اوخوماق زامانی: 2 دقیقه

اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email
چئویرن: بؤیوک‌آغا افندی
ترجمه: بؤیوک‌آغا افندی
بؤیوک‌آغا افندی
00:00
00:00

بو یازی‌نین سس فایلی هله حاضیرلانماییبدیر. بو یازی‌نی اؤز سسینیزله اوخویوب بیزه گؤندره بیلرسینیز.

بیزیم بالدیز کوبرا بیر آی بوندان قاباق توی ائله‌ییب گئتدی تهرانا. بو گون خبر وئردیلر کی گؤروش اوچون بیزه گله‌جک‌دیر. انتظار چوخ چکمه‌دی، قاپی دؤیولدو. آرواد دئدی: کوبرا گلدی، قاچین قاپینی آچین!

 قاچدیم قاپینی آچدیم، گؤردوم کوره‌کن تک‌دی!

–   آبالا! هانی بس کوبرا؟

عسگرآقا دئدی:

–  کوبی‌ده کوچه‌ده، همساده‌لرنن دانیشیر، الان گلر.

 هله عسگرآقانی یئر به یئر ائله‌مه‌میشدیم، گؤردوم کوبرا قیشقیریر. تئز قاچدیم قاپییا، گؤردوم کوبرا آستانادا دوروب؛ بیزیمده بیر گؤزه‌ل خوروزوموز وار، اودا دوروب حیطین او باشیندا باخیر قاپییا.

 دئدیم: هه نه اولوب؟ نییه قیشقیریرسان؟ بوردا نییه دورموسان؟

–  سلام عمواوغلی، او خوروز منی قاپوری.

دئدیم: کوبراجان قاپموری، باخوری. اونون کی سندن اییرمی متر فاصله‌سی وار.

من بیر دریندن باخدیم کوبرانین قیافه‌سینه، گؤردوم بیر دودی عینک ووروب، چادرانی‌دا قویوب یئره، دیزینه‌جه‌ده چیرمالانیب؛ اؤزون بیر وضعه سالیب کی، خوروزدا تعجب ائیله‌ییر.

اؤز- اؤزومه دئدیم: ائله خوروزون حاققی وار سنی قاپسین.

–  بویورون، بویورون!

هله گلدیلر ایچرییه؛ خوش- بش اون- بئش‌دن سونرا، بویوردولار:

–  عمو اوغلی، تهرانین خوروزلاری چوخ با ادب‌دیلر. اصلاً آدامی قاپمازلار، سیزین خوروزوز وحشی‌دی،‌ من اوندان بتر قورخورام، گتیرین اونی کساخ.

دئدیم:- کوبرا سن اؤزون بیزیم خوروزو تانییرسان، چوخ ادبلی‌دیر! ناهاراجان بانلاماز کی بیردن، باجین یوخودان دورار، ناراحات اولار. تازا محله اهلی‌ده دئییر بؤیوک‌آغانین خوروزوندان معرفتلی خوروز بو محله‌ده یوخدو. گوناهدی، آللاها خوش گلمز بوجور باشی آشاغا خوروزو کسه سن.

 قوناقلار راحاتلاشدیلار بیلدیر کی من خوروز کسن دئییلم. آرواد ایشی بئله گؤرمک همن، فوری سؤزو عوض ائیله‌دی:

–  عسگرآقا خوش گلیبسیز، نئچه گون بورداسیز؟

عسگر دئدی: واللاه، مرخصیم یوخدو، گره‌ک دوشنبه گونونه‌جن گئداخ.

ائیله کی آروادین اوره‌یی گلدی یئرینه، بیر ایکی دفعه دئدی:

–  آ… بو تئزلیقدا نه خبردی؟ هئچ اولماسا بیر ایکی گون قالین.

