بوگون سه شنبه 31 فروردین 1400 ساعات 02:29
ایشیق 1
آذربایجان معلم‌لری و تحصیل مساله‌سی
ایشیق 2

آذربایجان قفه‌خانالاری

ایشیق 3

آذربایجان و مهاجرت مساله‌سی

ایشیق 4
آذربایجان توی‌لاری

ishiq.net 1394
بیز گلدی گئده‌ریک؛ سن یاشا دونیا!

(۱۳۹۴ینجی ایل ادبیات و اینجه‌صنعتیمیزدن آخان اولدوزلار)

چوخ تاسفله آرخادا قویدوغوموز ۱۳۹۴ینجی ایلده ده بیر سیرا ادبیات و مدنیت اولدوزلاریمیز ابدی‌لیک اولاراق سؤندولر. بو ایل همچنین آذربایجان جومهوریسینده یازیب یارادان صنعتکارلاریمیزدان پروفسور توفیق حاجی‌بئو (دیلچی عالیم)، هابیل علی‌یئو(صنعتکار) و زلیمخان یعقوب(شاعر) ده بو آخان اولدوزلار سیراسیندا اولدولار.
بو اینسانلار میللی مدنیتیمیزین ترقیسی و چیچکلنمه‌سی اوغروندا صرف ائتدیگی عؤمورلری اعتباریله، خالقیمیزین یادداشیندا همیشه‌لیک یاشایاجاقلار. اونودولماسینلار دئیه، بیر داهادا عزیز خاطیره‌لرینه عشق اولسون دئییریک:

babayi-300x200

۱- عباس بابایی (سؤیلر) – شاعر (۱۳۲۳ زنجان – ۲۷ اردیبهشت ۱۳۹۴ زنجان)
زنگانین قوجامان شاعری «عباس بابایی(سؤیلر)» ۷۱ یاشیندا اردیبهشت آیی‌نین ۲۷ینجی گونو آرامیزدان ابدی‌لیک اولاراق آیریلمیشدیر. «عباس بابایی» ۱۳۲۳جو ایل زنگاندا دونیایا گلمیش، ۱۳۴۴ینجی ایلدن شعر یازماغا باشلامیشدیر. اونون فارسجا شعرلری تهراندا یاییلان فردوسی، روشنفکر، چاپار، صدا و… س کیمی درگیلرده یاییلمیشدیر. ۱۳۵۰ینجی ایل ایکی مین جیلدده “چراغ و چاه” آدیندا بیر شعر مجموعه‌سی چاپ اولور، آنجاق اونون یاییلماسینا اجازه وئریلمیر. ۱۳۶۹ینجی ایلدن زنگاندا «ایشیق» درنه‌یینده فعالجاسینا اشتراک ائدیر و تورکجه شعر یازماغا اوز گتیریر. ایکی تورکجه کیتاب: “گلیرم” و “آییق گئجه‌لر” آدلاریندا و بیر جیلد فارسجا “رد خون بر سنگ” آدی‌لا شعر مجموعه‌سی ایشیق اوزو گؤرموشدور.

majid hoseyni

۲- عیسی شعارقدیم (مجید حسینی) – شاعر (۱۳۳۰ تبریز – ۶ تیر ۱۳۹۴تهران)
«صابر ادبی انجومنی»‌نین اداره هئیتی عضوی(بازرسی) سئویملی انسان و دیرلی شاعر «مجید حسینی» ایکی گون ایتگین دوشدوکدن سونرا، جنازه‌سی تیر آیی‌نین آلتینجی گونو تهرانین جنوب حصه‌سینده (شهرری ده) تاپیلمیشدیر. مجید حسینی آدی‌لا تانینان عیسی شعار قدیم ۱۳۳۰ینجی ایل تبریز شهرینده دونیایا گؤز آچمیش؛ عؤمرونون بؤیوک حصه‌سینی خالق سئوه‌ر و اجتماعی عدالت اوغروندا چالیشان بیر شخصیت کیمی یاشامیشدیر. او عؤمرونون سون ایللرینی آذربایجان مدنیت و ادبیاتی اوغروندا جیددی مسئولیتله فعالیت ائدهن ادبی بیر شخصیت کیمی صابر ادبی انجومنی‌نین اداره هئیتی ترکیبینده چالیشیردی.

nabati-300x3001-300x200

۳- محمد نباتی – عاشیق (۱۳۴۸ ورزقان- چای‌کندی – ۱ شهریور ۱۳۹۴ ورزقان)
قاراداغ عاشیقلاری ایچینده اؤزونون آد- سانی اولان «عاشیق محمد نباتی» شهریورین بیرینجی گونو هله ۴۶ یاشینی تماملامادان حیاتینی ایتیرمیشدیر. محمد نباتی ۱۳۴۸ینجی ایل ورزقان ماحالی‌نین چایکندی کندینده دونیایا گؤز آچمیش گنجلیک ایللریندن عاشیق صنعتینین وورغونو اولموش و ائل اوبا تویلاریندا بوللوجا اشتراک ائتمیشدیر. او ایران آذربایجانیندان علاوه آذربایجان جومهوریسینده‌ده دفعه‌لرله چیخیش ائتمیشدیر. مرحوم عاشیقین وداع و تورپاغا تاپشیرما مراسیمی گئنیش کوتله اشتراکیلا دوغما کندی چایکندینده کئچیریلمیشدیر.

hasar17-2-310x165

۴- فریدون حصاری (حاصارلی) – شاعر (۱۳۱۶ جلفا- یکان کهریز– ۳ شهریور ۱۳۹۴تبریز)
آذربایجانین تانینمیش شاعری و ادبی جمعیتیمیزده لاییقینجه سئویلن صمیمی انسان اوستاد فریدون حاصارلی شهریور آیی‌نین اوچونجو گونو تبریز شهرینده حیاتا گؤز یومموشدور. او ۱۳۱۶ینجی ایلده جلفا ماحالی‌نین «یکان کهریز» کندینده آنادان اولموش و گنج چاغلاریندان آذربایجان دیلینده شعر یازماغا باشلامیشدیر. فریدون حاصارلی انقلابدان سونرا تبریزده تشکیل ائدیلن «آذربایجان یازیچیلار و شاعرلر جمعیتی»نین ایلک عضولریندن اولموش و اثرلری تهران و تبریزده نشر اولان دؤرو مطبوعاتدا آردیجیل یاییلمیشدیر.

ashiq rasul

۵- رسول قربانی – عاشیق (۱۳۱۴ قاراداغ- عباس‌آباد کندی– ۶ مهر ۱۳۹۴ تبریز)
آذربایجانین گؤرکملی و اوستاد عاشیق‌لاریندان اولان ۸۰ یاشلی عاشیق رسول قوربانی بئیین اینفاکتی نتیجه‌سینده مهر آیی‌نین آلتینجی گونو تبریز شهرینده وفات ائتمیشدیر. ایران اذربایجانی عاشیقلاری ایچینده “دده” عنوانیلا حؤرمتله‌نن عاشیق رسول قوربانی ۱۳۱۴ینجی ایل قاراداغ ماحالی‌نین عباس‌آباد کندیده دونیایا گؤز آچمیش و عاشیق صنعتینی ۱۳۳۰ینجی ایلدن عاشیق خیرالله، عاشیق حیدر، عاشیق کریم حضرتی و عاشیق عزیز شهنازی مکتبینده اؤیرنمیشدیر. او انقلابدان سونرا بیر چوخ موسیقی فئستیواللارینین غالیبی اولموش و دونیانین ایگیرمی‌یه یاخین اؤلکه‌لرینه سفر ائتمیش و اؤز صنعتینی نوماییش ائتدیرمیشدیر. اوستاد عاشیقیمیزین اثرلرینی احتوا ائده‌ن «سینه‌مده سسله‌نن سازیم وار منیم» آدلی شعر مجموعه‌سی‌ ایشیق اوزو گؤرموشدور.

