آلدیغیمیز آجی خبر اساسیندا تانینمیش یازیچی، شاعیر، مترجم، ژورنالیست مژگان خانیم صیامی حیاتا گؤز یوموب بیزدن آیریلدی.
مژگان صیامی ۱۳۵۳اینجی ایلده، اولو ساوالانین قوجاغیندا یئرلشن(اردبیل) شهرینده دونیایا گؤز آچدی. آتاسی ارتش حکیمی ایدی؛ ایلک تحصیلاتی و اورتا مکتبین (جهان تربیت) مکتبینده بیتیریب، اؤزو دئمیشکن، ائله او زاماندان اؤزونده بیر سیرا عجیب و بلکه غیرعادی دویغولار – دوشونجه‌لرله یاشاییردی؛ عادی حیات ایله سویو بیر آرخا گئتمه‌ییردی. انسانی علم‌لر رشته‌سینه علاقه‌سی اولاراق، دیپلم آلان چاغی، ائله همن ایل کنکوردا ایکی تحصیلی رشته‌دن قبول اولور (ادبیات و روانشناسی). اردبیل دانشگاهیندا عالی تحصیلاتین باشلاییب، ادبیات اوخویوب لیسانسین آلیر! یوکسک لیسانسین پیام نور دانشگاهیندا اوخوماق ایسترکن، حیات یولداشی اونون اجتماعی – مدنی ایشلرینه مانع یاراتدیغی اوچون آیریلماق مجبوریتینده قالیر .خانیم صیامی ائله او ایللرده مختلف دبیرستانلاردا ادبیات – تاریخ ادبیات – دستور و نگارش اویرتمنی اولوب، آزاد فیکرینه گوره، قارانلیق یئره (بلی – خیر – چشم و…) دئمه‌دیگینه و آموزش – پرورش طرزینه اعتراض ائتدیگینه گوره، اوچ ایلدن آرتیق سئودیگی ایشه دوام وئره بیلمه‌ییب، استعفا وئریر. مژگان خانیمین ده‌یرلی یازی‌لاری (داستان – شعر – طنز – مقاله و…) او زامان اؤنملی نشریه‌لرده چاپ اولوردو. او جمله‌دن: (آزما – آدینه – گل آقا – شهروند – ایران دخت و…)
خانیم صیامی ۱۳۸۵ اینجی ایلده (سارای) درگیسی‌نین امتیازین آلیر. گئجه – گوندوز بیر آن دایانماندان، دورمادان شرفلی، ائل سئور، وطن سئور، آزاد، باش اوجا یاشایان بیر ژورنالیست کیمی چالیشماغا باشلاییر. آزادلیق اوغروندا چالیشان مژگان خانیم ائل دردین، وطن دردین، یاشادیغی یوردون قارا گونلرین، عذابلی گونلرین یازیر .او سارای درگیسین اؤزونه چؤرک آغاجی گؤرمه‌ییب. سارای ایکی دفعه توقیف مرحله‌سینه یئتیشیر.
خانیم صیامی‌نین ادبی کارنامه‌سینه اؤتری بیر گؤز دولاندیرساق اونون چکدیگی زحمتلر داها آیدینلاشاجاق.
۱-سارای درگیسینی ۴۵ سایی چیخاریب، بیر کیتاب (سون سکانس) آدیندا ۱۵ دنه تورکی حئکایه‌لری، ۵ جلد (اردبیل نامه) اوندان ایشیق اوزو گؤروب. اشک سبلان، ابراهیم دارابی جنابلارینین رمانین تورکجه‌یه چئویریب (ساوالانین گؤز یاشی) چاپا یئتیرییب. (قربانیان بند نسوان) زنداندا یازدیغی کیتابی کئچن ایللرده ایشیق اوزو گؤروب، مردگان باغ سبز، محمد رضا بایرامی جنابلارینین رمانین، تورکجه‌یه چئویریب (یاشیل مئشه‌نین اؤلولری) سون ایشلریندندیر. (مجموعه شعرهای فارسی)، (مقاله‌لر توپلوسو) و تورکی شعر – طنز و… خانیم صیامی‌نین کارنامه‌سین ایشقلاندیریر. چتین عذابلی گونلرین ژورنالیستی توتدوغو یولون هزینه‌لرینه ده معروض قالیر، آغیر تاوان‌لار وئریر! خانیم صیامی اجتماعی مدنی ادبی چالیشمالارینا گوره دفعه‌لر ایله زیندانا گئدیب، وثیقه ایله آزادلیغا بوراخیلیب. مژگان خانیم آذربایجانین و اردبیل ماحالی‌نین گؤرکملی – آدلی – سانلی (آزاد بیر ژورنالیست، شاعر و یازار) کیمی ائل آراسیندا تانینیر. آذربایجانین قارتال قانادلی شاعری رحمتلیک هاشم ترلان دئمیشکن: «آصلانین ائرکک دیشیسی یوخدور، آصلان آصلاندیر.»
ادبیات سئونلر بو آجی دردلی آیریلیغی صیامی عایله‌لرینه، ادبیات سئونلره، خانیم صیامی‌نین قلمداشلارینا، شهرداشلارینا، باش اوجا قادین ادبیاتی‌نین یازارلارینا باش ساغلیغی وئریر.