چوخ تاسفله یاییلان خبرلر اساسیندا، «ماکی»نین قوجامان شاعری «حامد ماکویی» آبان آیی‌نین ۱۳-جی گونو حیاتلا ابدی‌لیک وداعلاشمیشدیر.
شعرلرینده «حامد ماکویی» تخلص ائدن «میرعلی صادق موسوی» ۱۳۰۸-جی ایل آذربایجانین ماکی شهرینده دونیایا گوز آچیر، اوشاقلیق و گنجلیک ایللرینی بو شهرده کئچیریر و دیپلوم سویه‌سینه کیمی بو شهرده تحصیلاتینی بیتیریر. تحصیلاتی قورتاردیقدان سونرا «ماکی» و «شوط» شهرلرینده معلم‌لیک ائدیر و ۲۲ ایل معلیم‌لیکدن سونرا، ماکی معارف اداره‌سینین مدیری سئچیلیر و نهایت ۱۳۵۸-جی ایل ۳۲ ایل خیدمتدن سونرا تقاعده چیخیر و امک‌لی اولور.
«حامد ماکویی» داها آرتیق آذربایجان کلاسیک شعری نماینده‌لری سیرالاریندا ادبی جمعیتیمیزده تانینیردی. ایندییه کیمی آذربایجان تورکجه‌سینده و فارس دیلینده ۴ اثری ایشیق اوزو گؤروبدور: «حامد ماکویی‌نین غزل‌لری»، «سلام به حیدربابا» (حیدربابانین فارسجا ترجمه‌سی)، «حامد ماکویی‌نین ایکی جیلدلیک غزل‌لری» و «حامد ماکویی‌نین خاطیره‌لری».
ایشیق- آذربایجان ادبیات و اینجه صنعت سایتی آدیندان، قوجامان شاعریمیز «حامد ماکویی»نین ایتگیسینی ادبی جمعیتیمیزه، شاعرین حؤرمتلی عائله‌سی و دوست تانیشلارینا باش ساغلیغی وئریر، خاطیره‌سینی عزیزله‌ییریک.
ایشیق- آذربایجان ادبیات و اینجه صنعت سایتی
۱۵ آبان ۱۴۰۴