shimshek-300x200

۶- محمدحسین مبین (شیمشک) – شاعر (۱۳۰۶ تبریز – ۶ مهر ۱۳۹۴تبریز)
آذربایجانین تانینمیش اجتماعی شخصیتی و گؤرکملی حکیم شاعری و جذامی‌لرله علاقه‌دار بیر عؤمور چالیشدیغی اوچون اؤلکه‌ده جذامی‌لرین آتاسی آدلانان دوقتور محمدحسین مبین(شیمشک) مهر آیی‌نین آلتینجی گونو ۸۸ یاشیندا وفات ائتمیشدیر. خالقیمیزین بو فداکار اوغلونون وداع و تورپاغا تاپشیرما مراسیملری گئنیش کوتله اشتراکیلا تبریز شهرینده کئچیریلمیشدیر. اوستاد شیمشک‌دن بیر چوخ آذربایجان دیلینده شعرلر و مقاله‌لر یاییلمیشدیر. او جومله‌دن: قانلی چیچکلر(۱۳۶۹)، آچیل چتریم آچیل(۱۳۷۴)، گل باهاریم گل(۱۳۷۸)، قوش یوواسی(۱۳۷۸)، جذاملی سارای(۱۳۸۰) و …

sayyad-golipoor-310x165

۷- صیاد گلی‌پور (آغجا اوغلان) – شاعر (۱۳۳۲ هشتری – ۵ آبان ۱۳۹۴ ارومیه)
«آغجا اوغلان» تخلصلو اورمیه‌لی شاعر “صیاد گلی‌پور” ۶۲ یاشیندا حیات‌لا وداعلاشمیشدیر. او ۱۳۳۲ینجی ایل هشتری (هشترود) ماحالیندا دونیایا گؤز آچمیش و عؤمرونون چوخ ایللرینی اورمیه شهرینده یاشامیشدیر. اونون ادبی فعالیتی۱۳۶۰ینجی ایلدن باشلانمیش و ایندییه قده‌ر بیر شعر مجموعه‌سی ایشیق اوزو گؤرموش و بیر چوخ اثرلری هله‌ده یاییلماییبدیر.

toofan-310x165

۸- محمدحسین ملحی (توفان) – شاعر (۱۳۰۹ تبریز – ۱۲ بهمن ۱۳۹۴تبریز)
تبریزین مهربان و زحمتکش اوغلو، اؤز دولغون صمیمیتی‌له تبریز ادبی- اجتماعی محیطی‌نین حؤرمتینی قازانان شاعر «محمدحسین ملحی (توفان)» بهمن آیی‌نین ۱۲ینجی گونو تبریز شهرینده ابدی‌لیک سوسموش و وادی‌رحمت مزارلیغی‌نین “هنرمندلر” حصه‌سینده تورپاغا تاپشیریلمیشدیر. اجتماعی مضمونلو شعرلر موللیفی کیمی تانینان «توفان» ۱۳۰۹ گونش ایلی تبریزین عمو‌زین‌الدین محله‌سینده دونیایا گؤز آچمیش و بوتون عؤمرونو بو شهرده یاشامیشدیر. شاعرین اثرلری‌نین بیر چوخو انقلابدان سونرا آذربایجان دیلینده یاییلان دؤرو مطبوعات چاپ ائدیلمیشدیر.

یک پاسخ

  1. سلام ایشیق سایتینین حورمتلی امکداشلارینا،
    اوولجه بایرام گونلرین و یئنی ایلی سیز عزیزلره اوره گ دن تبریک ائدیب،ایشلرینیزده،آرتیق باشاریلار دیله ییره م،انشالله بو ایل وطنیمیزه و ائل-اوبامیزا خیرلی-اوغورلو اولسون.
    صونرا ۱۳۹۴ اینجی ایل ادبیات و اینجه صنعت دونیامیزدان کوچ ائدیب، دونیاسینی ده گیشه ن عزیزلریمیزین یاد و خاطره سینی عزیز توتوب و بو تذکره نی تهیه ائتدیگینیز ایچون اؤز منتدارلیغیمی بیلدیریب و سیزلره سلامتلیگ و محکم جان ساغلیغی آرزو ائدیره م،آلله هین رحمتینه قووشان عزیزلریمیزین روحلاری شاد مزارلاری نورلا دولسون.

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *