پنجشنبه فروردین آیی‌نین ۱۰-جو گونو ائل‌بیلیمی‌نین ایل‌لیک بایرام گؤروشو سوسن خانیم نواده رضی‌نین خاطیره گئجه‌سی اولاراق کئچیریلدی، دئمک سوسن‌سیز ایلین باشلانغیجیندا سوسنلی بیر گئجه کئچیریلدی.
شهریمیزین فرهنگی-اجتماعی فعال‌لارینین حضورو ایله کئچیریلن بو مراسیمده آقای «مهندس صرافی» و «خانیم آبدار» مجلیسین هیئت مدیره‌سی و جناب «کریم قربانزاده» آپاریجی ایدیلر. ساعت ۱۷:۴۵ ده موسسه‌نین مدیرعاملی جناب صرافی اوتورومو رسما آچدیلار.
بیرینجی دانیشان ائل بیلیمی موسسه‌سینین قوروجولار هئیتی‌نین عضوو خانیم زهرا آبدار ایدیلر، اونلار سوسن خانیملا تانیشلیغی و سوردوگو یولداشلیق ایل‌لریندن دانیشدیلار.
ایکینجی «لادن نواده رضی» سوسن خانیمین عایله‌سی طرفیندن تریبون آرخاسینا چاغریلدیلار، مجلیسین قوروجولاریندان تشکر ائدیب، سوسن خانیم حقینده دانیشدیلار و اونون عایله ایچینده اولان کاریزماسی، ده‌یرلری و ائتگیسیندن سؤز آچدیلار.
اوچونجو دانیشان اولاراق سؤز سوسن‌ین یاخین دوستو و امکداشی «گونش امانی»یه وئریلدی. گونش خانیم اونون اخلاقی خصوصیت‌لریندن اطرافلی دانیشدیلار.
دؤردونجو دانیشانیمیز مشکین‌شهردن آیاغی‌نین توزویلا مجلیسیمیزه گلن «تانسو خیاوی» سوسن نوادﮤرضی‌نین امکداشی اولدولار، کی مهدن تمدن گونده‌لیگی‌نین تورکجه سانجاق آدلی صفحه‌سی‌یله ایلگیلی چالیشمالاریندان دانیشدیلار و قوناقلاری بیلگیلندیردیلر.
سونرا «مرجان منافزاده» تریبونا دعوت اولوب، باش ساغلیغی وئریب، سوسن خانیمین دونیاسین ده‌ییشدیگی مناسبته یازدیغی شعری اوخودولار.
سیرادا تریبونا دعوت اولونان شهریمیزین بؤیوک مجموعه‌داری «رضا سرابی‌اقدم» سوسن نواده‌ی رضی‌نین مشاغل موزه‌سی‌نین قورولوشوندا چکدیگی زحمتلردن و ائتدیگی یاردیملاردان، هابئله چتینلیگه دوشدوگو زامان آرخا چیخیب، یاردیم توپلامالاریندان دانیشیب، خاطیره‌سین حؤرمتله یاد ائتدیلر.
دالیسینجا گؤزل دیکلمه‌لری‌یله تانینان مخمل سسلی «کبری میرحسینی» سوسن‌ین «قیریق سطیرلر» عنوانلی شعرینی دیکلمه ائتدیلر.
سونرا «فرانک فرید» «اننه‌م‌نن من» کیتابینا نظر سالاراق «اونون قادین جسارتی» مضمونوندا گؤزه‌ل و ده‌یرلی صؤحبتلر ائتدیلر.
نوبتی دانیشان «اولکر تبریزلی» ایدی. او تریبون آرخاسینا کئچیب، سوسن‌ین «ابدیت» عنوانلی گؤزل شعرینی اوخودوقدان سونرا، اؤز دویغولارینی دیله گتیردی.
بو اثنادا اذان وقتی چاتدی و قیسا بیر آرا وئریلیب، ائل‌بیلیمی مؤسسه‌سی‌نین حاضیرلادیغی افطارلیق قوناقلارا سونولدو.
افطاردان سونرا مراسیمین ایکینجی بؤلومو «سیدمحمد چاوشیان» جنابلاری‌نین صؤحبتلری ایله باشلادی، او سوسن خانیمین اوچ اؤنملی خصوصیتی اولان (کاریزما و مدیریت و عمومی روابط)یندن دانیشدی.
کرج شهریندن قوناغیمیز اولان یازیچی «اکبر حمیدی علیار» باش ساغلیغی وئردیکدن سونرا، سوسن ایله بیرگه چالیشمالاریندان و سانجاق صحیفه‌سین یولا سالمالاریندان، شعرلشمه‌لریندن دانیشیب، نمونه اولاراق اونون بیر شعرینی اوخودولار.
ان سوندا جناب «فؤاد حسن حسین» سوسن خانیمین ده‌یرلی اوغلو مجلیسین قوروجولاریندان و اشتراکچی‌لاریندان تشکر ائدیب، سوسن خانیمین آرشیوی و کیتابلارینی مهندس صرافی‌نین قوردوغو کیتابخانا و آراشدیرما مرکزینه اهدا ائتدیک‌لریندن و یاخین گله‌جکده اونلاری سهمانا سالیب، نشر ائتمه‌لریندن سؤز آچاراق بو ایشده داوطلب‌لری یاردیما چاغیردیلار.
