بوگون دوشنبه 30 فروردین 1400 ساعات 22:57
ایشیق 1
آذربایجان معلم‌لری و تحصیل مساله‌سی
ایشیق 2

آذربایجان قفه‌خانالاری

ایشیق 3

آذربایجان و مهاجرت مساله‌سی

ایشیق 4
آذربایجان توی‌لاری


ایلک آنا دیلی تدریسی
اوستاد  بهزاد بهزادی

  یازین ایکینجی آیی‎نین اورتالاریندا, سحر تئزدن دنیز قیراغینا گزمه‎یه چیخدیم. گور لئیسان یاغیش‎لاریندان سونرا هاوا گونشلی گون اولاجاغی موشتولوقچولاری گورونمکده ایدی.

دان یـئریندن, دنیزین ان اوزاق آرخاسیندان ساری- قیزیلی گونشین ایشیق تئل‎لری یوکسک‎لره قالخماقدا ایدی. دنیز لام و سایخاش ایدی. ایکی قو قوشو آرخایین‎لیقلا سو اوزه‎رینده اوتوروب, دالغا‎لارلا سوزولوردولر. سحرین ائرته‎سی سرین یئل, اوزلری قیدیقلاییردی. گونشین یووارلاق قیرمیزیمتیل یوموروسو, آستاجا- آستاجا, آغیریانا دنیز سویوندان باش قالدیریردی, سانکی آتدیغی زولاقلاردان یاپیشاراق اوزونو چتین‎لیکله گویون یوکسک‎لرینه اوجالدیردی.

نه گوزل گونشلی یاز گونودور!…

واختـیندا گنج معللیم مدرسه‎یه گیردی. بیرینجی گون ایدی کی, ایش یـئری دییشیلیب بو مدرسه‎یه گئدیردی.

گون اورتادان قاباق سونونجو کلاس واختی‎نین زنگی چالیندی. گنج معللیمه دئدیلر کی, بیرینجی کلاسین معللیمی گلمه‎ییب, سیز او کلاسا گئتمه‎لی‎سینیز…

کلاس باشلاندی. اوشاقلار یـئرلرینده توختادیلار. آنا دیلی کیتابی‎نین بیرینجی جیلدینین سونونجو درسی کئچیریلمه‎لی‎ایدی.

گنج اویره‎دیجی درسین باشلیغینی گؤزدن کئچیرتدی: «عزیز آذربایجان»! هیجان بوتون وارلیغینی بورودو, تیتره‎تدی.

ایلک دفه اولاراق آنا دیلینده درس کئچیریردی. درسی اؤته‎ری اوخودو. شعرین ناغاراتی بیر داها گنج معللیمی هیجانا گتیردی:

«یاشا آنام, یاشا وطن, یاشا منیم مسکنیم»!

اوشاقلار دینج و سایـیق ایلشمیشدیلر. آنجاق گؤزلریندن قیغیلجیم یاغیردی. ایتی باخیش‎لاریله گنج اویره‎دیجینی تانیماق ایسته‎ییردیلر.

اویره‎دیجی:- کیتابین سون صحیفه‎سینی آچین. من بیر یول اوخویورام, بیلمه‎دییینیز سوزو یا جومله‎نی سوروشون!

دوغروداندا شعر آنا دیلینده ائله آخیجی, اوره‎یه یاتان و ساده ایدی ‎کی, اوشاقلار سورغو وئرمه‎دیلر. هامی اونو دوشونموشدولر.

معللیم, اؤز- اؤزونه دوشونوردو: بیز ابتدایی کلاسدا اوخویارکن, نه چتین‎لیکلر چکیردیک. (آب, موش, گربه و…) یابانجی سؤزلر ایدی. اونلاری دوشونمک و اؤیرنمک چتین ایدی… اوشاقلار چوخ واخت درسلیک‎لرین آنلامینی آنلامادان یالنیز اونلاری ازبر ائدیردیلر.

ایندیسه آنا دیلینده درسلیگی نه گؤزل باشا  دوشورلر…

گنج معللیم اوجا سس و هیجانلا شعری بیر داها دئکله‌مه ائله‎دی. اوشاقلارین قانی قایناماغا باشلادی. یـئرلرینده قیمیلدانیردیلار…

اویره‎دیجی اوشاقلارا دئدی:

– من شعری سطیر- سطیر اوخویورام، هامی بیرلیکده اوجا سسله و منیم کیمی اونو تیکرار ائدین…

بوتون مدرسه‎نی اوشاقلارین شافراق و اویناق سس‎لری بورودو.

«سن ای منیم آنا یوردوم، عزیز آذربایجانیم

یاشا منیم یوردوم- یووام، یاشا عزیز وطنیم».

ایکی نفر اوشاقلاردان تک‎لیکده شعری دئکله‌مه ائله‎دیلر. اؤیره‎دیجی سوروشدو:

– کیم شعری دؤشدن اوخویا بیلر؟

هامی ال گؤیه قالدیریلدی. بعضی‎لری یـئرلریندن قالخیب، سئوینجله چیغیر- باغیر سالیردیلار:

– من!… آغا من!…

درس ساعاتی باشا چاتدی، اوشاقلار چانتالارینی باغلاییب، قاپی‎دان چیخماغا تله‎سیردیلر…

کوچه‎ده ده اوینایا- اوینایا قاچاراق ائولرینه ساری یوگوروردولر. اویناق یـئریش‎لرله اویغون اوخویوردولار:

«باقرخان تک قهرمانلار، شانلی ستارخانین سنین،

یاشا منیم باغیم- باغچام، یاشا منیم گولشنیم».

گنج معللیمین اوره‎یی اسیردی. ایچینده گولوردو. بئله دوشونوردو کی، بو اوشاقلار ائولرینه چاتجاق چانتالارین بیر بوجاغا بوراخیب، تله‎سیک مطبخه دوغرو گئدیب، قاپی آغزیندا سئوینجک، اوجا سسله شعری دؤشدن اوخوماغا باشلایاجاقلار:

«یاشا آنام، یاشا وطن، یاشا منیم مسکنیم»

آنا دیکه‎له‎جک، اینانمازجاسینا اوغلونو سوزه‎رک، دوداقلاری سئوینج‎دن تیتره‎یه‎جک، اوغلونا ساری آددیملایاراق اللرین دؤشلویه سیلیب، اوغلانجیغـینی باغرینا باسیب اؤپه‎جک… آنانین هیجاندان و شن‎لیکدن یاشارمیش گؤزلرینی خیالن گؤرمک اولار…

٭٭٭

آنجاق بو سئوینج چوخ چکمه‎دی. شاهین باسقینچیلاری، جلادلاری آذربایجانی قانا بلشدیردیلر، آنا دیلینده یازیلان کیتابلاری تونقال‎لاردا توپلاییب یاندیردیلار. اونون آجی توستولریندن، آنالارین گؤزلری قاماشدی، قان آغلادیلار…

گونش یئنه ده پارلایاجاق. او گون گله‎جک کی، آنالارین شیرین و سئومه‎لی لای‎- لای‎لاری درس‎لیک‎لرده سسله‎نه‎جک اوشاقلاریمیز اوره‎ک دولوسو سسله اوخویاجاقلار:

«یاشا، سن ای منیم آنا یوردوم، عزیز آذربایجانیم»!

اوشاقلار آنا دیلینده درس اوخویاجاق، آنالار سئوینه‎جک‎لر!

او گون گله‎جک!

گله‎جک!

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *