بوردان بیر آت‌دی کئچدی
آتین اویناتدی کئچدی
آی کیمی شفق ساچدی
گون کیمی باتدی کئچدی
چوخ تاسفله، عزیز و صمیمی یولداشیمیز «پرویز مرسلی»، تیر آیی‌نین ۲۰-جی گونو، خرچنگ خسته‌لیگی ایله چتین موباریزه‌دن سونرا، ۷۲ یاشیندا، یاشادیغی «کرج» شهرینده حیاتلا ابدیلیک وداعلاشدی. او، عؤمرونو اینسانلیق سئوگیسینه، آزادلیق و اجتماعی عدالت اوغروندا مبارزه‌یه، محروم کوتله‌لرین حقوق‌لارینی مدافعه‌یه حصر ائتدی و شرفلی بیر عؤمر یاشادی.
«پرویز» مؤحکم ایراده‌لی و آزادلیق‌سئور بیر اینسان ایدی. او، بشری ایدئال‌لاری اوغروندا ایللرله آزاد یاشاماقدان محروم قالدی، آنجاق هئچ واخت اینسانلیق پرینسیپ‌لریندن و عدالت آختاریشیندان ال چکمه‌دی. آیدین دوشونجه‌لی و یورولماق بیلمز بیر روح‌لا، همیشه آذربایجانین مدنی و ادبی قوروم‌لارینین دایاق نقطه‌سی اولدو و عؤمرونون سون آنلارینا قده‌ر ده بو حمایتدن و دستک‌دن ال گؤتورمه‌دی.
پرویز پاک یاشاییشین، فداکارلیغین و عدالت‌سیزلیک قارشیسیندا سارسیلماز دوروشون سیموولو ایدی. او، میللی مدنیتین، متعهد ادبیاتین و آنا یوردونون صمیمی و صداقتلی خادمی‌ایدی. شوبهه‌سیز کی، خاطیره‌سی ابدی یاشایا‌جاق و شرفلی عؤمرو اونودولمایاجاق.
بیز، «ایشیق» – آذربایجان ادبیات و اینجه‌صنعت سایتی- امکداشلاری، عزیز و صمیمی یولداشیمیز«پرویز مرسلی»نین شرفلی خاطیره‌سینی احتراملا یاد ائدیر، اونون تاسفلی ایتگیسینی حؤرمتلی عائله‌سینه، حیات یولداشی «زهرا» خانیما، سئویملی ائولادلاری «روزبه» و «رزا» خانیما، دوست و تانیشلارینا باش ساغلیغی وئریریک.
سئویملی یولداشیمیز «پرویز مرسلی»نین جنازه‌سی تیر آیی‌نین ۲۲-جی گونو (یکشنبه) دوغولدوغو «خوی» ولایتی‌نین «پیرکندی» کندینده تورپاغا تاپشیریلاجاق.
«ایشیق» – آذربایجان ادبیات و اینجه‌صنعت سایتی
۲۱ تیر ۱۴۰۴
