چوخ تاسفله یاییلان خبرلر اساسیندا، تانینمیش شاعر، حسن اسدی(شبدیز) بیر مدت خسته‌لیک سونرا مرداد آیی‌نین ۱۱ده ۶۸ یاشیندایکن یاشادیغی تهران شهرینده وفات ائتمیشدیر.
حسن اسدی(شبدیز) ۱۳۳۶نجی ایل آذربایجانین ساراب شهرینده آنادان اولموش، یئنی‌یئتمه‌لیک ایللریندن آذربایجان و فارس دیللرینده شعر دئمه‌یه باشلامیشدیر. تحصیلاتینی دیپلم سویه‌سینده کیمی ساراب‌دا داوام ائتمیش، ۱۳۵۲نجی ایل بیولولوژی رشته‌سینده تبریز دانیشگاهینا داخیل اولوب و تحصیلینی بیتیردیکدن سونرا بیولوژی معللیمی کیمی فعالیته باشلامیشدیر.
حسن اسدی(شبدیز) انقلابدان سونرا تبریز شهرینده فعالیت گؤسترن ادبی انجومنلر و ییغینجاقلاردا فعالجاسینا اشتراک ائدیر، آنا دیلینده یازدیغی شعرلرینی یایمیشدیر. اونون آنا دیلینده دئییلن بیر چوخ شعرلری آلتمیشینجی ایللر تبریزده یاییلان «فروغ آزادی» روزنامه‌سینین «آذری صحیفه»سینده نشر ائدیلمیشدیر. سون واختلار او «واقف سرابی» ادبی انجومنینده فعالیت ائدیرمیش.
حسن اسدی(شبدیز)ین ایندییه کیمی فارس و آذربایجان دیللرینده مختلف ژانرلاردا یازدیغی شعرلرینی احتوا ائدن سکگیز کیتابی نشر ائدیلمیشدیر.
ایشیق-آذربایجان ادبیات و اینجه صنعت سایتی- امکداشلاری آدیندان قلمداشیمیز شاعر حسن اسدی(شبدیز)ین ایتگیسینی اونون حؤرمتلی عائله‌سینه، دوست- تانیشلارینا و آذربایجان ادبی اجتماعیاتینا باش ساغلیغی وئریر، خاطیره‌سینی عزیزله‌ییریک.
ایشیق-آذربایجان ادبیات و اینجه صنعت سایتی
۱۳/۰۵/۱۴۰۴
