مهندس«مجید حسینی»نین اؤلومو موناسیبتیله صابر ادبی انجومنی‌نین بیان‌نامه‌سی
ازلدن بئله‌دیر چونکی کائینات
جاهان دائمی‌دیر، عؤمور امانات
الدن اله کئچیر وفاسیز حیات
بیز گلدی- گئده‌ریک سن یاشا دونیا!
کئچن بیر ایلده ادبیات و مدنیت سمامیزدان پارلاق اولدوزلار ابدی‌لیک اولاراق سؤندولر. بو شرفلی اینسانلار میللی مدنیتیمیزین ترقیسی و چیچکلنمه‌سی اوغروندا صرف ائتدیگی عؤمورلری اعتباریله، خالقیمیزین طرفیندن سئویلن، آذربایجان ادبیات و اینجه‌صنعت وورغونلاری طرفیندن آلقیشلانان و خالقین یادداشیندان سیلینمه‌ین شخصیتلریمیزایدیلر.
کئچن بیر ایلده اوغورلاریمیزلا برابر، انجومنیمیزین آجی و کدرلی گونلرینه‌ده شاهید اولدوق. بو آجی‌لار انجومنیمیزین- صابر ادبی انجومنی‌نین- سیماسیندا سیلینمز اینجیدیجی جیزگیلره چئوریلدیلر.
سیرامیزی ترک ائتدیگی‌نین بیر ایلینی یئنیجه آرخادا قویدوغوموز یازیچی و ترجومه‌چیسی، هامیمیزین سئویملیمیز اولان انجومنیمیزین دیرلی آغ ساققال عضوو «اوستاد مجید امین مؤید»ی خرداد آییندا ایتیردیک. بو ایتگی‌ایله برابر او مهربان و معصوم باخیشلارین دالغاسی بیر داها دالغالانمادی و دوداغینداکی دائیما چیچکله‌نن نجیب تبسسوم عطرینه بیر یوللوق حسرت قالدیق.
هله اوستاد مجید امین مؤیدین اؤلوم آجیسی جانیمیزدان چیخمادان، آبان آییندا خالقیمیزین گنج اوره‌کلی موباریز شاعری و انجومنیمیزین قوجامان بایراقداری «اوستاد هاشیم ترلان»ی الدن وئردیک. قوجامان صنعتکاریمیزین یارادیجیلیق حیاتی‌نین بوتونو، دموکراتیک و ملی طلبات، خلق‌لر دوستلوغو، اجتماعی عدالت، آزادلیق، صلح، امن- آمانلیق و برابرلیک کیمی موضوعلاردان سوواریلیب، یوغرولوب و پوئتیک دیلده اؤز بدیعی عکسینی تاپمیشدیر. نه یازیق کی بیر داها انجومنیمیزده اوستاد ترلانین- هاشیم عمی‌نین- آتشین چیخیشلارینا شاهید اولمایاجاغیق. هله‌ده وار اوستادین صنعت پرئنسیب‌لری، بشری ایده‌آللاری، آرزو و ایستکلری انجومنیمیزین فضاسیندا دالغالانیر و دالغالاناجاق.
هاشیم عمی‌نین اونودلماز خاطیره‌لری‌ایله یاشادیغیمیز آنلاریمیزا، گؤزلنیلمه‌دن ابدیته قوووشان انجومنیمیزین صدری «اوستاد مظفر درفشی»نین ماتمی‌ده قاریشدی. بهمن آییندا انجومنیمیزین یورولماز و سئویلن رهبرینی ایتیردیک. اونون ایتگی‌سیله ادبیاتیمیزین بیر بوداغی‌دا قیریلدی. اوستاد مظفر درفشی‌نین کئچیرتدیگی عؤمور یوللاری، شرف و افتخار ایزلریله بزنمیشدیر. بو شرف ایزلرینده وطنین طالعینی، ملی منلیگیمیزین نه اولدوغونو، اجتماعی ایده‌آللاری و اینسانلیق اوغروندا موباریزه‌نی اؤیرندیک و اؤیره‌نه‌جه‌ییک.
سانکی آجیلاریمیز توکنمز‌ایدی. هئچ بیریمیز گؤزله‌مه‌دن لاپ بو یاخینلاردا آجی بیر خبرین چاتماسی‌یلا داهادا سارسیلدیق؛ آجیدیق؛ اوره‌کلریمیز بیر داها دوست ایتگیسینه، قلمداش یوخلوغونا اضطرابلی دؤیوندو. انجومنیمیزین ایلک گوندن یول یولداشی، قایغی‌کئشی، اداره هئیتیمیزین صمیمی و صداقتلی امکداشی، انجومنیمیزین اوغورلاریلا اؤیونن و اوغورسوزلوغو‌ایله کدرله‌نن سئویملی مهندس «مجید حسینی»نی واختسیز و آجیناجاقلی بیر شکیلده الدن وئردیک. اونونلا صابر انجومنی سارسیلماز دایاقلاریندان بیرینی ایتیردی. شبهه‌سیز مهندس حسینی‌نی سون گونلره‌دک اونون صمیمیتله باغلاندیغی صابر ادبی انجومنی‌نین طالعی دوشوندوروردی. نییه کی، مهندس حسینی صابر ادبی انجومنی‌نین طالعینده اؤز ناکام آرزولارینی و اینام طالعینی یاشاییردی و انجومنین فضاسیندا همیشه آرزوسوندا اولدوغو بیرلیک مارشینین دالغالانماسینی آختاریردی.
بو گون خاطیره‌سینی عزیزله‌دیگیمیز قلمداشیمیز مهندس حسینی‌له برابر کئچن بیر ایلده سیرالاریمیزی ترک ائدن اوستادلاریمیزین شرفلی خاطیره‌لرینی‌ده عزیزله‌ییریک. بیز اینانیریق کی صابر ادبی انجومنی‌نین هئچ بیر عضوی‌نین یادداشیندا بو سئویملی قلمداشلاریمیزین قویدوغو افتخار ایزلری پوزولمایاجاق و خالقیمیز همیشه بو صداقتلی اوغول‌لاریندان یاخشیلیق‌لا یاد ائده‌جکدیر. عشق اولسون شرفلی خاطیره‌لرینه.
صابر ادبی انجومنی
۶/۵/۱۳۹۴
یک پاسخ
çox sağ olun – gözəl bilgiləri yaydığınız içıin