«قوشلار داها قورخمورلار» رومانی چاپدان چیخدی
«یانار- آیدین» نشریاتی طرفیندن تانینمیش آذربایجان یازیچیسی «رقیه خانیم کبیری»نین «قوشلار داها قورخمورلار» آدلی یئنی رومانی ابشیق اوزو گؤردو. بو رومان یازیچینین ایشیق اوزو گؤره‌ن اوچونجو رومانی‌دیر.
«حمید بخشمند»ین ائدیتورلوغو و «وقار آقایی»نین طراحلیغی‌ایله نشره حاضیرلانان «قوشلار داها قورخمورلار» رومانی نیلوفر و نرگیس آدلی ایکی فرقلی نسیلدن اولان قادینین یاشاییش روایتی‌دیر. بو رومانین حادیثه‌لری خوی شهرینده ۱۳۲۴-جو و ۱۳۵۷-نجی ایللرده اوز وئریر و اساس موضوعسو میللی حکومتین قورولوشو و داغیلماسیندان سونراکی و بهمن انقلابیندان آسیلی اولان حادیثه‌لردن سونراکی ضیالیلارین و سولچولارین مهاجرت مسئله‌سی‌دیر. بو رومان تاریخی بیر رومان دئییل؛ بونونلا بئله تاریخی حادیثه‌لر مختار، نریمان، خان‌آغا و سلیمان کیمی کاراکترلرین ده یاشاییشلارینی چپ- چئویر ائله‌ییر.
سون بئش ایلده رقیه خانیم کبیری‌نین «ائویم» و «یئردن اوجا تورپاق» رومانلاری، «اوره‌ییم آغریییر»، «بو قاپی هئچ چالینمایاجاق»، «ایچیمده‌کی قیز» آنلاین یازیلاری و «دونیا قابار چالیب، یولداش» حئکایه کیتابلاری و چین سفریندن بحث ائد‌ن «ساچاقدان آسیلمیش اژدها» آدلی سفرنامه‌سی یاییلمیش و «اؤزبکیستان سفرنامه‌سی» کیتابی دا چاپا حاضرلانیر.
«اوره‌ییم آغرییر» حئکایه توپلوسو و «ائویم» رمانی، باکی‌دا قانون نشریاتی طرفیندن چاپ اولونوب. و ۲۰۱۲-نجی ایلده باکی شهرینده آزادلیق رادیوسونون کئچیردیغی حکایه مسابیقه‌سینده (ماوایل) آدلی حئکایه ۱۸۰ اثرین ایچینده بیرینجی یئری قازانمیشدی.
یازیچینین «قار یاغیر» آدلی حئکایه‌سی اساسیندا ۱۳۹۰-نجی ایلده «قادر فریور» رژیسسورلوغو ایله «قارال» آدلی فیلم چکیلیبدیر.
