بوگون دوشنبه 30 فروردین 1400 ساعات 11:53
ایشیق 1
آذربایجان معلم‌لری و تحصیل مساله‌سی
ایشیق 2

آذربایجان قفه‌خانالاری

ایشیق 3

آذربایجان و مهاجرت مساله‌سی

ایشیق 4
آذربایجان توی‌لاری

بیر شاعر ده سون شعرینی یازدی. باشیمیز ساغ اولسون!

قایدام محبتدیر، اونونچون ساغام،
باسیلماز قالایام، اییلمز داغام،
بیر یوللوق گئتمیرم، قاییداجاغام،
سنی خطاب ائدیر روحوم بو سؤزله
اوتور یول اوستونده یولومو گوزله!
(نوید سرور)

چوخ تاسفله یئنه‌ده بیر آجی خبرله اوره‌ییمیز تیتره‌دی، کؤنلوموز غبارلاندی، گؤزوموز یاغدی. آذربایجانیمیزین باشقا بیر انسان‌سئور و وطنپرور شاعر اوغلو بیر یوللوق آرامیزدان آیریلدی و بیر داها گؤروشه‌جه‌ییمیز امکانسیزلیغا چئوریلدی.
۱۳۴۱نجی ایل قاراداغین مولان کندینده آنادان اولان و بوتون عؤمرونو موغاندا، سونراایسه تبریز شهرینده یاشایان «اکبر برزگری مولان» چوخ آز بیر مدت خسته‌لیکدن سونرا دی‌آیی‌نین ۲۳نجو گونو بیر یوللوق آرامیزدان آیریلدی.
اکبر برزگری مولان انقلابدان سونرا اجتماعی فعالیتلریله یاناشی جدی صورتده ادبیاتا و خصوصیله شعر دونیاسینا آددیم آتدی. شعرلری و مقاله‌لری آلتمیشینجی ایللرین اوللرینده «نوید سرور» امضاسیلا تبریز شهرینده یاییلان «فروغ آزادی» روزنامه‌سینده چاپ ائدیلدی. چوخ چتین بیر وضعیتده بو ایللرده تبریز شهرینده تشکیل ائدیلن ادبی محفیللرده فعالجاسینا اشتراک ائتدی؛ دونیا گؤروشونون گنیش اوفوقو اونو آزادلیق وورغونو، صلح سئور، خالقلار دوستلوغونو تبلیغ ائدن و اجتماعی عدالت عشقیله یازیب یارادان بیر ادبیاتچی کیمی ادبی جمعیتیمیزده تانیتدی. حیات سیخینتیلاری و اجتماعی محرومیتلر سارسیلماز اراده‌سینه خلل یارادا بیلمه‌دی؛ معین سببلر اوزره داوام ائتدیره بیلمه‌دیگی تحصیلینی یئنی‌دن داوام وئرمک فیکرینه دوشدو. بیر نئچه ایل مطبوعاتدان و ادبی محفیللردن اوزاقلاشدی. «معمارلیق» رشته‌سینده یوکسک لیسانس صاحیبی اولدو و بو رشته‌ده خصوصیله‌ده «فلسفه هنر» اوزره ساوادلی بیر علمی مرجع شخصیته چئوریلدی. آزاد اسلامی دانشگاهی‌نین تبریز و پارس‌آبادمغان واحدلرینده معمارلیق اوستادی عنوانیندا تدریس ائتدی و بیر چوخ اؤیرنجی‌لرین تعلیمینده جدی فعالیتلر گؤستردی. ایکی اوچ آی اؤنجه «کبد سرطانی» خسته‌لیگینه دوچار اولدوغو بللی اولدو و چوخ تاسفله دی آیی‌نین ۲۳ینده ابدی‌لیک اولاراق آرامیزدان آیریلدی و شرفلی عؤمرونون سون شعرینه قورتاریش نقطه‌سی قویدو.
عؤمرونو شرفله و اؤز خالقینا، ملتینه صداقتله باشا ووران علمی شخصیت و آذربایجان شاعری «اکبر برزگری مولان (نوید سرور)»ین آغیر ایتگیسینی آذربایجان خالقینا، علم و مدنیت اوجاقلارینا، مؤحترم عائله و دوست- تانیشلارینا، اؤیرنجی‌لرینه، خصوصیله یگانه ائولادی «دلبر» خانیما باش ساغلیغی وئره‌رک، عزیز خاطیره‌سینه عشق اولسون! – دئییریک.

«ایشیق»- آذربایجان ادبیات و اینجه‌صنعت سایتی
۲۴ دی ۱۳۹۵

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *