آذربایجان ناغیل‌لاریندان
حلالزادا قردش ایله حرامزادا قردش / صمد بهرنگی
چئویرن: ایشیق
ترجمه: ایشیق
ایشیق
00:00
00:00

بیر گون وار ایدی٬ بیر گون یوخ ایدی. بیر دانا حلالزاده قردش وار ایدی٬ بیر دانا حرامزادا٬ شهرده داها ایش یوخ ایدى. بونلار دئیرلر: نه ائله‌یک٬ نه ائله‌مه‌یک؟ دئیرلر: دوراق گئدک بیر آیرى شهرده ایش تاپاق.

بونلار دستماللارینا چؤرک باغلارلار٬ دوشرلر یولا. ناهار چاغی یئتیشرلر بیر سویون باشینا. حرامزادا قردش دئیر: چؤره گینی آچ یئیک. آخشام دا منیمکین یئیه‌ریک.

 حلالزاده قردش بیر سؤز دئمز. دستمالین آچار باشلارلار یئمه‌گه. سونرا گینه دوشرلر یولا. آخشام چاغی یورغون-آرغین یئتیشرلر بیر یئره. حلالزاده قردش دئیر: قردش٬ ایندی ده من آجام. گتیر چؤرەگیندن یئیک. دئیر: اوغلان٬ گئت ایشینین دالیجا! چؤره ک آنجاق منی گؤره‌ر.

بو٬ نه قدر ایللاه ائلر٬ اولماز. آخیردا بونلار ساواشارلار. حلالزادە قردش بیر طرفه گئدر٬ حرامزادا قردش بیر طرفه.

حلالزاده آج٬ سوسوز گلر یئتیشر بیر مغاره یه٬ دئیر گئجه نی بورادا دالدالانیم سحر دوشوم یولا. گیرەر مغاره یه گؤرەر هئچ کیم  یوخدو. بیردن-بیره گؤرەر آیاق سسى گلیر٬ تئز قاچار گیرەر بیر دالدا یئره گیزله‌نر.

گونبولدویا-گونبولدویا بیر دانا آیی گلر بیر آز سونرا تاپییلدیا-تاپبیلدیا بیر قورد٬ سونرا بیر تولکو. بونلار گلرلر اوتورارلار مغاره نین ایچینده.

قورد دئیر: آیی قرده‌ش٬ کئفین برک کؤک دی٬ نه وار؟ دئیر: نه اولاجاق٬ بیر دانا خرابه تاپمیشام آلتی بوتون خزانه‌دی. گونده گئدیرم اورا بیر-ایکی تپیک وورورام گونبولدور. سونرا قولاغیمی داییرام قولاق آسیرام.

قورد دئیر: بس٬ مندن خبرین یوخدو. پادشاهین قیزی نوخوشدو. هر نمنه حکیم گتیریبلر اولماییب. داواسین من بیلیرم. بیر دانا سورو وار٬ ایچینده بیر قره قویون٬ او قویونون بئینین قورودسان٬ قیزین بورنونا پوفله سن٬ قیز توخدار. من گونده گؤز ائله‌ییرم اونو قاچیردام. آمما حیف کی٬ چوبان گؤز وئریر٬ ایشق وئرمیر. منیم ده شوق-ذوقوم اونادی.

تولکو دئیر: ائله ده قولاق آسین منه٬ بیر دانا تپه وار٬ اونون یانیندا بیر آقچا سیچان یوواسی وار. بو آقچا سیچان گونده قیزیللاری یوواسیندان چیخاردار سرەر گون قاباغینا اوستونده مللاق سالار. منده اوتورارام تپه‌نین باشیندا اونا تاماشا ائله‌رم.

بونلار بیر قدرده دانیشاندان سونرا باشلارین قویارلار یاتارلار.

اوغلان اؤز-اؤزنه دئیر: آی آلاه٬ نئجه اولایدی من سحر چاغی ساغ-سالامت بورادان چیخیب گئدەیدیم!

