چوخ تاسفله، آذربایجانین قوجامان صنعتکاری، گؤرکملی بالابان اوستاسی «ماشاالله اکبری» مرداد آیی‌نین 21نجی گونو ۹۳ یاشیندا یاشادیغی تبریز شهرینده وفات ائتمیشدیر.
اوستاد ماشاالله اکبری عؤمور بویو آذربایجان عاشیق صنعتی‌نین انکشافیندا الیندن گلنی اسیرگمه‌میش، آذربایجان و ایرانین مختلف بؤلگه و شهرلرینده اوغورلو ایفالاری ایله برابر دونیانین بیر چوخ اؤلکه‌لرینده‌ده تقدیره لاییق چیخیشلار ائدیب و مختلف مکافاتلار الده ائتمیشدیر.
اونودولماز صنعتکار اوستاد ماشاالله اکبری صنعت عؤمرونون بؤیوک بیر حصه‌سینی گؤرکملی آذربایجان عاشیقی اوستاد عاشیق حسن اسکندری‌نین بالابانچیسی کیمی اونونلا داواملی یولداشلیق و امکداشلیق ائتمیش و بؤیوک خالق رغبتینی قازانان آذربایجان صنعتکارلاریندان اولموشدور.
ایشیق – آذربایجان ادبیات و اینجه صنعت سایتی- امکداشلاری آدیندان قوجامان صنعتکار «ماشاالله اکبری»نین وفاتینی اوستادین حؤرمتلی عائله‌سینه، صنعت یولداشلاری و دوستلارینا، ائله‌جه‌ده آذربایجان عاشیقلار بیرلیگینه باش ساغلیغی وئریر، خاطیره‌سینی عزیزله‌ییریک.

ایشیق – آذربایجان ادبیات و اینجه صنعت سایتی
23/05/1403