“آراز باری” کیتابی‌نین تقدیمات مراسیمی کئچیریلدی
شهریور آیی‌نین بیرینجی هفته‌سینده معاصرآذربايجانلي شاعره سونا ولي‌يئوانين “آرازباري” آدلي شعر کتابي‌نين ايران چاپي‌نين تقديمات مراسمي اورميا شهرينده حوزه‌ی‌هنري مدنيت اداره‌سي‌نين ادبي شعبه‌سي تشبثو ايله کئچيريلدي. بو ادبي تدبيرده 40- دان چوخ اورميالي شاعر و تنقيدچي اشتراک ائتميشدي. حوزه‌ی هنري ادبي شعبه کاتيبي، دنيز قزئتي و دنيزنیوز سايتي‌نين باش‌رئداکتورو شاعر و يازيچي مصطفی قولوزاده تدبيرين آچيليشيندا سونا خانيم ولي‌يئواني چاغداش آذربايجان شعرينده متفکر و اجتماعي بير شاعر تانيتديردي.
بو مراسیمده اورميالي تانينميش شاعر حميد واحدي ده اؤز فکرلريني ادبيات نؤقطه‌يي‌نظريندن سؤيله‌دي و سونا خانيمين شعرلرينده اولان ميللي حيسلري چوخ گوجلو و آلقيشا لاييق بيلدي. تدبيرده ديگر اشتراک ائدن شاعر و یازیچیلاردان رؤيا شاه‌حسين‌زاده، محمود شامي، زهرا کريم‌زادگان، علي شجاع، قنبر حاجيوند، خليل شيخلي، اسماعيل مد‌دي، شاهروخ رضواني، علي رزم‌آرا بو موناسیبتله اؤز رای و نظرلرینی سونا ولي‌يئوا و کیتابی حقینده سؤیله‌دیلر. تهراندان تلفون باغلانتيسي ايلا تدبيره قاتيلان اكبر عليار دا سونا خانيمي آذربايجان ادبي محيطينده تانينميش و سئويلميش بير شاعر آدلانديراراق – منجه بئله-بئله اثرلرين نشري ايران آذربايجاني چاغداش ادبياتي‌نين انكشافي اوغروندا يارارلي اولاجاق- دئدي و ايكي اؤلكه‌نين شاعرلري و يازيچي‌لاري‌نين قارشيليقلي اولاراق ادبي تشكيلاتلار طرفيندن بيري‌بيرينه تانيتديرماغي اوميد ائتدي.
اورميانين گؤرکملي صنعتکاري آشيق ناباتعلي عليزاده ده بو مراسمده سونا ولي‌يئوانين آرازباري کتابيندن ايکي شعري سازي‌ايلا اوخودو و مراسم اشتراکچيلاري‌نين ماراغيني قازاندي.
مراسمين سونوندا آرازباري كتابي‌نين ايران نشري و سونا خانيمين ياراديجيليغي حاقدا حاضرلانميش ويدئو ديسكئتي اشتراكچيلارا هديه ائديلدي.
قيد ائدک کي، سونا ولي‌يئوانين آرازباري کتابي بو ايل ايرانلي شاعر اکبر حميدي عليارين واسطه‌سي ايله اسکي اليفبايا کؤچورلوب و قوم- تهران شهرلرينده فعاليت گؤسترن آواي منجي نشرياتي طرفيندن نشر ائديليب.