چوخ تاسفله، «آیریلماز» تخلوصو ایله تانینان تانینمیش آذربایجان شاعری «یعقوب احمدوند»، بیر نئچه آی سورن خسته‌لیکدن سونرا، مهر آیی‌نین ۲۴-جو گونو ابدی اولاراق حیاتلا وداعلاشدی.
اؤز کسگین و سوسیال مضمونلو شعرلری ایله شؤهرت قازانان «آیریلماز»، ۱۳۳۵-جی ایلده اردبیل شهرینده دونیایا گؤز آچمیش، ابتدایی و اورتا تحصیلینی ده همین شهرده باشا وورموشدو. او، انقلابدان سونرا بیر چوخ آذربایجانلی گنجلر کیمی تهران شهرینه کؤچموشدو. اوزون ایللر تهرانین اطراف شهرجیک‌لرینده، او جومله‌دن: صالح‌آباد، اسلامشهر و ایرینده یاشاماسینا و معیشت چتینلیکلرینه باخمایاراق، یازیب-یاراتماقدان بیر آن بئله ال چکمه‌میش، تهراندا فعالیت گؤسترن «صابر ادبی انجومنی» چرچیوه‌سینده اؤز ادبی فعالیتینی داوام ائتدیرمیشدی.
بیز، «ایشیق» – آذربایجان ادبیات و اینجه‌صنعت سایتی‌نین امکداشلاری، حؤرمتلی قلمداشیمیز یعقوب احمدوند (آیریلماز)ین ایتکیسینی اونون مؤحترم عائله‌سینه، یاخینلارینا، ائله‌جه ده ادبی-مدنی جمعیتیمیزه، خصوصیله ده قارداش «صابر ادبی انجومنی»نین اداره هئیتی و عضولرینه تسلیت دئییر و اونون خاطیره‌سینی عزیزله‌ییریک.
«ایشیق» – آذربایجان ادبیات و اینجه‌صنعت سایتی
۲۵ مهر ۱۴۰۵
