اوخوماق زامانی: 2 دقیقه

اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email
چئویرن: عمران صلاحی
ترجمه: عمران صلاحی
عمران صلاحی
00:00
00:00

بو یازی‌نین صوتی نسخه‌سی حاضرلانماییب. بو یازی‌نی اؤز سسینیزله اوخویوب بیزه گؤندره بیلرسینیز.

1-     اون و بال

بیر نفر اون و بال آلمیشدی، مئشه‎یه گئدیردی.

سوروشدولارکی: «اوردا نه ایشین وار؟»

مئشه‎ده آیی توتماغا گئدیرم.

سوروشدولار: «نییه بال آپاریرسان؟»

دئدی: «آیی‎نـین، بالدان خوشو گلیر. بیر آز بال قویاجاغام آغاجین اوٍستوٍنه، بیر آز دا یاخاجاغام آغاجین تنه‎سینه.»

سوروشدولار: «یاخشی، نه اولسون؟ منظورون ندیر؟»

دئدی: «آیی بال یئمک اوٍچوٍن، آغاجا دیرماشاجاق. ائله کی، بالی ‎یئدی، کئفلی- کئفلی آغاجدان ائنه‎جک، اوندا بال بدنینه یاخیلاجاق.»

سوروشدولار: «پس او اونو نه اوٍچوٍن آپاریرسان؟»

دئدی: «اونو دا تؤکه‎جییم آغاجین دیبینه. آیی، ائله کی، آغاجدان ائندی، دوٍشه‎جک اونون اوٍستوٍنه، باشدان آیاغا اون اولاجاق. سونرا دوروب گئده‎جک ائوه. من ده دالیسیجا. یئکه- زیرپی آیی ائوه گیرندن سونرا، گئده‎جک آینانین قاباغیندا دایاناجاق، اؤزوٍنه باخاجاق، گؤره‎جک باشدان آیاغا آغ-آپباق اولوب. ائله بیله‎جک کی قوٍطب آیی‎سیدیر. دئیه‎جک: «من کی قوٍطب آیی‎سییام، بوردا نه قاییریرام». یوٍکوٍن چاتاجاق گئده‎جک قوٍطبا. من ده دالیسیجا. ائله کی، یئتیشدی قوٍطبا، بدنی دوناجاق، داها حرکت ائله‎یه بیلمه‎یه‎جک، اوندا من ده یئتیشیب اونو شیکار ائده‎جگم.»

ایندی من بیلمیرم بو کیمین حئکایه‎سیدیر. اگر سیز بیلیرسیز بیزی ده جریاندا قویون.

2-     عمّهنین ائوی

بیر موٍددتدیر تهرانین اطرافیندا، شهرجیک‎لرین بیرینده یاشایـیریق. بیر قوراضا ماشینیمیز وار، اونونلا اؤزوٍموٍزوٍ تهرانا یئتیریریک. بیر گوٍن بیر مؤحترم آغا شهرجگین باشیندا دایانمیش ایدی، منیم قاباغیمی کسدی. خاهیش ائله‎دی کی، اونو اوتوبوس دایاناجاغیناجان یئتیرم. اونو یئتیردیم دایاناجاغا، دایاندیم کی، یئنه

دئدی: «ائله‎یه بیلرم بیر آز آشاغی‎لیق دا ائنم؟»

دئدیم: «خاهیش ائلیرم.»

یولون آراسیندا سوروشدو: «سیز چارراهین باشیناجان دا گئدیرسیز؟»

دئدیم: «هن.»

دئدیم: «پس من ده اورایاجان سیزین‎له گلیرم.»

دئدیم: «خاهیش ائلیرم.»

چارراها کی، یئتیشدیک، سوروشدو: «تهرانسرین» «سه راهینا» دا گئدیرسینیز؟»

دئدیم: «چوٍن مئیدان-ی آزادی‎یه گئدیرم، ایستر- ایسته‎مز او اورادان کئچه‎جم.»

دئدی: «نه یاخشی، پس من ده سیزله مئیدان-ی آزادی‎یه گلیرم.»

سونرا سامسونئت کیفینی آچدی، بیر کیتاب چیخارتدی و چوخ راحات باشلادی‎ اوخوماغا. آزادی مئیدانـینا کی، یئتیشدیم، دایاندیم کی، طرف دوٍشسوٍن. پولیس گلدی بئش مین توٍمن منی جریمه ائله‎دی. مئیداندا دایانماق یاساق ایدی. یولا دوٍشدوٍم.

مؤحترم آقا سوروشدو: «بوردان هارا گئده‎جک‎سیز؟»

دئدیم: «عمّه‎مین ائوینه.»

دئدی: «سوروشا بیلرم عمّه‎زین ائوی هایاندادیر؟»

3-     سیاست

بیری دئدی: «سیاسته گیرمه».

دئدیم: «بیز سیاسته گیرمیریک، سیاست بیزه گیریر!»

اشتراک گذاری در print
چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

عمران صلاحی

عمران صلاحی

باشقا اثرلری