دوکتور محمد رزاقی‌نین «آشیق مسلم‌دن خاطره‌لریم» کیتابی زنگانین «آیدین خزر» انتشاراتی طرفیندن یاییلدی. ۱۸۰ مین تومن قیمتینه ساتیشا بوراخیلان بو کیتاب ۱۳۷۸-جی ایلدن اوستاد عاشیق «مسلم عسگری» ایله دوکتور رزاقی آراسیندا دانیشیق‌لار و خاطیره‌لر اساسیندا حاضیرلانمیشدیر. کیتاب حاقیندا آرتیق معلومات الده ائتمک و اونو سفارش وئرمک اوچون ۰۹۱۲۷۴۲۵۴۷۷ تومره‌لی تلفونلا علاقه ساخلاماق اولار.
کیتابین موللیفی دوکتور محمد رزاقی بئله یازیر:
«آشیق علسگر دئمیش:
آشیق اولوب دیار- دیار گزه‌نین ازل باش‌دان پُر کمالی گرکدیر
اوتوروب دورماقـدا ادبین بیـله معـرفت علمینده دولـو گرکدیر
آشیق اوز خالقی‌نین تاریخینی، کولتورونو، دیلینی جانلی اولاراق، انسانلار ایچینده یاییب آنلادان شخصیت‌دیر. اورمودا آشیق محمدحسین دهقان، تبریزده رحمتلیک آشیق غافار ابراهیمی، آشیق حسن اسکندری، قوم و ساوه‌ده رحمتلیک آشیق مسیح الله رضایی، قیدار- خدابنده‌ده رحمتلیک آشیق یارمحمد و آشیق عرب، خرم‌دره‌ده آشیق گلابعلی داوود بیگی، زنگان و طاریم‌دا آشیق مسلم عسگری بو آشیق شخصیت‌لر ایچینده سایماق اولار. آدلارینی وئردیگیمیز آشیقلارلا یاخیندان گؤروشمه و دوستلوق‌لاریمیز اولموشدور. آدلارینی سایدیغیمیز آشیقلارین یاشاملاری آشیق موسیقی‌سی و تاریخی ایله ایچ- ایچه اولموشدور. بو آشیقلارین حیاتلارینی اؤیره‌نینجه موسیقی تاریخیمیزین ده بعضی بؤلوملرینی اؤیرنمیش اولوروق.
زنگان آشیق موسیقی و ادبیات تاریخینی بیلمک ایچین، شفاهی تاریخ چوخ اهمیّتلی‌دیر. گونوموزه قدر بو موسیقی یئترینجه دیَر گؤرمه‌میش بو سبب‌له یازیلی سند و مکتوبلار چوخ آزدیر. ۱۳۷۹ دا آشیق موسیقی‌سینه باشلایان علاقه‌میز ۱۳۹۷ ایلینده تورکیه‌نین ازمیر شهرینده اولان ائگه (EGE) دانشگاهیندا فوق لیسانس تئزی‌له آکادمیک بیر چالیشما ایله نتیجه آلدی. بو تئز ده ایران و زنگان آشیق مکتبلرینی تانیتیب، علمی بیر متودلا آشیق موسیقی‌سی و ادبیاتی‌نی شفاهی شکیلدن یازیلی قالیبه داشیدیق. مکتوبلاشان آشیق صنعتیمیزین شفاهی تاریخی بؤلومو خاطیره‌لر قالبینده یازیلیب قورونمالی ایدی. اوستاد آشیق مسلم عسگری ایله ۱۳۷۸دن باشلایان بیر دوستلوق و ائشیتدیگیم خاطیره‌لر زنگان آشیق تاریخی‌نین یازیلمامیش بیر پارچاسی‌دیر.
1396 شمسی ایلی‌نین سون آیی حاجی مُسلم ولیعصر بیماریستانیندا بستری اولدو. بیر نئچه گون کُمادا قالان، اوستاد مُسلم عسگری شکرلر اولسون یئنی‌دن ساغلیغینا قاییتدی. بو دؤنمده خاطیرلادیغیم بوتون خاطیره‌لری یازماغا نیت ائتدیم. بو خاطیره‌لرده امانته صاحب چیخماق ایچین، اولدوغو کیمی یازیلدی. بو خاطیره‌لری اوخویونجا بیر صنعت ایل‌لر بویو نئجه محافظه آلتینا آلینیب، یاشانماسینی گؤره‌جکسیز.
زامان و امکان اولسا آیری آشیق‌لاریمیزین دا خاطیره‌لرینی ائشیدیب، یازما چوخ فایدالی بیر ایش اولاجاقدیر. هله‌لیک اوستاد آشیق مسلم عسگری‌دن ائشیتدیگیم خاطیره‌لری، موسیقی سئور انسانلاریمیزا تقدیم ائدیرم.»
دکتر محمد رزاقی
استانبول ۲۰۲۵
ایشیق
چئویرن: ایشیق
ترجمه: ایشیق
سسلندیرن: ایشیق
- خبر
- اوخوماق زامانی: 2 دقیقه
- https://ishiq.net/?p=37292
چاپ
