دئیه‌سن نوشابه ایچمه سلر چؤره‌ک بوغازلاریندان گئتمز. اوزونو توتوب قوناغا طرف:
–          آقا سن هر گون ائوینده نوشابه ایچردین؟
قوناقی بتر تر باسیب. آقاجان دا اؤز ایشینده‌دی.
–     خالقین اوشاغی دده، ننه سینین فیکرینده اولار. بیزیمکیده یا دوست اوینادار یا قوناق. دییه سن دده‌سینین تویودور ،گونده -گونده قوناقلیق وئریر نوشابه وئریر.
خولاصه بیزیم آقاجان دوردو ایاغا. میرتدانا- میرتدانا گئدیر، هردم ده بیر چپ- چپ قوناقا باخیر. هله آقاجانی یولا سالمامیشدیم، خانیم چاغیردی:
–          بؤیوک‌آغا! بیر دیقه گل بورا.
گئتدیم آشپزخانایا.
–          تئز اول پول وئر گؤروم ، شاما هیچ زادیمیز یوخدوها!
چوخ سایاندان سونرا مندن بیر اون مین آلدی. برنامه باشلاندی. شاما اوملت، ناهارا کوکی. ایندی بیر هفته دی بو برنامه‌نین ایدامه‌سی وار. نه قوناغین گئتمک قصدی وار، نه آروادین بیر قیران تخفیف وئرمک. یاواش- یاواش قوناق بئش اون کیلو وزن آزالتدی. بیر اوندا گؤردوم آرواد بارماغینا تازا بیر اوزوک سالیب. اوشاقلاردا کشف ائیله دیلرکی هله قوناق تازا باشلاییب ایش آختارماغا. آقاجان دا گونده اوچ دفعه سوفره‌نی یئره سالماق همن تاپیلیر. ائله بیل توکون توتموسان اودا. بیر یاریم ساعات بازجولوق ائیله‌ییر، تذکور وئریر، دوزه‌لیر یولا. خولاصه اون گونده بئله گئچدی. من گؤردوم منیم بو بی بی اوغلومون، بی بی اوغلوسونون خالا اوغلوسونون هله گئتمک قصدی یوخدو. دردیمی همسایالارین بیری‌ایله آرایا قویدوم. او منی دوشوندوردو کی گره‌ک نئیله‌یک.
گئجه اولدو شامی یئدیک. قوناق گئتدی یاتدی. هله تازا یوخلامامیشدی بیزیم همسایا بیر ایکی هوایی تیر آتدی. بیر ایکیسین‌ده قوناق یاتان اوتاغین در، دووارینا ویردی. بیر اوندا گؤردوم قوناق تر- تلسیک یوخودان دوردو:
–          نه اولوب، جنگ باشلانیب؟ بمباردماندی؟
دئدیم:
–          یوخ. سن سس- سوی چیخارتما. تئز گیزلن.
گؤردوم قوناغین رنگی آتیب، بتر ناراحاتدی. دئدی:
–          سن الله دئه گؤروم نه اولوب؟
دئدیم:
–     واله ایکی آی بوندان قاباق بیر گئجه من توفنگیمی تمیز‌له‌ییردیم. الیمدن بیر تیر قورتولوب گئتدی دیدی بو همسایانین قوناغین یارالادی . همسایادا آند ایچیب بیزه هر نه قوناق گلسه اونو اؤلدورسون . ایندی بیلیب بیزیم قوناغیمیز وار، ایسته‌ییر  سنی اؤلدورسون. آمما سن قورخما. قوی او سنی اؤلدورسون. اگر او سنی اؤلدورسه، من اونون بوتون خانواده‌سین اؤلدوره جاغام.
بیر اوندا گؤردوم قوناق باشماقلارین ووروب قولتوغونا تو دابانا نئجه قاچیر. نئجه گئدیر جت کیمی. فقط دئییر:
–          من گئتدیم سن بیلرسن همسایاونان.
بو ماجرادان ایندی ایکی گون گئچیر. بیزیم آرواد چوخ ناراحاتدی. آغزیندان چیخانی همسایایا دئییر. آخی ائله بیل تصمیم توتموشدو بیر گردنبند ده آلسین. آقاجان دا مطمئن اولوب کی داها قوناق گئدیب، اصلاً بیزیم طرفه دولانمیر….

 

چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

قوناق

بؤیوک‌آغا افندی
www.ishiq.net

آذربایجان ادبیات و اینجه‌صنعت سایتی

قوناق

بؤیوک‌آغا افندی
www.ishiq.net

آذربایجان ادبیات و اینجه‌صنعت سایتی

قوناق

بؤیوک‌آغا افندی
www.ishiq.net

آذربایجان ادبیات و اینجه‌صنعت سایتی