اوخوماق زامانی: 2 دقیقه

اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email
چئویرن: ایشیق
ترجمه: ایشیق
ایشیق
00:00
00:00

بو یازی‌نین سس فایلی هله حاضیرلانماییبدیر. بو یازی‌نی اؤز سسینیزله اوخویوب بیزه گؤندره بیلرسینیز.

scan0006 (1)
بئشینجی عاشیقلار بایرامی زنجاندا قورولدو

هر ایل اردیبهشت آیی زنجان آشیقلاری بایرام مراسیمینی برپا ائدیرلر. بو ایل ده زنجان استانیندا یاشایان آشیقلار زنجانین امام خمینی فرهنگسراسیندا توپلانیب بیر – بیریله یاریشا قاریشدیلار. بو طنطنه‌لی مراسیم شنبه گونو خرداد آیی‌نین ۹جو گونونده ساعت ۵دن ۸ه قده‌ر اوزاندی. بو مراسیمده زنجان استانی‌نین ارشاد و فرهنگ اسلامی اداره‌سی و انجمن موسیقی زنجان طرفینده قورولوب و استانین عالی مقام منصب‌لری ده بو مراسیمده اشتراک ائتدیلر. بورادا ارشاد اداره‌سی‌نین مدیر کلی و شهرستانلاری‌نین رئیس‌لری ده اشتراک ائتدیلر. آنجاق بو تؤره‌نین اصیل صاحیبلری زنگان آشیقلاری اولاراق، باشدا بؤیوک اوستاد آشیق عمران حیدری‌نین گؤزل چیخیشی و دانیشیغی ایله آچیلدی. بو گؤرکملی آشیق ایللر بویو بیر چوخلو بین‌الخالق فستیواللاردا اشتراک ائده‌رک آذربایجان آشیق موسیقی‌سینی تمثیل ائتمیش و بو موسیقی‌نین گؤزللیکلرینی دونیا موسیقی سئورلرینه گؤسترمیشدیر. بو دَیرلی اوستاد سازیله یوخ، بلکه سؤزو ایله ده هامینی هیجانا گتیره بیلدی. بو مجلیسین قورولماغیندا ساز آشیقی و درین آراشدیریجی منوچهر نجفی فعالجاسینا چالیشمیش و بو تؤره‌نین یاخشی قورولماسیندا هئچ بیر چالیشمادان اسیرگه‌مه‌میشدیر.
آشیقلار مراسیمی زنجانلیلارین استقبالی و تشویقی ایله اوز – اوزه گلدی و ۳ ساعاتدان آرتیق بیر زماندا سالون باشا باش جمعیتله دولو قالدی و عاشیق گروپلارینی ایستی آلقیشلاریلا تشویق ائتدیلر. بو گؤزل مراسیمده اوستاد آشیقلاردان آشیق گلابعلی داودبیگی و آشیق مسلم عسگری ده ایلک صفده دایاندیلار.
بو ایل آشیقلار بایرامی داستان قونوسو ایله کئچیریلدی و آشیق گروپلاری اؤز داستانلارینی ایفا ائده‌رک بو یاریشا قاتیلدیلار و تاماشاچیلارین آلقیشلارینی قازاندیلار. بو مراسیمده ماهنشان، طارم، ایجرود، ابهر، خرمدره شهرستانلاری‌نین آشیق گروپلاری و زنگان شهرستانیندان آی‌تکین، قیزیل‌آذر و آیدین گروپلاری چیخیش ائتدیلر. بو آرادا چوخلو داستانلار سؤیلندی و گلن ایللر اوچون بوندان داها گوجلو بیر فستیوالین قورولماسینا سؤز وئریلدی.
بو تؤره‌نی مهارتلی سؤز اوستادی اولان خانیم دولوئی دولاندیردیلار و گروپلار حاضیرلانما اثناسیندا ان گؤزل شعرلرله چیخیش ائتدیلر. اونون گؤزل اجراسی، دوزگون شعر اوخوماسی و گؤزل سسی بوتون تاماشاچیلاری هیجانا گتیردی و نهایت بو مراسیم ان خوش لحظه‌لر یاراداراق، تاماشاچیلار بیر درین خاطره‌لی گئجه‌نی یاشادیلار.
ایضاح:
بو گزارشی سایتیمیزا حؤرمتلی یازیچیمیز جناب محمدرضا باغبان کریمی گؤندرمیشدیر. تشکر ائدیریک.

اشتراک گذاری در print
چاپ

3 پاسخ

  1. سلام
    برنامه نین قورولماسیندا هئچ موشکول یوخ. کاشکی بوتون استانلاردا بوتون اداره لر بو اشیقلار بایرامینی قورالار.

    اما تحریفلرین قاباغی آلینمالی دیر. ۱۰ جو اشیق لار بایرامینی قوران چالیشقانلار همان یولداشلاردی کی دئولت برنام سینی ده بیرینجی یول دئولتدن ایذین آلاراق قوردولار. اما ارشاد گؤردو برنامه قشنگ اولور الدی اؤز الینه دئدی بیز بونو رسمی برنامه کیمی قوراریر. ایکینجی ایل دئولت قوردو. اوچونجو ایل زنگاندا قورولماسین دئیه طاریما اپاردیلار سحر ساعات ۱۰ دا برنامه قوردولار. انتخابات ایی قورمادیلار. سونرا دئولت باخدی گؤردو میللت برنامه سی نی ایلده قورور دئولت ده مجبور اولدو قورا.

    دئولت ده قورولان ایلک برنامه نیین مجوزین اشیق موسلوم عسگری جنابلاری آلدیلار.

    اما دقت ائتمه لی ییک سالن دا دئولت برنامه سینده آشیقلار دئولت مداحی اولورلار. اشیق ادبیاتی و صنعتی اورجیناللیقدان چیخیر. بو دا آشیق صنعتینه تهلیکه لیدیر.

    میللت قوران اشیقلار بایرامی بیر بین المللی کریتئرلرله قورولان ائتکینلیکدیر. ایرانین بوتون آغ ساققال آشیقلاری قوناق گلیر.

    دوستوموز گزارش یازیب اما بیر طرفلی یازماسی او یاشینا یاراشماز.

    شرق روزنامه سی و ایسنا خبرگزاریسی برنامه نین نئجه اولماسین یازیبلار.

  2. آشیقلار بایرامی ایکی گروه طرفیندن هر ایل زنگاندا قورولور. بیری خالق طرفیندن و بیری ده رسمی ارشاد طرفیندن.
    بو ایل ده هر ایل کیمی هر ایکی مراسیم قورولدو. بو ایل اردیبهشتین عوضینه خرداد آییندا فرهنگسرای امام خمینی ده طنطنه لی اولاراق کئچیریلدی. گلن ایلدن بیر ملی فستوال کیمی قورولاجاق و الله قویسا سونرالار بیر بین الخالق آشیقلار بایرامی اولاجاقدیر.
    دوستوموز هر کیمسه دیرسه، نییه گرک بئله آجیقلانا؟ هر مراسیم چوخ اولاندا بیر عده نییه ناراحاند اولور؟ قوی ائلیمیز گوجلنسین. قوی بیر یئرینه اون مراسیم قورولسون. بو بیزیم ائلین باشی اوجالیغی دیر. آنجاق گؤسته ریلن پوستر هر زادی گؤسترمه ده دیر.
    ساغ اولسون ایشیق سایتیندا چالیشانلار!

  3. سلام

    آشیق لار بایرامی فروردین آیینین ۳۰ دا زنگاندا قورولار.

    بو ایل ده ۱۰ جو آشیق لار بایرامی زنگاندا چوخ محتشم و منتظم سویه ده قورولدو. ایرانین آغ ساققال آشیق لاری دا بو برنامه یه تشریف گتیردیلر.

    خبرینی یازدیغیز برنامه نین اصلی آدی«مراسم گرامیداشت موسیقی آشیغی» دیر.

    لوطفن برنامه لری بیر آد آلتیندا قاریشدیرمایین.

    پوشش خبری سینی ده ایسنا خبرگزاری سی و شرق روزنامه سی وئردیلر:

    ایسنا:
    http://zanjan.isna.ir/Default.aspx?NSID=5&SSLID=46&NID=53603

    شرق::
    http://www.sharghdaily.ir/News/62073/%D8%B3%DB%8C%D9%86%D9%87-%D8%A2%D8%B4%DB%8C%D9%82-%D8%AF%D8%B1%DB%8C%D8%A7%DB%8C-%D8%B9%D9%85%D8%A7%D9%86-%D8%A7%D8%B3%D8%AA

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *