چئویرن: ایشیق
ترجمه: ایشیق
ایشیق

اوستاد حسین اسدی آنیلدی
افراسیاب نورالهی

بیلدیینیز کیمی کئچن ایل تخمینا بو واخت، گونئی آذربایجان ساز و تار موسیقی صنعتی آغیر بیر ایتگی وئردی؛ اوستاد حسین اسدی ایتگیسی.
بو آغیر ایتگینین قافیه اوخشاری اولان بیر ائتگیسیده وار؛ بؤیوک بیر ائتگیسی! من اوندان دانیشماق ایسته‌ییرم؛ باخین، اوستاد حسین اسدینین یاشادیغی مقطعی تاریخینی نظرده توتاق؛ هانسی دؤوره تصادف ائدیر؛ هانسی چتین شرایطلرله اوست اوسته دوشور؛ بونلاری بیر گؤزدن کئچیرک. ۱۳۳۷ ه.ش دوغوملو حسین اسدی شاهلیق رژیمی و جوانلیغی‌ایسه انقلابین یاواش یاواش نطفه‌سی باغلاندیغی دؤوره تصادف ائدیر. آشیق قشمین مبارزه و قوجالیق چاغلارینا تصادف ائدیر. آشیق قشمین قوجالیق چاغلاری، یورغان دؤشه‌یه دوشدویو واخت دئدییی بیر سؤزو و او سؤزده یاتان آغیر ساز گونلرینه و ایللرینه تصادف ائدیر، دئییر؛ “منی یورغان دؤشه‌یه قوجالیق، خسته‌لیک دئییل، سازلارین سیندیریلماسی سالدی”!
بلی! حسین اسدینین سازا باشلادیغی ایللر بو واختا، بو آغیر ایللره و بو آغیر گونلره تصادف ائدیر. شعره گلینجه، اوستاد بولود قره‌چورلو، اوستاد شهریار و اوستاد حبیب ساهیره تصادف ائدیر.
نه دئمک ایسته‌ییرم؟!
شاهلیق آسیمیله اویونلاری و سیاستلری قاباغیندا دایانان و صنعت، کولتور و شعریمیزین بایراقدارلاری و مشعلدارلاری ایچریسینده بویلو بویونجا گوروکنلریمیزین ایچریسینده حسین اسدینین اؤز یئری وار.
بو اؤزوموزه قاییدیش و دؤنوشون و دیره‌نیشیمیزین چتین و ائنیشلی یوخشلو مرحله‌سینده، نئجه‌کی شعرده سهند(سازمین سؤزو) واردی، شهریار(حیدربابایا سلام) واردی، سازددا آشیق قشم، آشیق پولاد، آشیق حسین جاوان، آشیق خیراله، آشیق همت، آشیق عبدالعلی، آشیق رسول قربانی، … و بونلارین هامیسینین داوامیندا الهی استعدادیلا سیمبوللاشان، دده‌لشن حسین اسدس واردی.
بلی! بودور حسین اسدینین بؤیوکلویو. بودور حسین اسدینین داهیلییی و بودور حسین اسدینین اعجازی! یوخسا ائله بئله‌سینه حسین‌می اولماق اولاردی؟!
بلی! بو آغیر ایتگی، بو بؤیوک ائتگینین ایتگیسیدی.
دونن آخشام، چرشنبه آخشامی، خرداد آیینین اونو، نیاوران کولتور ائوینده(فرهنگسرای نیاوران)، دولت سویه‌سینده؛ “انجمن موسیقی ایران و بنیاد آفرینشهای هنری ایران”نین همت و دسته‌ییله و عزیز دوستوم بؤیوک شاعیر و آپاریجی و بو تور ادبی و فرهنگی ایشلریمیزین تشببوثکاری سایین خسرو سرتیبی جنابلارینین امه‌یی و دسته‌یی نتیجه‌سینده توتولان تؤره‌ن و آغیرلاما ائله اوستادین آغیرلیغینجا اولدو و لاییقینجه. من فیکیر وئریردیم؛ صحنه‌ده یئر آلان آشیق و موغام موسیقی گروپلارینین هامیسی و تک تک چیخیش ائدنلرین هامیسی اوستادین اؤز شاگردلری و داوامچیلاری‌ایدی بو ایضاحلاکی، حله اوزاقدا اولانلار و یئتیریب بو مراسیمیه گلمه‌ینلرده واردی. آد چکمیرم و آدلارینی سیرالامیرام چونکو قلمدن دوشنلر اولار و یاخجی اولماز. آما بو غرور وئریجی آغیرلاما مراسیمینده بیر داحا اوستادین بؤیوکلویونه باش ایدیم و غرور و افتخار حیسی کئچیردیم. یولو داواملیدی اوستادین و بوندان گؤزه‌ل هئچ نه اولا بیلمیز!

چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

اوستاد حسین اسدی آنیلدی/ افراسیاب نورالهی

ایشیق
www.ishiq.net

آذربایجان ادبیات و اینجه‌صنعت سایتی

اوستاد حسین اسدی آنیلدی/ افراسیاب نورالهی

ایشیق
www.ishiq.net

آذربایجان ادبیات و اینجه‌صنعت سایتی

اوستاد حسین اسدی آنیلدی/ افراسیاب نورالهی

ایشیق
www.ishiq.net

آذربایجان ادبیات و اینجه‌صنعت سایتی