چئویرن: علی پاینده
ترجمه: علی پاینده
علی پاینده
00:00
00:00

ایران و آذربایجانین تانینمیش و بؤیوک حؤرمته صاحب اجتماعی سیاسی شخصیتی، فداکار انسان، دونیا زحمتکشلرینین دوستو، «عارف(علی) پاینده»‌نین سئودالی اوره‌یی‌ دؤیونمکدن دایاندی.
«علی» آدی ایله دوستلار آراسیندا تانینان «عارف پاینده» ۱۳۲۱نجی ایل خرداد آیی‌نین ۱۵ده اردبیل ماحالی‌نین سلوط کندینده مهاجر بیر عائله‌ده دونیایا گؤز آچمیش، کیچیک یاشلاریندان عائله‌سیله بیرلیکده تهرانا کؤچموش و ۸۰ یاشینا کیمی بو شهرده یاشامیش و خرداد آیی‌نین ۲۷ده بو شهرده اوره‌ک انفارکتی سببیندن حیاتینی ایتیرمیشدیر.
هله یئنی‌یئتمه‌لیکدن بشری آمال‌لار اوغروندا اجتماعی و سیاسی مبارزه‌یه اوز گتیره‌ن علی پاینده، عؤمرونون بوتون حصه‌سینی اجتماعی عدالت، آزادلیق، خالقلار دوستلوغو، صلح و امین آمانلیق و بو کیمی بشری آمال‌لار اوغروندا صرف ائتمیش و بونون اوچون ده بیر چوخ عذاب- اذیتلره معروض قالمیش و عؤمرونون اون ایلدن آرتیغینی آزادلیقدان محروم ائدیلمیشدیر.
علی پاینده آذربایجان ادبیاتی و مدنیتی‌نین صمیمی و صداقتلی حامیسی اولماسی‌لا برابر، ایران انقلابی‌نین غلبه‌سیندن سونرا، خصوصیله ده کئچن ایگیرمی ایلده آذربایجان ادبیاتی و مدنیتی‌نین چیچکلنمه‌سینده الیندن گلنی اسیرگه‌مه‌میشدیر. بو مهربان، صداقتلی و شرفلی اینسانین سیماسی بیر چوخ آذربایجان یازیچی، شاعر و مدنیت خادیملری‌نین یادداشیندا، سئویلن صمیمی بیر اینسان و اینسانلیغی تمثیل ائده‌ن حؤرمتلی بیر اجتماعی سیاسی شخصیت کیمی یاشایاجاقدیر.
علی پاینده ایستر شاهلیق دؤرو استبداد زندانلاریندا اولارکن، ایسترسه ده انقلابدان سونرا، دائیما آذربایجانین ملی قهرمانی «صفرخان قهرمانی»‌نین ان یاخین آرخاداشی و یول یولداشی اولموش، و صفرخانین عؤمرونون سونونا قده‌ر بو یولداشلیق و آرخا دورما داوام تاپمیشدیر. سون ایللرده علی پاینده اؤز خاطیره‌لرینی قلمه آلمیش و ۱۳۹۹نجی ایل «آنچه بر من گذشت» (منیم باشیما گلنلر) عنوانی آلتدا اختران انتشاراتی طرفیندن نشر ائدیلمیشدیر.
«ایشیق» -آذربایجان ادبیات و اینجه صنعت سایتی- امکداشلاری آدیندان عؤمرونون سونونا قده‌ر بشری آماللارینا صادق قالان، اؤز خالقی و وطنی‌نین سعادتی اوغروندا مبارزه‌دن گئری چکیلمه‌ین شرفلی اینسان عارف(علی) پاینده‌نین ایتگیسینی اونون حؤرمتلی عائله‌سینه، یولداشلارینا، دوست-تانیشلارینا و سئونلرینه باش ساغلیغی وئریر، شرفلی خاطیره‌سینه عشق اولسون دئییریک.

«ایشیق» -آذربایجان ادبیات و اینجه صنعت سایتی
۲۸/۰۳/۱۴۰۱

چاپ

مجله ایشیق شماره 4

آذربایجان توی‌لاری

مجله ایشیق شماره 3

آذربایجان و مهاجرت مساله‌سی

مجله ایشیق شماره 2

آذربایجان قفه‌خانالاری

مجله ایشیق شماره 1

آذربایجان معلم‌لری و تحصیل مساله‌سی

باشقا اثرلری

دیدگاهتان را بنویسید

نشانی ایمیل شما منتشر نخواهد شد.

عارف(علی) پاینده‌ ابدیته قووشدو

علی پاینده
www.ishiq.net

آذربایجان ادبیات و اینجه‌صنعت سایتی

عارف(علی) پاینده‌ ابدیته قووشدو

علی پاینده
www.ishiq.net

آذربایجان ادبیات و اینجه‌صنعت سایتی