«قادین اثرلری کیتاب‌ائوی» قورومونون داخلی درگیسی عنوانیندا حاضیرلانان «یاز» درگیسی‌نین بیرینجی سایی ایشیق اوزو گؤردو.
بیر ایل بوندان اول «ائل بیلیمی موسسه‌سی»نین نزدینده یارادیلیب، اؤز فعالیتینه باشلایان «قادین اثرلری کیتاب‌ائوی»قورومو، آذربایجان قادینلارینین اثرلرینه حصر اولونموش ایلک تخصصی کیتابخانادیر. بو کیتابخانادا قادین موضوعلاری ایله باغلی و قادین یازارلار طرفیندن یازیلمیش اثرلر توپلانمیشدیر.
«یاز» درگیسی‌نین ایلک ساییندا مختلف بؤلوملر او جومله‌دن: حکایه، شعر، ترجمه، تنقید، اوشاق ادبیاتی، کیتاب تقدیماتی و قورومون سس کارگاهی‌نین فعالیتلری کیمی بؤلوملر یئر آلیر.
درگینین باش یازاری آذربایجانین تانینمیش یازیچیسی خانیم «فرانک فرید»دیر.
«ایشیق سایتی» امکداشلاری آدیندان «قادین اثرلری کیتاب‌ائوی» و «ائل بیلیمی موسسه‌سی» نین اداره هئیت‌لرینه، خصوصیله ده حؤرمتلی فرانک خانیم فرید و امکداشلارینا، ائله‌جه ده جناب علیرضا صرافی‌یه تبریک دئییر، اونلارا داهادا اوغورلار آرزو ائدیریک