اوخوماق زامانی: < 1 دقیقه

اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email
چئویرن: عمران صلاحی
ترجمه: عمران صلاحی
عمران صلاحی
00:00
00:00

بو یازی‌نین صوتی نسخه‌سی حاضرلانماییب. بو یازی‌نی اؤز سسینیزله اوخویوب بیزه گؤندره بیلرسینیز.

باش دئدی کی: بدن عوضولری‌نین هامیسی‌نین یئرینه نییه من دوشونمه‌لی‌یم، باشقا عوضولرین گؤزلری کور اولسون، اؤزلری گئدیب، اؤزلرینه فیکیرلشسینلر.

ال‌لر دئدیلر: بیز ایسته‌ییریک اؤزوموز اوچون ایشله‌یک، باش آغزینا تیکه قویماق ایسته‌ییرسه، اؤزو قویسون. یا طهارت آلماق ایسته‌ییرمیر، آلماسین؛ اؤزو بیلر.

آیاق‌لار دئدیلر کی بیز نییه بیر عؤمور بو یوغون گؤوده‌نی داشیمالی‌ییق؟ بو ایشدن جانا گلمیشیک. بو یوغون گؤوده اولماسا، بیز پیلله‌لری راحاتجاسینا چیخاریق. داغا راحات قالخاریق.؛ اوره‌ییمیز ایسته‌دییی یئره گئده‌ریک.

بیر گون ال‌لر، آیاق‌لار یوغون گؤوده‌نی یئره قویدولار. هره اؤز ایستیقلالینی اعلام ائتدی. آمما قونشولاری یوخ ایدی کی، اونلارین ایستیقلالییتینی رسمییته تانیسین.

البتّه مسله بوردا قورتارمادی، گؤزلر ده دئدیلر کی، بو زای باش هارانی گؤرمک ایسته‌ییر، اؤزو گؤرسون. بیز نییه اونون یوکونو چکمه‎لی‎ییک.

قولاق‌لار دئدیلر کی، بو زای باش نه‌یی ائشیتمک ایسته‌ییر، اؤزو ائشیتسین، بیزه نه بورجودو.

بورون دئدی: بو زای باش نه‌یی ایی‌له‎مک ایسته‌ییر، اؤزو اییله‌سین. بیر گون گؤزلر، قولاق‌لار و بورون باشی بیر بوجاغا بوراخیب گئتدیلر و اؤزلرینی موستقیل اعلام ائتدیلر. توک‌لر ده کی، بو سون دئشیک‌لردن قاباق موستقیل اولموشدولار. ایندی اونلاردان ایز- نیشان یوخ ایدی.

مسله بورادا قورتارمادی، بو آیاق او آیاغا دئدی کی، سن هارا گئدیرسن اؤزون گئت، من نییه سنینله گئتمه‌لی‌یم. ایری‌سین گئت، دوزون گئت؛ هارا گئدیرسن اؤزون گئت. بو ال، او اله دئدی: «سنین اوره‌یین ایسته‌ییر اوتوبوسون توتاجاغیندان یاپیشاسان یاپیش، منه نه! من سندن اطاعت ائتمه‌ملی‌یم». قولاق، قولاغا دئدی کی، سن هر نه‌یه ایسته‌ییرسن تئلویزیونا باخ، من ده ایسته‌ییرم ویدیویا باخام.

بیر گون ده ال الدن، آیاق آیاقدان، گؤز گؤزدن، قولاق قولاقدان آیریلیب، اؤزلرینی موستقیل اعلام ائتدیلر، هره بیر یانا گئتدی.

بیلمیرم واللاه مسله بورادا قورتاردی یا یوخ!

اشتراک گذاری در print
چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

عمران صلاحی

عمران صلاحی

باشقا اثرلری