چئویرن: ایشیق
ترجمه: ایشیق
ایشیق

چوخ تاسفله تانینمیش آذربایجان ادبیات خادیمی «علی جنگجو خالط‌آبادی» بو گون (۱۴ آذر)خسته‌لیک سببیندن وفات ائتمیشدیر.
علی جنگجو خالط‌آبادی انقلابدان سونرا «ائلدار» نشری‌نین مدیری، هشتادینجی ایللرین ایلک یاریلاریندا یاییلان «دیلماج» ژورنالی‌نین اجرا مدیری و سون ایللر «ائل بیلیمی مؤسسه‌سی»نین قوروجولاریندان و اداره هئیتی عضوی اولموشدور.
ایشیق- آذربایجان ادبیات و اینجه صنعت سایتی- امکداشلاری آدیندان آذربایجانین تانینمیش ادبی مدنی شخصیتی جناب «علی جنگجو خالط‌آبادی»نین وفاتینی اونون حؤرمتلی عائله‌سینه، دوست تانیشلارینا، ائل بیلیمی موسسه‌سینین اداره هئیتی عضولری و امکداشلارینا تسلیت دئییر و خاطیره‌سینی عزیزله‌ییریک.

ایشیق- آذربایجان ادبیات و اینجه صنعت سایتی
۱۵/۰۹/۱۴۰۲

علی جنگجو خالط آبادی (مختصر بیوگرافی)
ائل بیلیمی @el_bilimi

۱۳۲۲/جی ایلده آبان آیی‌نین ۲۳-نده «اورمو»نون «عسگرخان» محله‌سینده،  دونیایا گلدی. ایلک و اورتا مکتبینی همین شهرده بیتیردی.  او هله یئنی‌یئتمه‌لیک یاشلاریندا ایکن آتاسینی الدن وئرمیش و ائوین بؤیوک اوغلو اولدوغو اوچون عایله‌نین بوتون مسئولیتی اونون عهده‌سینه دوشموشدور.
ایکی ایل عسگرلیگینی اردبیلده کئچیردن سونرا،  آناسی و باجی قارداش‌ و باجیلارینی گؤتوروب،  اورمودان تهرانا کؤچموشدور.
اورادا ایلک اؤنجه قدیم مکتب دوستو جمال آغانی (دوکتور جمال آیریملو)نو تاپیب،  آز سونرا دا شاعر حسن مجیدزاده(ساوالان)ایله تانیش اولموشلار.  بونلار سورکلی حالدا بیر-بیری‌یله گؤروشوب، دانیشاردیلار بو گؤروشلرین نتیجه‌سینده علی خالط‌آبادی او زماندان اعتبارا آنادیلینه، ادبیاتینا و وطنینه اورکدن باغلانمیشدیر.
علی خالط آبادی ایلک اؤنجه بیر مدت تولیدارو شرکتینده،  کارگزینی رئیسی کیمی چالیشمیش،  سونرا فرهنگ و هنر (بوگونکو ارشاد اسلامی) وزارتینده رسما استخدام اولموش،  تهران و زاهدان شهرلرینده ایشله‌میشدیر.  نهایت انقلاب عرفه‌سینده تبریز شهرینه ماموریت آلاراق،  همین اداره‌نین مالی-اداری وظیفه‌سینده ایشله‌میش و ۱۳۸۰-جی ایلده امکلی (بازنشسته) اولموشدر.
علی خالط‌آبادی تبریزه گلندن سونرا،  «حسن آذربایجان»لا تانیش اولموش و عؤمرونون سونونا کیمی اونون کناریندا اولموشدور.  سونرا دکتر «محمدتقی زهتابی»نی تاپیب اونون بیر چوخ کتابلارینا مجوز آلماقدا موثر نقشی اولموشدو.  همین ایل‌لرده «ائلدار» آدلی بیر انتشارات ثبته وئرمیش و اونلارجا دگرلی کتاب نشر ائتمیشدیر.
او، ح. آذربایجان، مهندس ی. تقوی،  دوکتور م. ت. زهتابی ایله بیرلیکده «آذربایجان مدنیت اوجاغی»نی قورموشلار.  «مدنیت اوجاغی» وقتی‌یله تبریز محیطینده ان اؤنملی کولتورل و معارف‌پرور اجتماعی تشکیلات کیمی چالیشمیشدیر.
علی خالط آبادی ۱۳۸۳-جو ایلدن اعتبارا دیلماج درگی‌سی‌نین اجرایی مدیری اولموش و همین ایلدن باشلایاراق بو گونه کیمی دیلماجین امتیاز صاحبی اولان مهندس علیرضا صرافی‌نین ان یاخین یولداشلاریندان اولموشدور و صرافی ایله بیرلیکده «ائل بیلیمی مؤسسه»‌سی‌نین قوروجولاریندان اولموش و بو گونه کیمی ده بو مؤسسه‌نین ثابت و داییمی عضوو بیر چوخ وظیفه‌لری عهده‌له‌میشدیر.
او کؤنوللو اولاراق عؤمور بویو آنادیلینه و آنا وطنینه منت‌سیز خدمت ائتمیش و خلقی‌نین ادعاسیز خادمی کیمی چالیشمیشدبر.
نهایت ۸۰ ایل‌لیک ثمره‌لی عؤمرونون ذیروه‌سینده سئودیگی دوستلاری و سئویملی عاییله‌سینی ترک ائده‌رک، آذر آیی‌نین ۱۴-نده ایشیقیلی دونیایا گؤز یومدو.

یولو گئدرلی اولسون.

 

 

 

چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

آذربایجان ادبیات خادیمی «علی جنگجو خالط‌آبادی» وفات ائتدی

ایشیق
www.ishiq.net

آذربایجان ادبیات و اینجه‌صنعت سایتی

آذربایجان ادبیات خادیمی «علی جنگجو خالط‌آبادی» وفات ائتدی

ایشیق
www.ishiq.net

آذربایجان ادبیات و اینجه‌صنعت سایتی

آذربایجان ادبیات خادیمی «علی جنگجو خالط‌آبادی» وفات ائتدی

ایشیق
www.ishiq.net

آذربایجان ادبیات و اینجه‌صنعت سایتی