بیزیم قونشونون اوشاغی
چئویرن: بؤیوک‌آغا افندی
ترجمه: بؤیوک‌آغا افندی
بؤیوک‌آغا افندی
00:00
00:00

اوشاقلارا یاخچی آد قویماق دده، ننه‌نین بیر وظیفه‌سیدیر. بیز بو وظیفه‌نی یاخچی یئرینه یئتیر‌مه‌سک جامعه‌ده بیر عده یاخچی آد قویانلار وار کی، سونرا بیز قویدوغوموز آدلاری تکمیل‌لشدیره‌جکلر.

دوققوز آیدان سونرا بیزیم قونشونون بیر اوغلو اولدو. اوشاق چوخ گؤزل، دوزلو، اوره‌یه یا‌‌‌‌‌تان بیر کؤرپه‌ایدی. اوشاغین اولما خبری قوهوم- اقریبا، دوست- تانیشا یاییلان کیمی، هره بیر قابلامادان، قازاندان، مجمعی‌دن، چایداندان ووروب قولتوغونا، اوشاغین آتا- آناسینا “گؤزونوز آیدین اولسون”- دئمک قصدی‌ایله، اوز قویدولار اوشاق ائوینه.

اوشاق ائوینده هره بیرسؤز دئییر. آنجاق ایکی سؤز هرسؤزدن آرتیق ائشیدیلیر. بیری اوشاغین کیمه اوخشاماسی و ایکینجیسی‌ایسه آدی‌نین نه اولماسی.

قیزقاییت خانیم هله یئره اوتورمامیشکن سؤزه باشلاییر:

–     آی بالا گؤزلریز آیدین اولسون! اوغلاندی‌دا؟ ماشاللاه، ماشاللاه. آللاه ساخلاسین. نه‌ده گؤزلدی. ائله بیل بیزیم میریشین باشین کسیب، قویموسان بونا.

اوشاغین خالاسی فرصتی فووتا وئرمه‌دن اعتراض ائتدی:

–          وا، گینه من دئسم بیر سؤز، هامی دئییر ائله بیل بیزیم زولفعلی‌نن جوت آلمادی‌لار.

بو آندا قاپی دؤیولدو. بیر خانیم  الینده گؤیوم  میرتدانا، میرتدانا  ایچری گیردی:

–           خالان قوربان اولسون بالا، هیچ گؤر بیزه خبر وئریرلر.

قاپی‌دان ایچری گیرمه‌میش، یوگوروب اوشاغین اوستونه:

–          بالاما قوبان ایلانلار، بالام نه واخت دیل آنلار.

اوچ گونلوک اوشاغی آتیر توتور، اوینادیر. بیر ته‌هر اوشاغی اونون الیندن آلیرلار. باشلاییر سؤزه:

–          آدین خالاسی قویاجاق. محرم دئییب آدین اوروجعلی قویون.

  اوغلانین باجیسی جلد یئردن قالخدی:

–           خالاجان گذشت ائیلیه‌سیزها، بیز تازا آدلاردان قویاجاغیق.

 اؤزونو یاتماغا ووران اوشاق ننه‌سی بو سؤزلری ائشیدن کیمی دیک قالخدی:

–           قوقولی بالام، بالاجا بالام، قوربانین اولوم. کیشد،کیشد. آدین ممیش قویاجاغام بالامین.

اوشاغین دده‌سی بو آد قویما یاریشیندان گئری قالماماق اوچون، میدانا گیردی:

–           آدین اؤزوم قویاجاغام. نه ممیش، نه چپیش، منیم رحمتلیک دده‌مین آدی غضنفر ایدی. دئییرم ائله غضنفر قویون قورتولسون.

هامی‌نین دوداقلاری ساللاندی.

–          غضنفر؟!!

نهایت اوشاغین ننه‌سی سؤزون یئریتدی. اوشاغین آدین ممیش قویدولار.

باشیزی چوخ آغریتماییم. ممیش یاواش- یاواش بؤیویور، چیخیر کوچه‌یه. ‌گئدیر، گلیر. بترده بیر هئیکل سالیب. بیر گون کوچه‌ده او آد قویان دوببه‌لرین بیرینه راست گلیر. آقا سوروشور:

–          بو کیمین قودوقودو؟ آدی نمندی؟

دئییرلر فیلان کسین اوغلودور، آدی‌دا ممیش‌دی. آقا بویورور:

–     بو کی گامیشا چوخ اوخشاییر تا ممیشه. فوری آد قویما اولدو. گامیش ممیش دوشدو آغیزلارا. ممیشین بؤیویوب کیشی اولماغینا باخمایاراق، گامیش لقبی قالدی اوستونده. او ائولنندن سونرادا ممیش‌ آدی یاددان چیخسادا، گامیش لقبی یاددان چیخمادی کی چیخمادی. ممیش، گامیش‌لا ائکیز یاشادی….

اشتراک گذاری در print
چاپ
اوخوماق زامانی: 2 دقیقه
اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email
باشقا اثرلری

بیزیم قونشونون اوشاغی

بؤیوک‌آغا افندی
www.ishiq.net

آذربایجان ادبیات و اینجه‌صنعت سایتی