اوخوماق زامانی: 2 دقیقه

اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email
چئویرن: ایشیق
ترجمه: ایشیق
ایشیق
00:00
00:00

بو یازی‌نین سس فایلی هله حاضیرلانماییبدیر. بو یازی‌نی اؤز سسینیزله اوخویوب بیزه گؤندره بیلرسینیز.

دونیا قادین‌لار گونو موبارک اولسون
susan navade
آغلادیم… گینه آغلادیم…
سوسن نواده رضی

آغلادیم…
یالادیم…
گیله-گیله گیله‌لندین
سالخیم- سالخیم الندین
یالادیم
یالادیم
گینه آغلادیم…
*
دئمک سن ده غریبسن!
دئمک سن ده گؤزدن دوشموسن
بو هرجایی دونیانین قوجاغینا.
دئمک سن ده اؤز اؤزونو
اؤزونون دیب بوجاغیندا گیزله‌دیب
نشئه‌لی گؤرونتولر آرخاسیندا
درد داشیییرمیشسان
و یالانچیق گولومسمه‌لره بورگله‌ییبمیشسن
ایچیندن آخان قان یاشلارینی…….!

آغلادیم سنی
یالادیم…………..
گینه آغلادیم……

بس سن ده یامسیلاییرمیشسان
وار اولماغی
یاشاماغی
خوشبختچی‌لییی…
سن ده
هر شئی
یئرلی یئرینده‌یمیش کیمی
نورمالمیش کیمی ترپه‌شیرمیشسن
ائل اوزونه یعنی….
بیر تهر قاندیرماجا
آلداتماجا
ساختاکارلیق یعنی…

سنین ده می
سوره‌کلی آختاریب تاپا بیلمه‌دیین بیر شئیلر وار
ایچینی اویوم- اویوم اویوب بوشالدان؟
سنده می یورغونسان
سنده می بیتکین؟
سنین‌ده‌می پوکالیب ایچین؟

***
بلکه ایلک راستلانیشین‌دیر
درین/ دایاز
دولانباج/ ساده
دورو/ دومانلی
اؤرتولو/ چیپلاق
بیرینه
یعنی منه
یا منده اولان سنه
یا سنده اولان نم کیمه
یا……………. هر کیمه
بلکه ده
بو سون گؤردویون اولاجاق بو جینسدن بیرینی
یعنی اندر یارادیلیر بئله‌لری
و نیه یارادیلیر…………………بیلمیرم
گؤرن هانکی گوناهین جزاسی‌دیر چکیلیر
یا هانکی ثوابین موکافاتی‌ دیر وئریلیر؟
بو هنگامه‌ده
کیم کیمه دیر
هئچ‌کیم‌ هئچ کیمه…
آنجاق من
هئچ کیمی دئییل،
سنی
آغلیرام!

***
تقدیره اینانیرسانمی؟
من اینانیرام
و تسلیم اولماغا دا
هم ده محض تسلیم
حتی تسلیمدن یارانمیش اولدوغوما دا اینانیرام
و بویون ایمه‌م گرکدیینی ده بیلیرم
سئوگی‌یه
تکجه سئوگی‌یه
و لا‌غیر!

سن آغلاما
کؤوره‌لتمه کؤورکدن کؤورک قلبیمی
اینجه‌لتمه اینجه‌دن اینجه کؤنلومو
گؤزلمک چووووخ چتین دیر
بیلیرم
بیلیرسن
اؤزلمک ده ائله…
گله بیلمم کی
سیله بیلمم کی
او شفاف پاکلیغی
او دورو تمیزلییی
او شورا چالان جان شربتینی
آغلاما لوطفن
ارککلر آغلامااااااااا…………ز
دئیرلر
نئجه ده یالان دئیرلر!
یکشنبه 20 فروردین 1391

اشتراک گذاری در print
چاپ

یک پاسخ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *