گؤرکملی آذربایجان شاعری و اجتماعی شخصیتی اوستاد «حبیب فرشباف»ین ۸۰ یاشی موناسیبتیله ۴۰نجی ایللرده آذربایجانین اوجقار کندلریندن چکدیگی «آرازین ساحیللریندن» عنوانلی فوتوشکیل‌لر حاقیندا اجلاس کئچیریله‌جک. ۵۰۰دن آرتیق آغ- قارا، اورتا اؤلچولو نگاتیو چرچیوه‌سینده چکیلمیش بو فوتو شکیل‌لر، ۶۰ ایل بوندان اول قاراداغ ماحالی‌ کندلری‌نین اجتماعی دورومونو گؤستریر و اوستاد حبیب فرشباف همن کندلرده معلم اولدوغو ایل‌لر بو فوتو شکیل‌لری چکمیشدیر. بوندان اؤنجه بو شکیل‌لردن سئچیلمیش ۴۰ شکیل تهرانین دنا گالریسینده سرگیلنمیش و چوخ گئنیش قارشیلانمیشدیر. عینی حالدا همن شکیل‌لر مجموعه‌سی ۱۳۹۹نجی ایل اؤلکه مقیاسیندا کئچیریلن سندلی شکیل‌لر فئستیوالی‌نین ۱۸نجی دؤوره‌سینده اوغور قازانمیش و سئچیلمیش ۶ سندلی شکیل‌لر مجموعه‌سی سیراسیندا اعلان ائدیلمیشدیر.
اردیبهشت آیی‌نین ۲۳نجی گونو ساعات ۱۸دن ۲۰یه قده‌ر ایران صنعتکارلار ائوی‌نین (خانه هنرمندان ایران) زالیندا کئچیریله‌جک بو اجلاسدا بیر سیرا دونیا شؤهرتلی فوتوگراف‌لارلا برابر ایران فوتوگراف‌لار بیرلیگیندن ده تانینمیش شخصیت‌لر اوستاد حبیب فرشباف‌ین چکدیگی بو شکیل‌لر حاقیندا اؤز ملاحظه‌لرینی و رای‌لرینی بیلدیره‌جک‌لر و اوستادین اؤزو ده بو شکیل‌لرین تاریخی روایتلرینی دانیشاجاقدیر.
بو اجلاسا قاتیلماق هامی اوچون آزاددیر.