قید ائتمک لازمدیر کی اؤنجه‌دن حاضیرلیقلارین بیلدیرن و دانیشانلار آراسیندا هئیت مدیره‌‌نین لیسته آلینانلاری تریبون آرخاسینا چاغریلدیلار، بیر چوخلاری دا سوسن خانیم حقینده دانیشیب، شعر اوخوماق ایستردیلر؛ آنجاق اؤنجه‌دن بونو بیلمه‌دیگیمیز اوچون هم‌ده وقت محدودیتینه گؤره بو عزیزلری چاغیرماقدان معذور اولدوق. وقتین محدودیّتینه گؤره بونلارین سایی ان اوزاق باشی ۱۲ نفر نظرده توتولموشدو.
دانیشیقلارین سونوندا ائل‌بیلیمی طرفیندن بو مجلیسده اوره‌ک سؤزلرین یازی‌یا شعر واسیطه‌سی‌یله اوخویانلاردان هابئله کلیپی ایشله‌ینلر و موسیقی اکیپیندن تقدیرنامه ایله تجلیل اولوندو.
اؤزل اولارق دکتر «میکائیل نظری»نین سون وقتلر سوسن خانیم حقده چکدیگی زحمتلردن خصوصی‌‌یله اونون دفن مراسیمینده ده‌یرلی مدیریتیندن تشکر اولوندو.
دکتر «ارگین افشار» و «ذکیه خانم ذوالفقاری»، اؤز وقتلرینی قالان دوستلارا باغیشلادیقلاری اوچون آلقیشلاندیلار.
«علیرضا فرشی» و «سولماز حسن‌پور» «آذربایجانی سئون قادین‌لار» آدینا سوسن‌ین احسانیندا اؤز وصیتی اوزره زنجانین «مهرانه خیریه‌سی»نه سوندوقلارینا بلگه‌سل تابلونو سوندولار و اولو روحونا رحمت دیله‌دیلر و وطن سئوگی‌سیندن، ائل سئوگی‌سیندن دانیشیب، دئدیلر سوسن خانیمی سئوگی هیکلی کیمی گؤروبموشلر.
بو قیسمتده سوسن اوچون حاضیرلانمیش ۹ دقیقه‌لیک بیر کلیپ تماشایا قویولدو.
سون اولاراق موسیقی اکیپی صحنه‌یه گلدیلر و «آراز قاسمی» سازدا آتاسی «محمدرضا قاسمی» ایله اشتراکچی‌لاری ماهوردا چالینان بیر ماهنی‌یا قوناق ائله‌دیلر.
سونرا تاردا آراز قاسمی، کامانچادا «رضا محمدی» و ناغارادا «فرزاد سلیمانی» خواننده‌میز: آقای محمدرضا قاسمی‌نی مشایعت ائدیردیلر. ائل بیلیمی‌نین اوشاقلیقدان بری برنامه‌لرینده اشتراک ائده‌ن، «آلتای خدایی» ده بایات شیراز دستگاهیندا همین اکیپین مشایعتی ایله اوخودولار.
موسیقی قوروپونا تشکر اولاراق سوسن خانیمین کیتاب‌لاریندان هدیه اولوندو.
مراسیمین زمانلاماسینا گلدیکده دئمه‌لییم کی برنامه اوچ ساعت نظرده توتولموشدو، تکجه یاریم ساعت اوزونا چکدی کی اونون دا ۱۵ دقیقه‌سی اونون گئج باشلانماسینا عاید ایدی و بیر ربعو دا موسیقی بؤلومونه اضافه اختصاص وئریلدیگینه. بئله‌لیکله مراسیم جناب قربانزاده‌نین آپاریجیلیغی و ده‌یرلی مدیریتی ایله اوچ ساعت یاریمدان سونرا ساعت ۲۱-ده سونا چاتیب رسما باغلاندی.
مراسیمه آیریلمیش زامانین تقریبا اوچده ایکیسی دانیشیقلارا و اوچدن بیری ده موسیقی، فیلم، تقدیرنامه‌لرین تقدیمینه اختصاص وئریلدی.
قید ائتمک لازمدیر کی بو مجلیسه ایکی یوز نفره یاخین شخصیتلریمیزدن قاتیلدیلار، بایرام گؤروشو اولدوغو اوچون بعضی‌لری تکجه محدود بیر فاصله‌ده اوتوروب، یئرلرینی باشقا قوناقلارا وئردیلر. آشاغیدا گؤروب تانیش اولدوغوم بعضی‌لرینین آدینی قید ائدیرم:
سوسن خانیمین عایله‌سیندن: لادن خانیم نواده رضی، جنابلار فریدون و فرخ نخجوانی، فوآد و عطا حسن حسین و ….
باشقا شهرلردن قاتیلان: مسعود فیوضات، تانسو خیاوی، اکبر حمیدی علیار و ذکیه ذوالفقاری و لیلا خانیم، علیرضا فرشی و ….
پنجشنبه – ۱۴۰۲/۱/۱۰
مراسیمین شکیل‌لری
یک پاسخ
عزیز سوسن خانیمین روحو شاد، یولو داواملی اولسون.
زحمتلریزدن تشککور ائدیرم.