سحرچاغی آیی گونبوویا-گونبولدویا گئدر٬ قورد تاپبیلدایا-تاپبیلدایا. تولکوده گئدر. اوغلان چیخار ائشیگه٬ گئدر تپه‌نین یانینا. گؤرەر بلی٬ تولکو قردش اوتوروب تاماشا ائله‌ییر سیچانا. بیر داش آتار تولکونون قابیرقاسینا. تولکو دابانا قووت قویار قاچار. سیچان قیزیللاری گون قاباغینا سریب اوستونده مللاق سالیردی. اوغلانین سسین ائشیتجک قاچار گیرەر یوواسینا. اوغلان گلر قیزیللاری گؤتورەر دولدورار جیبینه گئدر سورونون یانینا. بیر قدر پول وئرەر قره قویونو آلار. باشین کسر. لشین وئره‌ر چوبانا. گتیرەر بئینین قورودار تؤکر بیر شوشه‌یه. گلر شاهین عمارتینین قاباغیندا باشلار: حکیمم٬ طبیبم!

شاهین آداملاری چیخار دئیر: اوغلان ایندیه‌جه نمنه حکیم گلیب بو قیزی توخدادا بیلمه ییبلر٬ شاه وئریب باشلارین کسیبلر. گل قوی چیخ گئت!

اوغلان دئیر: اولسون٬ من ده باجارا بیلمه‌سم٬ منی ده اؤلدورتسون.

اوغلانى گتیرەرلر ایچریه. دئیر: هامی اوتاقدان چیخسین. هامی چیخار. قیزیلان اوغلان تک قالارلار. اوغلان شوشه‌نی چیخاردار٬ بیر آز پوفلر قیزین بورنونا٬ قیز آسقیرار دورار آیاغا.

شاه گؤرەر قیزى توخدادی٬ سئویندیگیندن بیلمز نه ائله سین. دئیر: منى ایسته‌ین بونا انعام٠

هر طرفدن اوغلانین باشینا قیزیل یاغدیرارلار.

شاه دئیر مندن بیرزاد ایسته!

اوغلان دئیر من هئچ زاد ایسته‌میرم٬  دئدیگین کیمی قیزینی وئر منه بیر ده شهرین ائشیگینده کی خرابه‌نی.

شاه دئیر: اولسون٬ قیزیمی وئردیم سنه. خرابه ده سنین.

اوغلان گلر خرابه‌نی سؤکدورەر. خزانه‌نی چیخاردار. سونرا بیر دانا گؤزل-گؤیچک عمارت دوزلتدیره‌ر٬ شاهینکیندان دا آرتیق٬ قیزی دا آلار.

بیر گون کوله فرنگی ده اوتورموشدو گؤرەر حرامزادا قردش جیریم-جیندا ایچینده ال-آیاق نه شیخدا اورادان کئچیر. اونو یانینا چاغریتدیرار.

دئیر: اوغلان منی تانیرسان؟

دئیر: قوربانین اولوم٬ یوخ!

دئیر: من هامان آدامام کی٬ بیر تیکه چؤره‌کدن اؤترو مندن آیریلدین.

بو اوغلان بیر باشین قاوزار دوروست باخار گؤرەر اؤزودو.

دئیر: سن نه ائله‌دین بئله دؤولتلی اولدون؟

اوغلان باشینا گلن حال-قضیه‌نی بونا دئیر.

دئیر: من ده گئتسم اولار؟

دئیر: بیلمیرم.

حرامزادا قردش دورار گئدر مغاره‌ده گیزله‌نر. بیر آز سونرا گونبولدویا- گونبولدویا بیر آیی گلر. سونرا تاپبیلدایا-تاپبیلدایا بیر قورد. سونرا تولکو. بونلار بئکئف-بئداماق اوتورارلار یئره. بیردن تولکو دئیر: قردشلر٬ بیز اوندا کی بورادا دانیشیردیق حتما بیر نفر بنی آدام قولاق آسیرمیش. دورون بورانی بیر آختاراق.

دورارلار آیاغا. مغاره نی آختارارلار. اوغلانی تاپارلار٬ بودارلار.

اشتراک گذاری در print
چاپ
اوخوماق زامانی: 3 دقیقه
اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email
آذربایجان ناغیل‌لاریندان

حلالزادا قردش ایله حرامزادا قردش / صمد بهرنگی

ایشیق
www.ishiq.net

آذربایجان ادبیات و اینجه‌صنعت سایتی