ایشیق 1
آذربایجان معلم‌لری و تحصیل مساله‌سی
ایشیق 2

آذربایجان قفه‌خانالاری

ایشیق 3

آذربایجان و مهاجرت مساله‌سی

ایشیق 4
آذربایجان توی‌لاری

kiyaan
تييه اوستونده
کیان خیاو

يوللاري تييه اوستونده دؤيوروک،دوست!

داغلاري،چايلاري،شه هه رلري بئله.

سن اؤزونده منه دوغرو

من اؤزومده سنه دوغرو

بيز بيرليکده هارا دوغرو؟

يوللاري تييه اوستونده دؤيوروک.

تورپاق تارلايا دؤنونجه

تارلا سونبوله دولونجا

و سونبوللرين ايچينده بير قوش يووالانينجا،

دؤنمه يه جه یيک دئييريک بو يوللاردان

دؤنمه يه جه یيک دئييريک.

نه لرسه آختارديغيميز بير شئيلر وار

هارداسا بير دنيزلر

هارداسا بير آدالار

هارداسا بير چيچکلر،قوشلار،آداملار.

و هانکي سا بير يوخولار

ايچينده بير شئيلر گؤرمک ايسته ديیيميز يوخولار

بير شئيلر ده گؤرمک ايسته مه ديیيميز.

قلبيميزدن بير چوخ شئيلر کئچه جک،دوست!

بير چوخ پارا

بير چوخ پالتار

بير چوخ پلان.

و پلانلاري دوشلرکن خوشلاناريق

و پلانلار بئينيميزدن اوغورلانار

و پلانلار بئينيميزدن اوغورلانار آمما.

قازانمايان بير طرفين يئنيلمه سي یيک،دوست!

نه تورپاق قالميش،نه تارلا

نه سونبول،نه قوش يوواسي.

ايتگين دوشموش آختارديغيميز سئودالار

بيتگين دوشموش خيال-خوليالاريميز

سورگون دوشموش يوخولار و خاطيره لر.

دونياني تييه اوستونده سئير ائديريک،دوست!

دؤنوک آخير بير-بيرلرينه دنيزلر

دؤنوک دورور آدالار

دؤنوک چيچکلر،قوشلار،و آداملار.

دؤنوک

دؤنوک

دؤنوک

دؤنوشو اولمايان يوللار دا بئله،

بير-بيرلريندن دؤنوک.

بيزسه دؤنمه يه جه یيک دئييريک هله

دؤنمه يه جه یيک دئييريک،آمما

يوللاري تييه اوستونده دؤيوروک،دوست!

يوللاري تييه اوستونده دؤيوروک.

آبان آيي 1386(2007)

یک پاسخ

  1. چوخ ساغ اولون لذت اپاردیم بو گوزل شعیرینیز اوچون عزیز شاعیر و یازار کیان خیاو

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *