چوخ تاسفله، یاییلان خبرلر اساسیندا تانینمیش آذربایجانلی رسام و آکتیور اوستاد علی کوهپایه بوگون مرداد آیی‌نین بیرینجی گونو اوره‌ک اینفارکتی سببیندن یاشادیغی تبریز شهرینده حیاتلا ابدیلیک وداعلاشمیشدیر.
اوستاد علی کوهپایه ۱۳۲۷نجی ایلده تبریز شهرینین دوه‌چی محله‌سینده آنادان اولموشدور. ابتدایی و اورتا مکتبی بیتیردیکدن سونرا تبریز اینجه صنعت مکتبینه داخل اولور و اوستاد عبدالله باقری‌نین نزدینده رساملیق و دیزاینرلیک صنعتینی اؤیره‌نیر. ۱۳۴۸-نجی ایلدن رساملیق‌لا یاناشی صحنه صنعتی ساحه‌سینده ده جیددی فعالیت گؤستریر و بیر نئچه کینو، تلویزیا سریالی و سینما فیلملرینده رول ایفا ائدیر.
. اوستاد کوهپایه ۱۳۶۰ – ۱۳۷۱-نجی ایللرده تبریزین بیر نئچه عالی مکتبینده او جومله‌دن: شهید سرداری و اسلامی اینجه صنعت مرکزینده، ۱۳۷۵-نجی ایلدن ایسه تهرانا کؤچدوکدن سونرا تهران تصویری صنعت‌لر کونسئرواتوریاسی، تهران مدنی ایرث‌لر عالی تحصیل مرکزی، الزهرا دانیشگاهی، علمی کاربردی دانیشگاهی، علم و مدنیت دانیشگاهی، ائله‌جه‌ده شهرری خطاطلار درنه‌یینده رساملیق صنعتینی اؤز اؤیرنجی‌لرینه درس دئییر.
اوستاد کوهپایه مرداد آیی‌نین بیرینجی گونو اوره‌ک دایانماسی سببیندن حیاتلا وداعلاشیر و جنازه‌سی ایسه بوهفته‌نین چرشنبه گونو سحرچاغی ساعات ۹:۳۰دا تبریزین ۲۹ بهمن مدنیت ساراییندان مشایعت اولوب، تورپاغا تاپشیریلاجاق.
«ایشیق» – آذربایجان ادبیات و اینجه صنعت سایتی- آدیندان اوستاد علی کوهیایه‌نین ایتگیسینی اونون مؤحترم عائله‌سینه، دوست و تانیشلارینا و اؤلکه‌نین اینجه‌صنعت اجتماعیاتینا باشینیز ساغ اولسون! دئییر و گؤرکملی صنعتکارین خاطیره‌سینی عزیزله‌ییریک.
«ایشیق» – آذربایجان ادبیات و اینجه صنعت سایتی
۲/۵/۱۴۰۳
