اوخوماق زامانی: 2 دقیقه

اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email
چئویرن: ایشیق
ترجمه: ایشیق
ایشیق
00:00
00:00

بو یازی‌نین سس فایلی هله حاضیرلانماییبدیر. بو یازی‌نی اؤز سسینیزله اوخویوب بیزه گؤندره بیلرسینیز.

 اؤکوز، اؤکوز، قان اؤکوز

بوینو قـیزیل قان اؤکوز

چک چایـیری چمندن

سنه جان قوربان اؤکوز

اؤکوزوٍم بیردی منیم

طالعیم کوردو منیم

ایکی اولدو اؤکوزوٍم

قارا چوخام  دوردو منیم

باشینا من دولانـیم

من دؤنوٍم من دولانـیم

اؤلمه اؤلمه یازیغام

کؤلگه‌‌نده من دولانـیم

بوینونو من یاغلارام

یامان گؤزوٍ داغلارام

تئز چک مارال اؤکوزوٍم

گئری قالسان آغلارام

اؤکوزوٍن هوداقلاری

ساللانـیب دوداقلاری

تئز چکین یـئر قورتارسین

قایـیتسین هوداقلاری

تئللی مرجان بیزه گل

داغدان ائنیب دوٍزه گل

دیرناغینـین ایزییله

بو یـئرلری بزه گل

اؤکوز بوینون یاغلارام

دوٍشمن گؤزوٍن داغلارام

رانانی درین گؤتوٍر

سنه یونجا باغلارام

چکن اؤکوز مرد اولور

چکمه‌یینی درد اولور

تنبل اؤکوز یـییه‌سی

خجیل اولور، پرت اولور

قـیزیل اؤکوزوٍم یـئری

قویما شوم قالا گئری

ایتی ترپن مارالیم

دوشمانلار باخیر بری

راناداکی  بوز اؤکوز

قوپاریبدی توز اؤکوز

آلیب یـئرین جانـینی

چیخسین یامان گؤز اؤکوز

اؤکوز قایـیتدی قاشدان

آی آلله ساخلا داشدان

بد نظر قاباقدادی

یولونو سال بو باشدان

داغ دؤشوٍنده یاتانا

گوٍن گئده‌ر آی باتانا

قارا اؤکوز قارغییار

جوٍتوٍن مجین  توتانا

قارا اؤکوز آراندا

چیخار گوٍن قـیزاراندا

هوداق مورادا چاتار

تورپاقدان بار آلاندا

اؤکوزوٍم گئدیر ایشه

قورخورام باغری بیشه

هولا بیر بولوت گله

گؤیدن یـئره نم دوٍشه

اؤکوزلر قوشا گئتدی

گوٍج ووردو داشا، گئتدی

جوٍتوٍن مجی  قـیریلدی

زحمتیم بوشا گئتدی

اؤکوزلریم ناز ائـیلر

قویروق بولار توز ائـیلر

هر آخشام گوٍن باتاندا

کؤوشن‌ده پرواز ائـیلر

ننه‌م قارا قاش قویون

قارلی داغلار آش قویون

آی قارانلیق گئجه‌ده

چوبانا یولداش قویون

ننه‌م آ شکیل قویون

بئلینده ککیل قویون

آی قارانلیق گئجه‌ده

آرخاجا چکیل قویون

ننه‌م آ ناریش قویون

نییه بیر قاریش قویون

چوبان سندن کوٍسوٍبدوٍ

سوٍدوٍ وئر باریش قویون

ننه‌م آ کوٍردی قویون

اوتلادی دوردو قویون

آیاغین یئره دویوٍر

گوروٍبدوٍ قوردو قویون

ننه‌م قومرال تات قویون

ایلدن ایله آرت قویون

بالالارجان اوٍسته‌دی

یـئتیش آ نامرد قویون

ننه‌م آ شیشک قویون

یونو بیر دوشک قویون

بولامانی تئز یـئتیر

قـیریلدی اوشاق قویون

قویونون اوزوٍ گلدی

دوٍزلندی یوٍزوٍ گلدی

چوبانـین قوجاغیندا

بیرجه جوٍت قوزو گلدی

اشتراک گذاری در print
چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *