زنگانلی شاعر «رزاق شاهمرادی(آزاد)» وفات ائتدی
آلدیغیمیز خبر اساسیندا، چوخ تاسفله «آزاد» تخلص‌لی زنگانلی شاعر «رزاق شاهمرادی» آذر آیی‌نین ۲۴نجی گونو وفات ائتمیشدیر. ۱۳۳۸نجی گونش ایلینده زنگان ماحالی‌نین «رجعین» کندینده دونیایا گؤز آچان شاعر «آزاد»، آذربایجان ادبیاتینا خصوصیله ده شعریمیزه اورتا یاشلاریندان اوز گتیرسه‌ده، آز بیر مدتده شعر هوسکارلارینین رغبتینی قازانماغی باجارمیشدی. اوشاقلیق ایللرینی کندلرینده کئچیرن و آنا دیلین شیرینلیگینی و شفاهی ادبیاتیمیزین درینلیگینی اؤز آناسیندان اؤیره‌نن و اونون بایاتیلاریندا شعرلرینین تملینی قویان شاعر اؤز یارادیجیلیغیندا داها آرتیق گرایلی، قوشما و کلاسیک قالیبلرینه مئیل گؤسترمیشدیر.
رزاق شاهمرادی(آزاد)نین سون ایللر ادبی فعالیتی داهادا چوخالمیش، زنگان، میانا، کرج و تهران ادبی درنک و محفیل‌لرینین فعال اشتراکچیلاریندان اولموشدور. تاسفله اؤلوم آمان وئرمیر و شاعرین عؤمور کیتابی بیر یوللوق باغلانیر. آذر آیی‌نین ۲۴نجی گونو کرج شهرینین کوثر خسته‌خاناسیندا کرونا ویروس سببیندن وفات ائدیر.
«ایشیق» – آذربایجان ادبیات و اینجه صنعت سایتی آذربایجان شاعری «رزاق شاهمرادی(آزاد)»نین ایتگیسینی اونون مؤحترم عائله‌سینه، قوهوم- اقرباسینا و ادبی جمعیتیمیزه باش ساغلیغی وئریر، مرحوم شاعریمیزین خاطیره‌سینی عزیزله‌ییر.
«ایشیق» – آذربایجان ادبیات و اینجه صنعت سایتی
۲۹/۰۹/۱۳۹۹
