ایشیق 1
آذربایجان معلم‌لری و تحصیل مساله‌سی
ایشیق 2

آذربایجان قفه‌خانالاری

ایشیق 3

آذربایجان و مهاجرت مساله‌سی

ایشیق 4
آذربایجان توی‌لاری

sabir
صابر ادبی انجومنی‌نین نوبتی تدبیرینده اوستاد مفتون امینی‌ده اشتراک ائده‌جکدیر

“صابر ادبی انجومنی”نین نوبتی شعر و موسیقی آخشامی چرشنبه گونو بهمن آیی‌نین 30یندا “دختران” مدنیت ساراییندا کئچیریله‌جک. انجومنی‌نین عمومی علاقه‌لر مسئولو (کریم قربان‌زاده)نین ایشیق سایتینا گؤندردیگی معلوماتا اساسن بو شعر و موسیقی آخشامیندا تانینمیش فارس و آذربایجان شاعری اوستاد مفتون امینی‌ده اشتراک ائده‌جکدیر. اونون یازدیغینا گؤره:
یدالله امینی، مفتون تخلوص‌لو شاعیریمیز 1305 اینجی ایلده سایین‌قالانین هولاسو قصبه‌سینده طبیعت یام یاشیل گئیینن، چایلار خارهاخار آخان زامان حیاتا گؤز. عؤمرونون دادلی دوزلو گونلرین، گؤزل‌لر گؤزلی کولک‌لی تبریز شه‌هرینده سورن شاعیر 1325ینجی ایل فردوسی مدرسه‌سینده اورتا مکتبی، 1328ده تهران دانیشگاهیندا حقوق رشته‌سینی بیتیریر. کؤوره‌ک بولودلاردان اینجه خیاللی شاعیر سونرالار عدلیه ایشچی‌سی اولور. 1350ینجی ایلده داش ترازیسی پاسلانمیش عدلیه مفتونون شعرلرینده سیاسی آنلام اولدوغو اوچون اونو ایشدن بوراخیر. 1336 دان 1357دک مفتوندان 5 کیتاب ایشیق اوزو گؤرور. دریاچه، کولاک، انارستان، نهنگ یا موج.
یوردا باغلی‌لیق، ائله، کؤکه باغلی‌لیق هر اینسانین هر شاعیرین بؤیوک بیر شخصیت حیصه‌سی‌ اولدوغو کیمی، مفتون امینی‌نیده آنا دیلینده شعرلر دئمگه یؤنلدیر. وطن وورغونو، ائل وورغونو مفتوندان، 57ینجی ایلین شاختا وورموش گونلرینده، 29 بهمن کول آلتیندان کؤزه‌رن گونلرینده “عاشیقلی کروان” آدلی آذربایجانجا شعرلر مجموعه‌سی نشره بوراخیلیر و شاعرین ایستی بیر نفسی و گور بیر سسی کیمی ایشیق اوزوگؤرور. بیر شعرینده اوخویوروق:
غمین قربانی تبریز، یئللی تبریز
آلاولی، ایلدیریملی سئللی تبریز
نه قانلار قایناییب سندن، اولوب داش
ائل نغمه‌لرینین ترنومی، آذربایجان روحونو داشیان اودلو، آلوولو شعرلر عاشیقلی کروانی دیل‌دن ‌دیله سالیر. مفتون امینی 1359دا عدلیه‌دن تقاعده چیخیر.
1358دن بو گونه‌جه آدلیم شاعیریمیزدن 7 کیتابدا یاییلیب. بو گونلر کیتاب عایله‌سی‌نین گؤزو یولدا، قولاغی سس‌ده‌دیر کی اوستادین 15 ایللیک شهریارلا باغلی خاطیره‌لرینی، عاشیقلی کروان کیتابینی و تورکو شعرلر مجموعه‌سینین یاییلما خبرینی ائشیتسین‌لر
صابر ادبی انجومنی‌نین تدبیرینه قاتیلماق ایسته‌ینلر آشاغیداکی عنوانا مراجعت ائده بیلرلر:

تهران- فردوس بولواری- دختران مدنیت سارایی
آخشام اوستو ساعات 17دن 19 قده‌ر
.

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *