ایشیق 1
آذربایجان معلم‌لری و تحصیل مساله‌سی
ایشیق 2

آذربایجان قفه‌خانالاری

ایشیق 3

آذربایجان و مهاجرت مساله‌سی

ایشیق 4
آذربایجان توی‌لاری

eldar muganli
“حیات یوللاریندا”[1] کیتابیندان ایکی شعر
ائلدار موغانلی

(1): کؤرپه‌لر
اینسانلارین حیاتی‌نین ثمری
یاشاییشین چیچگی‌دیر کؤرپه‌لر.
گئجه- گوندوز دؤیونمه‌یه فرحله-
اوره‌کلرین کؤمه‌یی‌دیر کؤرپه‌لر.

غم ایچینده یاشایاقدا اگر بیز
مؤحنتلره توش اولسادا قلبیمیز
گؤنلریمیز سووشورسا فرحسیز
قلبیمیزین دیره‌یی‌دیر کؤرپه‌لر.

محوائتمه‌سه یئر کوره‌سین بومبالار
عؤمور سورر اوشاقلار دا بختیار
صولح ایسته‌ییر هر اؤلکه‌ده آنالار
آنالارین امه‌یی‌دیر کؤرپه‌لر.

قوی محو اولسون موحاریبه فیتنه‌سی
قانادلانسین باریشیغین نغمه‌سی
عرشه قالخسین اوشاقلارین شن سسی
بو دونیانین گره‌یی‌دیر کؤرپه‌لر
یئر اوزونون بزه‌یی‌دیر کؤرپه‌لر.

(2): قانلی شفق
توتغوندو سما سانکی آغیر درده دولوبدور
گؤیدن یئره لاپ آزجا قالیر قاره چیلنسین
قان-قان چاغیریر قانلی شفق “گؤی” سینه‌سینده
قان پنجه‌سی‌ایله چالیشیر گون خفه‌لنسین
توتموش گؤیو آل قان قیزاریر اودلو دمیر تک
سانکی گؤی اوزوندن یئره ایستیر قان النسین
ای قانلی شفق پور ایزینی گون اوزه‌ریندن
نور ائلچیلری بیلمه روا قانه بلنسین
قان لکه‌لرین سیل او سمانین گول اوزوندن
قوی نور بوروسون عالمی عشقیم تزه‌لنسین
سن قان ایله پارلاق گونشه چرچیوه تیکدین
سیندیر قفسی قان چاناغی آز لپه‌لنسین
بو یئر کوره‌سی راضی دئییل ماوی سمادا-
بیر داملادا گون چؤهره‌سینه قان سپه‌لنسین.

[1] حیات یوللاریندا(شعر مجموعه‌سی) – ائلدار موغانلی- نشر مینا- 1369

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *