اوخوماق زامانی: 3 دقیقه

اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email
چئویرن: ایشیق
ترجمه: ایشیق
ایشیق
00:00
00:00

بو یازی‌نین سس فایلی هله حاضیرلانماییبدیر. بو یازی‌نی اؤز سسینیزله اوخویوب بیزه گؤندره بیلرسینیز.

ashiq changiz mehdipoor (2)دونیا آنا دیلی گونونده “آیریلیق” کونسرتی اوچ مین نفری بیر یئره توپلادی

گؤرکملی آذریایجان صنعتکاری عاشیق چنگیز مهدی‌پورون “آیریلیق” عنوانلی کونسرتی دونیا آنا دیلی گونونده ۳۰۰۰ نفره یاخین آذربایجان موسیقیسی هوسکارلارینی تهرانین وزارت کشور سالونوندا بیر بیرلرینه قووشدوردو.
اسفند آیی‌نین ایکینجی گونو اوچ ساعات اوزون سورن “آیریلیق” کونسرتی بؤیوک طنطنه‌ایله کئچیریلدی و اشتراکچیلار طرفیندن صمیمیتله قارشیلاندی.
کونسرتده دالغا موسیقی گروهونون ایفاسیلا آذربایجان عاشیق موسیقی‌سیندن ۱۸ هاوا ایفا اولوندو. بوندان علاوه اوستاد عاشیق چنگیزین اؤزونون تکساز ایفاسی‌ دا بؤیوک رغبتله تاماشاچیلار طرفیندن قارشیلاندی.
اوستاد چنگیز مهدی‌پورون تنظیم ائتدیگی و “دالغا” گروهو واسیطه‌سیله ایفا اولونان ایکی بؤلومدن عبارت عاشیق هاوالاریندا آذربایجان شاعرلری: علی جوادپور، ذلیمخان یعقوب، ستار گولمحمدی، ائلدار موغانلی، حبیب فرشباف، عاشیق علعسگر، شهرک میرزه، حسن ایلدیریم، بهمن زمانی، رجب ابراهیمی(فرهاد) و اوستاد شهریارین شعرلریندن استفاده اولونموشدور.
کونسرتده آذربایجان ادبی- مدنی شخصیتلریندن علاوه بیر چوخ فارس دیللی هوسکارلار و ایرانین تانینمیش صنعتکارلاری و ادبی- مدنی شخصیتلری او جومله‌دن: بهزاد فراهانی، علی‌اشرف درویشیان، یدالله صمدی، مجید انتظامی، ناصر زرافشان، فرزانه کابلی، پرویز حبیب‌پور، مهدیه محمدخانی، پرویز بابایی، هادی مرزبان، شاهرخ تویسرکانی و بیر نئچه اؤلکه‌نین سفیرلری او جومله‌دن: آذربایجان، ایتالیا، اسپانیا، بوسنیا و ژاپن اؤلکه‌لرینین ایرانداکی سفیرلری ده اشتراک ائتمیشدیلر.
کونسرتین یاریسینداکی استراحت زامانی اوستاد عاشیق چنگیز اؤز هوسکارلاری و کونسرت اشتراکچیلارینا آنا دیلینده تشکرلرینی بیلدیره‌رک، بو دیلده نه قده‌ر راحات دانیشدیغینی و اؤز اوره‌ک سؤزلرینی صمیمیتله دئیه بیله‌جه‌یینی وورغولادی. اوستاد چنگیزین بو دانیشیغی تاماشاچیلار طرفیندن اوزون آلقیشلارلا قارشیلاندی.
سونرا تانینمیش آذربایجانلی صنعتکار اردشیر رستمی دونیا شؤهرتلی تورک شاعری ناظیم حکمت‌دن و آذربایجان شاعری رامیز روشن‌دن مجلیس اشتراکچیلارینا شعرلر اوخودو.
بؤیوک طنطنه‌ایله کئچیریلن “آیریلیق” کونسرتی‌نین سون حیصه‌سینده “دالغا” موسیقی گروهو آذربایجان فولکلور عاشیق هاواسیندان “طبل جنگی کوراوغلو” هاواسینی ایفا ائتدی. بو ایفانین حؤرمتینه مجلیس اشتراکچیلارینین بیر چوخو آیاق اوسته قالخیب و اوزون- اوزون آلقیشلارلا اوستاد عاشیق چنگیز مهدی‌پورا و اونون صنعتکار امکداشلارینا اؤز تشکرلرینی بیلدیردیلر.
“دالغا” موسیقی گروهونون بو کونسرتینده عاشیق جواد محرمی، علی نوروزی و بهنام ملکی(خواننده‌لر)، جلیل حمیدی(بالابان و سورنا)، آرش سرانی‌آذر(باس بالابان)، بهرنگ پادیر(دف)، آیدین مهدی‌پور(قوپوز)، مجید رحیم‌پور(قاوال)، یاشار ایمانپور(قوپوز تاوار)، عارف مهدی‌پور(قوشا ناغارا)، عطا عیوض‌پور(ویلون‌سل)، اوکتای زمانی(قوپوز) و امیر آل‌نبی(پرکاشین) امکداشلیق ائتمیشدیلر.
اوستاد صنعتکارین موسیقیمیزه ائتدیگی خیدمتلرینی ده‌یرلندیرمک مقصدیله کونسرتی تشکیل ائده‌ن “موسسه پژواک” طرفیندن عاشیق چنگیزه تقدیر لوحه‌سی وئریلدی. عینی حالدا بو شعر آخشامینین تشکیلینده اؤز دوستلاریلا برابر زحمتلره قاتلاشان جناب مهدی پناهی‌ده تریبون آرخاسیندان بوتون مجلیس اشتراکچیلارینا اؤزونون و دوستلارینین تشکرلرینی بیلدیره‌رک “نه یاخشی کی سیز وارسیز!” سؤزو ایله مجلیسی سونا چاتدیردی.

ashiq changiz mehdipoor (1) ashiq changiz mehdipoor (2) ashiq changiz mehdipoor (3) ashiq changiz mehdipoor (4) ashiq changiz mehdipoor image-d6caf1a1a0be3802d0d4319a3af7d1ff6e0136261bc5304cada4bd006bda0021-V image-fe3218576b0e39a1c5e64fe1da7ad90aa1c3706a687abb12eef059d4b49e3823-V

اشتراک گذاری در print
چاپ

یک پاسخ

  1. سلام. یوخاری سویه و ان اعلا کیفیت له اجرا اولونان بو کنسرت، ائلیمیزین بؤیوک صنعتکاری عاشیق چنگیز و اونون قدرتلی گروهونون نهایت درجه لی اینجه صنعته مالک اولدوقلارینی گؤستردی.عشق اولسون بو صنعتکارلاریمیزا. هم ده بو کنسرتی قدرت و مدیریت له ایره لی آپاران دوستلارین هامیسیندان تشکر ائدیرم. بو کنسرت گؤستردی کی بیز میللتیمیز اونون وارلیغینا احترام قویانلارلا ، احتراملا یاناشیر. آیریلیق کنسرتی، دالغالاری ایله ، تورک آذربایجانلیلارین باشقا ایرانلی ائللرله قارداشلیغینی گؤستردی. یاشاسین آذربایجانلی لار.

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *