بوگون- شهریورین اون ایکیسی- «ایشیق»- آذربایجان ادبیات و اینجه صنعت سایتی‌نین ادبی مدنی فعالیتیندن ۱۳ ایل کئچدی. ۱۳۹۰نجی ایلین شهریور آیینین ۱۲سیندن اؤز فعالیتینه باشلایان «ایشیق» سایتی، آذربایجان ادبیات و اینجه‌صنعت نمونه‌لرینی یایماق و ملی مدنیتیمیزین تبلیغی آماجی ایله هئچ بیر حالدا اؤز فعالیتینی دایاندیرمادان، مخاطبلری ایله منتظم علاقه‌ده اولماغا چالیشمیشدیر.
بو مدت عرضینده آذربایجانین بیر چوخ تانینمیش شاعر و یازیچیلاری کؤنوللو اولاراق اؤز اثرلرینی بیزه گؤندرمک‌له، «ایشیق»ین منتظم فعالیتینه الوئریشلی شرایط یاراتدیلار. بو باخیمدان بیزیم یازیچیلار هئیتیمیزین سایی اونلار نفره چاتدی و بو امکداشلیق پروسسی «ایشیق»ین صحیفه‌لرینین اوخوجو اعتبارینی قازانماسیندا حل ائدیجی رول اوینادی.
بو کؤنوللو امکداشلاریمیزین زحمتی سایه‌سینده ادبی مدنی اجتماعیاتیمیزدا اؤزونه مخصوص مؤوقع قازانان «ایشیق»، ایندییه کیمی ۳۲۴ نفر یازیچی و شاعرین امکداشلیغینی جلب ائده بیلمیشدیر کی اونلارین ۶۴ نفری قادین شاعر و یازیچیلاریمیزدیر.
ایندییه کیمی «ایشیق» – آذربایجان ادبیات و اینجه صنعت سایتیندا: ۲۱۱۰ شعر/ ۹۵۸ ادبی مدنی خبر/ ۶۵۶ یادداشت/ ۵۶۲ حئکایه/ ۳۲۳ مقاله/ ۹۵ کیتاب/ ۸۸ دکلمه/ ۸۰ مصاحبه و دانیشیق و ۳۱ ادبی مدنی سند و خاطیره‌لی شکیل یاییلیبدیر.
«ایشیق» سایتی‌نین ۱۳نجی ایل فعالیتی موناسیبتیله، سایتین باش یازاری وظیفه‌سینده اولاراق، صمیم قلبدن آز ساییلی آنجاق چوخ زحمتکش ثابت امکداشلاریمیزدان، ائله‌جه ده آذربایجانین مختلف شهرلرینده بیزیمله کؤنوللو امکداشلیق ائده‌ن باجی و قارداشلاریمیزدان و اؤز گؤزل اثرلری ایله «ایشیق» سایتینا تمناسیز قاتیلان آذربایجان یازیچی و شاعرلریندن اولدوقجا تشکر ائدیب، اونلارا اؤز منتدارلیغیمی بیلدیریرم. ساغ اولسونلار.
حؤرمتله: ائلدار موغانلی
12 شهریور ۱۴۰۳
ایشیق
چئویرن: ایشیق
ترجمه: ایشیق
سسلندیرن: ایشیق
- خبر
- اوخوماق زامانی: < 1 دقیقه
- https://ishiq.net/?p=35526
چاپ
یک پاسخ
دگرلی شاعر یازیچی ائلیمیزین ائلداری ائلدار موغانلی جنابلاری/
گونوموزده اذربایجان فرهنگ و ادبیاتینین تکجه و بیرجه بایراقداری اولاراق سیزی و سایقیلی امک داشلارینیزی صمیم قلبدن آلقیشلار گونو گوندن آرتیق باشارلار دیله ییرم. حرمت له علی صمدی.