تبریزین قوجامان شاعری “نجاراوغلو”دا حیاتا گؤز یومدو

الیمیزه چاتان خبره اساسن تبریزین قوجامان ساتیریک شاعری علی عطائیه (نجاراوغلو) بو گون تیر آیی‌نین دوققوزونجو گونو ۸۲ یاشیندا‌ایکن ابدی اولاراق حیاتا گؤز یومموشدور.
آذربایجانین شیرین دیل اوستاد شاعری ۱۳۱۱ینجی ایل تبریزین حؤکم‌آوار محله‌سینده دونیایا گؤز آچمیش و آذربایجانین چوخ تمکینلی، زحمتکش و طناز صنعتکارلاریندان اولموشدور.
نجار اوغلو یارادیجیلیغی‌نین چیچکلنمه دؤرو انقلابدان سونرا باشلاییر و اثرلری “دده قورقود”، “جوالدوز”، “فروغ آزادی”، “آذربایجان”، “فجر آذربایجان” و … سایر دؤرو مطبوعاتدا نشر ائدیلمیشدیر. بوندان علاوه اوستادین ساتیریک اثرلرینی احتوا ائدن بئش جیلدلیک “نجاراوغلو” عنوانلی شعر مجموعه‌سی، قات- قاریشیق شعرلر مجموعه‌سی و حؤکم‌آوار محلله‌سی‌نین تاریخی دورومو و شخصیتلری باره‌ده حاضیرلادیغی نثر اثری‌ده ایشیق اوزو گؤرموشدور.
بیز “ایشیق” -آذربایجان ادبیات و اینجه‌صنعت سایتی- امکداشلاری آدیندان بو ایتگینی خالقیمیزا، حؤرمتلی نجاراوغلو عائیله‌سینه و ادبی جمعیتیمیزه باش ساغلیغی وئریر و اوستادین شرفلی خاطیره‌سینی عزیزله‌ییریک. (۹ تیر ۱۳۹۳)

***
دقت:
اوستادین جنازه‌سی مسئول اداره‌لردن اجازه آلدیقدان سونرا، تبریز شهرینین صنعتکارلار مزارلیغیندا (قطعه هنرمندان) تورپاغا تاپشیریلاجاقدیر.

سون خبر:

اوستاد نجاراوغلونون جنازه‌سی سه‌شنبه گونو (۱۰ تیر) ساعات ۱۰/۳۰ تبریزین وادی رحمت مزارلیغیندا تورپاغا تاپشیریلاجاقدیر.