بو نئجه اؤلمک‌دیر
حسن ایلدیریم
قارا بیرتابوتدا
اوزانیب اؤلموشدوم یوخودا؛
گؤزلریم اوزاق- اوزاق اولدوزلارا تیکیلی
آرزولاریم یاریمچیق
آغزیم سون هارای توتوملو آچیق
اوزومده ابدی آیریلیغین ساری توزو
ساغ الیم سول دؤشومده
سول الیمده قلبیم
دونموشدوم اؤلومون سویوق قوجاغیندا؛
نه انسان سسی ائشیدیردیم
نه حیاتین سئوینجینی، کدرینی دویوردوم؛
داریخیردیم یالقیزلیغیمدا.
منی
قارا اللری ایله
قارانلیق بوشلوغا ساری
سورویوردو اؤلوم.
گئدیردیم…
آرخامجا نیسگیللی- نیسگیللی باخیردی
گؤزلرینده حسرتلری گؤینه‌ین،
یوخولاریندا آغلاییب
رؤیالاریندا گولن بیر گنج.
گئدیردیم…
عؤمور یول‌لاری‌نین آیریجیندا
دونوب قالمیشدی
بئینی، اوره‌یی قابار
اللری، آیاقلاری قابار
بوز یئل‌لرله
ساچلاری گوموشله‌نن بیر گنج.
گئدیردیم…
اووجومدا چیرپینیردی اوره‌ک؛
قالمیشدیم
آخی بو نئجه اؤلمک‌دیر؟!
اوره‌ییمی اؤلدوره بیلمه‌میشدی اؤلوم،
قارا قبیرده قیزیل اوره‌ک نه‌ییمه گره‌ک؟!
چاغیردیم: هئی عؤمورداش!
گل آپار
گل آپار امانتینی
دریسینی تارا چکدیر
ایستیسینی پایلا اوره‌یی اوشوموشلره
اومیدلرینی یول‌لارا تؤک
محبتینی سؤزلره بوک
قانی‌لا
لاله‌لری، قیزیل گول‌لری سووار،
ایسته‌سن
سون شعری‌نین سون مصراعسینا
اونو نوقطه کیمی قویوب قورتار!
سونرا
بلکه سن
ایل‌لرین یورغون توزونو اوزوندن سیلیب
بو ابدی یاتاقدا گؤزون دولوسو دینجه‌لسن…!
اویان! اویان!
پنجره‌می دؤیور گونش؛
تلس! تلس!
یولونو گؤزله‌ییر چووغونلو اوچوروملار،
بورانلی آشیریملار!
یولونو گؤزله‌ییر-
اینسانلار، آرزولار
یولونو گؤزله‌ییر-
میصراع‌لار!
۱۳۶۹
یک پاسخ
چوخ گؤزل
اوره ییزه ساغلیق