بوگون دوشنبه 30 فروردین 1400 ساعات 13:55
ایشیق 1
آذربایجان معلم‌لری و تحصیل مساله‌سی
ایشیق 2

آذربایجان قفه‌خانالاری

ایشیق 3

آذربایجان و مهاجرت مساله‌سی

ایشیق 4
آذربایجان توی‌لاری

علی اکبر آقایی(ائل اوغلو)، ابدیته قوووشدو
«یئنی قاپی»

«یئنی قاپی» بو آجی اولایی بوتون آذربایجانا، اؤزللیکجه مییانانین خالقینا باش ساغلیقی دئییب، تانریـدان بو بؤیوک شاعیریمیزه رحمت دیله‌ییر.
رحمت‌لیک «علی اکبر آقایی» ۱۳۲۵-نجی گونش ایلی مییانانین کاغذکنان ماحالینین قارابولاق کندینـده بیر دَگیرمانچی عاییله‌ده دونیایا گؤز آچدی. اوشاق‌لیغینی قارابولاقـدا سوواندان سونرا، عاییله‌سی ایله بیرلیکـده مییانایا کؤچوب و بیر مدت ایشله‌مک اوچون تهرانـدا گونلرینی آخشاما چاتدیردی، آمما وطن حسرتی و ائلینه باغلیلیغی، اونو تهرانـدان مییانایا گئری قایتاردی. یوردا دؤننـدن سونرا «آموزش و پرورش”»ده ایشه باشلادی و عؤمور بویو صداقتله بو ایشی باشا چاتدیریب، اوردان أمکدار اولدو.
محمدباقر خلخالی‌نین ثعلبیه‌سینی اوخویانـدان سونرا یئنی بیر صفحه آچیلدی یاشامیندا. آذربایجانین اولو شاعیرلریندن چوخونون اثرلرینی او جومله‌دن صابیر، فیضولی، مؤجوز، سلیمان رستم، صمد وورغون،و س. اوخویوب و هر بیرینـدن اولدوغو قدر ائتگیلنـدی. علی اکبر آقایی شعر دونیاسینـدا کلاسیک بیر شاعیر اولاراق چئشیتلی بیچیملرده: قوشما، گرایلی، مثنوی،و س. شعرلر یازیب یارادیب. آرتیرمالییام کی، سایین آقایی بَی، شعر و حیکایه یازماقـدا مییانا ادبیاتچی‌لاری آراسیندا اؤزل یئر آچمیشــدی. اجتماعی قونولارا شعرلرینده باخیشی بوتونلوکله رئالیست بیر باخیش ساییلاردی. اینسانلاری سئویب، چئوره‌سینـده اوز وئرن اولایلارادان راحاتجاسینا کئچمزدن اونلاری شعره چکیب، ائلینین دانیشان دیلی اولموشدور. بیر آچیدان‌دا باخساق، آقایی‌نین شعرلرینده طبیعتین دیلی دانیشیر. او تورپاق، داغ، یاغیش و یاشیللیق شاعیری ایدی. آقایی‌نین ساتریک شعرلری و قیسا حیکایه‌لری هر اوخوجونو ماراغلاندیریب، اونو بیر خالق سئور اینسان تانیتدیرمیشـدی. ادبی دونیاسینـدا بوگونه جَن، اون کیتابلیق یازی(شعر ایله نثر) چاپا حاضیردیر، آنجاق تأسسوفله أجل زامان وئرمه‌دی اؤز ألی ایله بو کیتاب‌لار گونش اوزو گؤرسونلر. ایلک دفعه اولاراق علی اکبر آقایی‌نین شعرلریندن، “چنلی تئل” آنتولوژیسینـده چاپا گئدنـدن سونرا، چنلی‌تئل درنه‌گینده، ثابیت بیر چالیشقان اویه کیمی، عؤمرونون سون پاغلارینا جان، وطن آدی و آذربایجان قایغیسی اوره‌گینـدن چکیلمه‌دی.
و نهایت ۱۳۹۵/۱۲/۱۱-ده اوچ گون مییانانین خاتم الانبیا خسته‌خاناسینـدا یاتانـدان سونرا، اوره‌گی خسته‌لیکدن بیر یورولموش قوش کیمی دایانیب، همیشه‌لیک حایاتا گؤز یوماندان سونرا، ابدیته قوووشدو.
روحو شاد، یولو داواملی اولسون.

«یئنی قاپی» طرفیندن: «دومان بختیاری»

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *