چوخ تاسفله قاراداغ ادبی محیطینین تانینمیش صنتعتکاری ولی شاهمحمدی (گولدورلی ولی) خرداد آیینین 26نجی گونو آدینا آخشامی، تهرانین امام حسین خستهخاناسیندا حیاتا گؤز یومموشدور.
«گولدورلی ولی» تخلص ائدهن شاعر ولی شاهمحمدی 1334نجی ایل قاراداغین گولدور کندینده دونیایا گؤز آچمیش، بیر چوخ آذربایجانلیلار کیمی گنجلیک یاشلاریندان تهرانا کؤچموش و عؤمرونون سونونا قدهر بو شهرده بینا بویاچیلیغی ایشینده مشغول اولموشدور.
شاعر گولدورلی ولی تهراندا فعالیت گؤسترن آذربایجان ادبی مدنی درنکلرینین فعال اشتراکچیلاریندان و ادبی فعالیتی داها آرتیق «صابر» و «قاراداغ» ادبی انجومنلرینده اولموش و بیر نئچه ایل صابر ادبی انجومنینین اداره هیاتینده چالیشمیش و اوزون ایللر همن انجومنین موسیقی بؤلومونون مسئولی کیمی فعالیت ائتمیشدیر.
گولدورلی ولینین ایندییه قدهر «آغلی داغ»، «قارتال قایناغی»،«حسرت گوزگوسو»، «لامپاسیز اوتاق» و «دیوان گولدورلی ولی» آدلاریندا بئش شعر توپلوسو نشر ائدیلمیش، بیر چوخ شعرلری ایسه هلهلیک ایشیق اوزو گؤرمهمیشدیر.
شاعر گولدورلی ولینین جنازهسی آدینا گونو خرداد آیینین 27نجی گونو سحر چاغی ساعات ۱۰ تهرانین بهشت زهرا مزارلیغیندا تورپاغا تاپشیریلاجاق و همن گون آخشام اوستو ساعات 18دن ۳۰/۱۹ قدهر آشاغیداکی عنواندا وداع مراسیمی کئچیریلهجک:
تهران- خیابان گرگان شمالی- ایستگاه روشنایی – مسجد اراکیها
«ایشیق» – آذربایجان ادبیات و اینجهصنعت سایتی – امکداشلاری آدیندان حؤرمتلی آذربایجان شاعری گولدورلی ولینین ایتگیسینی ادبی جمعیتیمیزه، اونون مؤحترم عائله عضولری و قوهوم اقرباسینا، صابر و قاراداغ ادبی انجومنلرینین اداره هیاتی و عضولرینه تسلیت دئییر و زحمتکش شاعریمیزین خاطیرهسینی عزیزلهییریک.
«ایشیق» – آذربایجان ادبیات و اینجهصنعت سایتی
26/3/1401
