یارالی شعرلر
حسین آرزو
(۱)
سالیرام آیاقلاریمی کوچه‌لرین سینه‌لرینه
آچیر آغیزین
دیشلریندن چیخیرام داغلارا
باخا- باخا.
دؤنن کوچه‌لردن دؤنورم
کوسورم
آنامین قوجاغیندا
چیگنیندن باخا- باخا.
دؤنورم
کوچه‌لرین آخشاملارینا
قار یاغا- یاغا
آیاقلاریم یومشانیر
سؤزلریمین ایچینده-
سن بیزیم کوچه‌نین
آخشاملارینا باخاندا.
(۲)
من سنی
بیر شیرین یوخونون ایچینده قارپیز یئینده
آلمیشدیم “گجیل قاپیسی”ندان
“چیلله گئجه‌سی” دئییلدی
یایین تر کؤینه‌یی یاغیش آلتیندا
دورموشدو “خط واحد” صفینده
آجی اوتانماغین الین توتموشدو
باخیردی شیرین یوخو
اللرینده “چیلله قارپیزی”.
(۳)
اوزاق‌لار او زامان
بو قده‌ر اوزاقلاشمامیشدی
بیر قیرانا هر شئی آلیردین
ایکی قیرانا
اوره‌یین هر نه ایسته‌سه
من او زامان اوزاقلاردا
بیر قیران- ایکی قیران.
(۴)
من دیل آچدیغیم گون
گون بولودلارین آلتیندایدی
اوشومه‌یی دئمیشدیم
اوشوموشدوم
آنام باغرینا باسمیشدی
آنامین بوینونا سوخولموشدوم
گولموشدوم.
(۵)
گل منی آپار
هارا ایسته‌سن
ایسته منی
من بو یوللاری یولدان سالمیشام
دورموشام اوتوردوغوم یئرده
قالمیشام
قالیب گؤزلریم
باغلارین خاناباغیندا
آپار منی گل
تاپشیر یوللارا
باخا – باخا.
یک پاسخ
عزیزیم سن بو شعرینین بیرین ایکیسین نثر صورتینده یاز گوروم نه دئمک ایسته ییرمیش سن