گؤرکملی آذربایجان یازیچیسی «رقیه کبیری‌»نین «مشروطه خانیم» آدلی رومانی ایشیق اوزو گؤردو.
«مشروطه خانیم» رومانی مشروطه انقلابی کانکستینده یازیلیب. حادثه‌لرین مکانی تبریز‌دیر و رمان، تیفلیس سوسیال-دموکراتلاری طرفیندن تبریزه گؤندریلن «نسا» آدلی بیر گنج قادین‌ین باخیش بوجاغی ایله روایت اولونور.
«نسا» ۱۹۰۸-۱۹۰۶ ایللری آراسیندا تبریزده اوز وئره‌ن حادثه‌لر و «غیبی مرکز» آدلی تشکیلاتین گیزلی چالیشمالاریندان یولا چیخاراق، او دؤورده قادینلارین و تبریزه حاکیم اولان سیاسی، اجتماعی، اقتصادی و اینسانی موناسیبت‌لره دقت یئتیریب.
۳۵۶ صحیفه‌لیک «مشروطه خانیم» رومانی «انجمن» آیلیق درگیسی‌نین ۴۱-جی نومره‌سی‌نین ضمیمه‌سی کیمی نشر اولوب. کیتابین دیزاینری وقار خانیم آقایی، رئداکتورو ایسه لاله خانیم جوانشیردیر.
رقیه خانیم کبیری‌نین «مشروطه خانیم» رومانینی ۱۱۰۰۰۰۰ تومن قیمیتینده تبریز شهرینده «اختر» کیتاب ماغازاسیندان و «کافه کتاب شمع‌یوزان» مکانیندان آلماق اولار. عینی حالدا، یازیچینین اؤزویله علاقه‌ساخلاماقلا دا بو کیتابی پوست واسیطه‌سیله الده ائتمک مومکوندور.