چوخ تاسفله تانینمیش آذربایجان شاعری و ماراغا ادبی محیطینین گؤرکملی سیماسی اوستاد حیدر عباسی(باریشماز) اردیبهشت آیینین ۹-جی گونو یاشادیغی ماراغا شهرینده ۸۳ یاشیندا ایکن وفات ائتمیشدیر.
باریشماز ۱۳۲۲-جی ایل ماراغا شهرینده دوغولموش، تحصیلاتینی بو شهرده و عالی تحصیلینی ایسه تبریز شهرینده انگلیس دیلی و ادبیاتی اوزره بیتیرمیشدیر. آذربایجان ادبیاتیندا ۱۳۶۴-جی ایل اوستاد شیدانین تشبثو ایله ایشیق اوز گؤرن «چاغریلمامیش قوناقلار» و «نغمه داغی و استعمار» عنوانلی شعرلر مجموعهسیله تانینمیش و اؤزونه مخصوص ادبی مؤوقع قازانمیشدیر.
باریشمازین یارادیجیلیق یولونون داوامی سونرالار عرفان ادبیاتینا یؤنهلیر و بو زمینده بیر چوخ کیتابلارین او جوملهدن: «کعبه و قانلی اذان»، «یار و نار»، «گولنده هرزامان»، «مشاعیر و شیطان»، «سس»، «دووارلار»، «اودوملو دیرهک»، «مخنثلر»، «والعصر»، «دارتیلمامیش دنلر» (حیکایهلر)، «نمی از یم» (حضرت علینین صباح دعاسینین ترجمهسی)، «مثنوی مولوی»نین شرحی و «نهجالبلاغه»نین آذربایجان تورکجهسینه ترجمهسی کیمی اثرلرین موللیفی اولور و داها آرتیق عرفان شاعری سیماسیندا آذربایجان ادبیاتیندا و خصوصیله ده ماراغا ادبی محیطینده یازیب یارادیر.
«ادبیات سونلر گروهو» و «ایشیق» سایتی امکداشلاری آدیندان اوستاد باریشمازین ایتگیسینی حؤرمتلی عائلهسینه، سئونلرینه و آذربایجان، ائلهجه ده ماراغا ادبی محیطینه باش ساغلیغی وئریریک. خاطیرهسی عزیز.
۱۰/۰۲/۱۴۰۵
