ایشیق 1
آذربایجان معلم‌لری و تحصیل مساله‌سی
ایشیق 2

آذربایجان قفه‌خانالاری

ایشیق 3

آذربایجان و مهاجرت مساله‌سی

ایشیق 4
آذربایجان توی‌لاری

انتظار/ بهروز. م

سرین یئل اسیر. هاوا چوخ سویوقدور. بیرساعت اولار کی اسن شهرینین دمیر یولونون تاکسی دایاناجاغیندا مسافر گوزله‌ییرم. آداملار، بیربیرلرینی ایته‌لییه- ایته‌لییه، اؤزلرینه یول آچیب, گئدیرلر. ائله بیل کی آری یوواسینا چوپ اوزادیبسان. آنجاق کیمسه تاکسییا طرف گلمیر.
گؤزل بیرقارا قاش- گؤز قیز، دمیر یولونون پیله‌لرینین ساغ طرفینده دایانیبدیر. او اوزون زاماندیرکی کیمسه‌نی گؤزله‌ییر. اونون اوزون قاپ – قارا شوه ساچلاری، ایلان کیمی قیوریلیب, چیینلرینه تؤکولوبدور.
کوراوغلونون اوپئراسینا قولاق آسیرام. عزیرحاجی بیگوفون یاراتدیغی بو ابدی اثرین ملودیلاری و او گؤزل قیزین نیگران گؤزلرینین شفقی منی لاپ چاشدیریبدیر.
اوپئرانین سونونا بیر آز قالیر. کوراوغلو عاشیق پالتاریندا اؤزونو حسنخانین سارایینا یئتیریب، سازین سینه‌سینه باسیب, قیر آتین وصفینده اوخویور. کچل حمزه اؤزونو تلسیک حالدا حسنخانا چاتدیریب, عاشیغین کوراوغلو اولدوغونو بیلدیریر.
او گؤزل قیز، نیگران گؤزلری ایله او طرف بو طرفه بویلانیر. نیگارین حزین ناله‌سی گؤیه قالخیب, اوره‌یینی تیتره‌دیر.
– بس گؤره‌سن کوراوغلونون دلیلری هاردا قالدی؟ نییه گلیب, داردا قالان نیگارین فریادینا چاتمیرلار؟
اوره‌ییم چیرپینیر. ائله بیل کی یئر ایله گؤی آراسیندایام. قولاغیم اوپئرانی دینله‌ییر، آنجاق گؤزلریم او، گؤزو یولدا قالمیش گؤزل قیزدادیر. اونون نیگران باخیشی منیده نیگران ائدیبدیر.
اؤز اؤزومه دوداق آلتی پیچیلداییرام:
-گوره‌سن کیمی گؤزله‌ییر؟ بس نییه گلیب یئتیشمیر گؤزله‌دییی کیمسه؟ هاردا قالیب؟ اولمایا قیزی اونودوبدور؟
اوپئرانین سسی داهادا اوجالیر. های- کوی قوپور. دلیلر میدانا گیریب، کوراوغلو ایله برابر ظالم خانلارلا ووروشورلار. کوراوغلونون کسگین قیلینجی ایشه دوشور. حسن خانین باشی بدنیندن آیریلیر. ساز، قاوال، ناقارا نعره چکیر.
دمیر یولونون سول طرفیندن اوتوز- اوتوز بئش یاشیندا بیر گنج، قیزا یاخینلاشیر. اونلار قوجاقلاشیب اؤپوشورلر. اوغلانین الینده بیر” تار ” چانتاسی وار. منه ائله گلیرکی صنعتچیدیر؛ عاشیقدیر.
جاوان اوغلان، قیزین الیندن یاپیشیب، منه طرف گلیر. تاکسینین قاپیسینی آچیب، آرخاداکی صندلیده اوتوروب، هارا گئتمک ایسته‌دیکلرینی سؤیله‌ییرلر.
ماشینی یاندیریب، یولا دوشورم. دانیشیقلاریندان بیلینیر کی اوغلان موسیقی اوستادیدیر و قیز ایسه موسیقی طلبه‌سی. اونلارین ایکیسیده منی اونودوب، موسیقی‌ایله علاقه‌دار دانیشیرلار. تاردان، قاوالدان، ناقارادان و چوبان قاوالیندان دانیشیرلار. سؤز وئریب سؤز آلیرلار. بیلینیر کی موسیقی اونلارین حیاتیندا گئنیش رول اویناییر.
مقصده چاتیریق و قیز ماشینی ساخلاماغا امر ائدیر. من بیر قیرمیزی کرپیجدن تیکیلمیش بینانین قاباغیندا دایانیرام. قیزین الینده بیر یاشیل ایگیرمی مارکلیق وار. الینده کی پولی منه طرف اوزادیب، آلمانجا دئییر:
-ساغ اولون آقای شوفر!
من سول طرفدن آرخایا دؤنوب، آذربایجانجا سوروشورام:
-اولارکی من سیزدن پول آلمایام؟
قیز و اوغلان بیربیرلرینه باخیب، تعجب‌له منیم آذربایجان دیلینده دانیشماغیما قولاق آسیرلار. یئنیدن اوزومو اونلارا توتوب دئییرم:
-من صنعتچی دئییلم. آنجاق صنعتچیلری چوخ سئویرم!
ایکیسینینده گؤزلری گولور. چوخ یالوار- یاخاردان سونرا، پولو وئریب گئدیرلر. بینانین قاپیسینی آچاندان سونرا، گؤزل قیز دؤنوب، ال قالدیریر و اوجادان دئییر:
– سنی یاشایاسان قارداشیم، چوخ ساغ اول !
سونرا، گوله- گوله قاپینی باغلاییر.
کوراوغلونون اوپئراسینین داوامینی دینله‌مک ایسته‌ییرم. ضبطین سسینی اوجالدیرام. کوراوغلونون سازی دیله گلیر و اؤزو، هارای چکیر و نیگارین وصفینده اوخویور:
“بالام هی . . .ی
سنی گؤردوم عاشیق اولدوم
درده سالدین جانیمی
سنی گؤردوم نازلی یاریم
گئده‌ر الدن اختیاریم
نازلی دلبریم هی . . .
گره‌ک عاشیق یار یولوندا
قالماسین جان دردینه
هی …

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *