اؤلوم سئوینمه‌سین قوی! عؤمرونو وئرمیر بادا
ائل قدرینی جانیندان داها عزیز بیلن‌لر؛
شیرین بیر خاطیره تک قالاجاقدیر دونیادا
سئوه‌رک یاشایان‌لار، سئویله‌رک اؤلن‌لر.
چوخ تاسفله، گؤرکملی آذربایجان یازیچیسی، میتولوژیستی و حؤرمتله سئویلن اجتماعی شخصیتی «میرعلی سیدسلامت» آبان آیی‌نین ۲۲-نجی گونو سحر چاغی، یاشادیغی تبریز شهرینده ابدیته قووشموش و آرامیزدان کؤچموشدور.
میرعلی سیدسلامت ۱۳۲۵-نجی ایل(دی آیی‌نین ۱۸ده) تبریز شهرینده بوگون ۱۷ شهریور آدی ایله تانینان محله‌نین «گنجعلی‌بئی» دربندینده دونیایا گؤز آچمیش، اوشاقلیق و گنجلیک ایللرینی و تحصیلاتینی دا ائله بو شهرده کئچیرمیش، ریاضی اختصاسیندا تبریزین فردوسی مدرسه‌سیندن دیپلم آلمیشدیر. ۱۳۴۵-نجی ایل تبریز دانیشگاهی‌نین فنی دانشکده‌سینه کئچمیش و «راه و ساختمان» اختصاسیندا بئش ایل تحصیلینی داوام وئردیکدن سونرا یول اداره‌سی‌نین متخصصی کیمی ایشه باشلامیشدیر. او، بو ایللرده اوجقار و یوخسول کندلرده ۱۵۰دن آرتیق یول پروژه‌لرینین اجرا مسئولو کیمی بؤیوک علاقه ایله آذربایجان کندلیلرینه خدمت گؤسترمیشدیر
میرعلی سیدسلامت حیاتینی انسان‌سئورلیک، آزادلیق و اجتماعی عدالته حصر ائتمیش و بو سببدن ده عؤمرونون بارلی- بهرلی ایللری‌نین ۱۵ ایلینی (۱۳۶۰ دان ۱۳۷۵ قده‌ر) زندانلاردا کئچیرمیش و مختلف عذاب، اذیت‌لر گؤرموشدور؛ آنجاق اینامیندان دؤنمه‌میش و حیاتی‌نین سونونا کیمی بشری و زحمتکشلرین سعادتی آمال‌لارینا صداقتلی قالمیشدیر.
میرعلی سیدسلامت یئتمیشینجی ایللرین ایکینجی یاریسیندان آذربایجان و تورک میتولوژیسی زمینینده تدقیق آپارماغا باشلامیش و آذربایجانین مدنی و اسطوره‌وی تاریخینه اون‌لارلا مقاله، علمی یادداشت، دانیشیق متنی و بیر نئچه علمی- تدقیقی کیتاب بخش ائتمیشدیر. او جومله‌دن: «بایاتی اسطوره باخیمیندان»، «مقدمه رساله‌ای در میترائیسم»، «ساری گلین»، «حاجی‌زاده‌نین یاشاییشینا بیر باخیش»، «اصلی – کرم»، «کتاب دده قورقود(قورد رب‌النوعونون گزارشی تانریلار توپلومونا)» و «زبان چیست؟» کیتابلارینی آد چکمک اولار. بونلاردان علاوه، میرعلی‌نین «انجمن موسیقی آذربایجان»ین قورولماسیندا بیر موسس کیمی دانیلماز رولو اولموش و بو انجمنین ارگانی اولان «سس» مجله‌سی‌نین یازیچیلار هئیتینده یورولمازجاسینا چالیشمیشدیر
«ایشیق» -آذربایجان ادبیات و اینجه صنعت سایتی امکداشلاری آدیندان شرفله عؤمرونو باشا ووران سئویملی اینسان، اوستاد «میرعلی سیدسلامت»ین آغیر ایتگیسینی اونون حؤرمتلی عائله‌سینه، یولداشلارینا، دوست-تانیشلارینا و سئونلرینه باش ساغلیغی وئریریک. بیز اینانیریق میرعلی‌نین شرفلی خاطیره‌سی خالقین یادداشیندان سیلینمز اولاجاقدیر؛ ادبی مدنی اجتماعیاتیمیز اونو همیشه حؤرمتله یاد ائده‌جک و ابدی یاشارلار سیراسیندا یاشاداجاقدیر. عشق اولسون شرفلی خاطیره‌سینه. خالقیمیزین، آذربایجانیمیزین باشی ساغ اولسون!
«ایشیق» – آذربایجان ادبیات و اینجه صنعت سایتی
۲۳ آبان ۱۴۰۱
