سنسیزلیک‌لر(۴)
مجتبی نهانی
(۱)
یاغیش هر دیلده یاغیش دیر
اوزون کیرپیکلرینی-
باشیما چَک.
(۲)
من بو قادینی سئویرم
یالنیزلیق کیمی
هئچ یانیمدا اولمادیغی کیمی
من بو قادینی سئویرم
ایچیمده بورخولان سسسیزلیک کیمی
من بو قادینی سئویرم.
(۳)
یالقیزلیغین،
قادینی
کیشی‌سی
یوخدور
یا وارسان
یا یوخسان.
(۴)
ایتیرم،
اوره‌ییندن چیخارتیب-
تاپاسان منی
ائله باخاسان،
هئچ باخمادیغین کیمی.
(۵)
سس‌سیز باخیشدیق
سس‌سیز گولوشدوک
سس‌سیز گئدیریک
اما
هارای قوپاجاق یوخلوغوموزدا.
(۶)
سس‌سیز سویوندو یالنیزلیق
یئره تؤکولن پالتارلاردا-
گؤرولمه‌ین قوجاقلار وار
بیته‌جک بیر گون قیسا-اوزون حسرتلر.
(۷)
چوخ ایسته‌دیم قورشون اولام-
وورولام بو بختسیز اوره‌ییمه
بیلیرم گؤزوندن دوشموشم،
اؤلسم ده گؤتوره‌نیم اولمایاجاق.
