چوخ تاسفله اورمو عاشیق مکتبی‌نین گؤرکملی نماینده‌سی قوجامان اوستاد «عاشیق محمدحسین دهقان» آذر آیی‌نین بیرینجی گونو حیاتلا ابدی‌لیک وداعلاشمیشدیر.
اوستاد «عاشیق محمدحسین دهقان» ۱۳۱۳-جی ایل اورمونون «بکیشلی» ماحالی‌نین «اییدیر» کندینده آنادان اولموش و یئنی‌یئتمه یاشلاریندان عاشیق صنعتینه ماراق گؤسترمیشدیر. ایلک اوستادی اؤز آناسی «ماه‌جبین» خانیم اولموش، سونرا ایسه عاشیق صنعتی‌نین مکمل سیرلرینی «اوستاد عاشیق فرهاد»دان اؤیرنمیشدیر. سونرالار «عاشیق قیرمیزی باش»، «عاشیق علی»، «عاشیق عباد,، «عاشیق کرم» کیمی اوستادلارین تربیه‌سی آلتیندا اوزون ایللر صرف ائتدیگی امه‌یی بهاسینا بو صنعتین ذیروه‌سینه اوجالمیش و اؤزو ده بیر چوخ شاگیردلر یئتیشدیرمیشدیر.
آذربایجان عاشیق صنعتی‌نین اورمو قولونو و اورمو عاشیقلیق شیوه‌سینی یوکسلدن و اونا ده‌یرلی مدنی اینجی‌لر بخش ائدن «اوستاد عاشیق دهقان»، یئتمیش‌بئش ایل‌لیک صنعت عؤمرونده آذربایجان عاشیق صنعتینه صادق قالمیش و بیر صنعت فداییسی کیمی عؤمرونو بو صنعت خزینه‌سی‌نین زنگینلشمه‌سینه حصر ائتمیشدیر. اونون اؤزونه مخصوص ایفا اوسلوبو اولموش و اوزون ایللر اورمونون گؤرکملی صنعتکارلاری اوستادلار «عاشیق درویش وهاب‌زاده»، «عاشیق اصلان طالبی» و «عاشیق یوسف اوهانس»له برابر، ایران آذربایجانی‌نین غرب حصه‌سینده عاشیق صنعتیمیزین بایراغینی افتخارلا یوکسلتمیشلر.
شؤهرتی سرحدلری آشان و قونشو اؤلکه‌لر او جومله‌دن تورکیه و آذربایجان جمهوری‌لرینده ده چوخ حؤرمتله یاد ائدیلن اوستاد «عاشیق محمدحسین دهقان»ین جنازه‌سی بو گون آذر آیی‌نین بیرینجی گونو، شاگردلری و سئونلری طرفیندن یانیقلی نغمه‌لر صداسی آلتیندا اورمو شهری‌نین «باغ رضوان» مزارلیغیندا تورپاغا تاپشیریلمیشدیر.
«ایشیق»- آذربایجان ادبیات و اینجه‌صنعت سایتی- امکداشلاری آدیندان، «اوستاد عاشیق دهقان»ین ایتگیسینی آذربایجان خالقینا، عاشیق صنعتی اجتماعیاتینا، اوستادین حؤرمتلی عائله‌سینه و سئونلرینه باش ساغلیغی وئریب، خاطیره‌سینی عزیزله‌ییریک.
«ایشیق»- آذربایجان ادبیات و اینجه‌صنعت سایتی
۰۱/۰۹/۱۴۰۴