 من سوروشدوم:

–  عسگر آقا نه ایش گؤرورسوز؟ هاردا ایشله‌ییرسیز کی، بوجوره تلسیرسیز؟

 کوبرا فوری جاواب وئردی:

–  اصغرآقا بالای شهرده، میدان شوش‌دا، کوپون خرید و فروش ائیله‌ییرلر. قورخوللار تئز گئتمه‌سه‌لر یئرین توتارلار، اورداندا اخراج ایلرلر. اونا گؤره‌ده گره‌ک تئز گئداخ.

هله کوبرانین سؤزو قورتارمامیشدی کی بیزیم اوشاقلارین بیری سوروشدو:

–  بابا، بس نییه کوبرا خالا تهرانا گئدندن کارتونلار کیمی دانیشیر؟

من هله جاواب وئرمه‌میشدیم، آرواد بتردن بیر گؤزلرین آغارتدی. اوشاق فوری ال- ایاغین ییغیشدیردی. بیر اوندا گؤردوم قونشوموز سوره خالا ییرقالانا- ییرقالانا، دانیشا- دانیشا حیطین او باشیندان گلیر.

–  آی بالا گؤزلرین آیدین اولسون. کوچه ده آروادلاردان ائشیتدیم کوبرا خانیم گلیب، دئدیم بیر گئدیم گؤروم. من کوبرانین خاطیرین چوخ ایسته‌رم. تون ‌به تونین قیزلاری بئکاردیلار؛ ییغیشیرلار کوچویه، هره بیر سؤز دئییرلر. بیری دئییر: کوبرا تهرانا گئدنن قیرجانا- قیرجانا دانیشیر، بیری دئییر: کوبرا تهرانا گئدنن قودوخلانا- قودوخلانا یئرییر! دئدیم: سیزی آللاه بوسؤزلری ییغیشدیرین، من چوخ سئوینیرم کی گئدیب تهرانا، قویون گئتسین، بئیه آدام اولدو.

هله سوره خالانین اؤپوش- گؤروشو قورتارمامیشدی کی گؤردوم اییلیب بیزیم آروادین قولاغینا دئییر: آی قیز، اوشاغی وار؟

بیزیم آرواد باشین بیر یوخارییا آتدی.

–  آللاه جان ساغلیغی وئرسین، خداحافظ.

سوره خالا بونو دئییب،کوچه‌یه سوزدو.

او گون کوچه‌ده هامی کوبرادان دانیشیردی. ناهاردان سونرا دربند باشیندا آروادلارین آراسیندا بتر اختلاف دوشموشدو. بیر عده مطمئن‌ایدیلر کوبرانین اوشاغی وار، بیزیم آرواد یالان دئییب، نظرلمه‌سینلر. بیر عده ایکی ایاقلارین گئیمیشدیلر بیر باشماغا کی، دوکتور کوبرایا جاواب ائله‌ییب. بیر عده‌ دئییرلر، کوبرانین اری کوپون آل- وئر ائله‌ییر. بر عده‌ده دئییردیلر اؤزلری ائشیدیبلر کی اونون اری شوشه میدانیندا ایشله‌ییر. بیر نفرده آند ایچیردی‌کی، کوبرانین اری دللک‌دی. بیزیم آرواددا فقط بالای شهردن دانیشیردی. کوبرانین ننه‌سی‌ده بتر ناراحت‌ایدی، قورخوردو بئله گئتسه کوبرانین دیلی یادیندان چیخا. اونا گؤره‌ده کوبرانی یولا سالاندا تئز- تئز دئییردی:

–   بالا موغایات اول، اؤزوندن چیخما، اوزووی ایتیرمه! دیلسیز آدام ننه‌سیز آداما تایدی.

 ماشین یوللاندی، عسگرآقا ایله کوبرا بای- بای ائیله‌ییر‌دیلر. من ده صاباحکی گونلره فیکیرلشیردیم.

اشتراک گذاری در print
چاپ

3 پاسخ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

بؤیوک‌آغا افندی

بؤیوک‌آغا افندی

باشقا اثرلری