شعرلر
عمران صلاحی
آينا کيمي
پارچالانديق، سينماديق،
داش آتانلار بيلمه‌ديلر، پارچالانميش آينادا-
بير آيدان مين آي چيخار،
بير گونش‌د‌ن مين گونش،
بير اولدوزدان مين اولدوز؛
پارچالانديق آينا کيمي؛
چوخاليريق
چوخالديريق ايشيغي.
يئري بوش
قهوه‌خانادا اوتوردوق
قليانلاشديق، چايلاشديق!
محبتي قويدوق ميزين اورتاسينا، پايلاشديق !
باياتي‌لار
آيران کيمي داماغيمدا داد وئردي
دووارلاردا مئشه‌لرين ناخيشي
مئشه‌لرده، يارپاق- يارپاق جئيران‌لارين باخيشي
قليان‌لارين توستوسو
مئشه‌لرين دوماني؛
ايستيکان‌لار قولاق آسير
سماوار ناغيل دئيير،
قفس‌لردن
ساري سس‌لر ساللانيب؛
“چاي اوغلو”يا دئييره‌م
بولبول‌لرين سسي خوش،
بوردا هر شئي وار، آمما
عاشيق‌لارين يئري بوش!
ايکي دامجي
دئديم پارپاق‌لارا باخ !
باخدي ، آمما دانيشمادي؛
دئديم : بولوت‌لارا باخ !
باخدي ، آمما دانيشمادي؛
خياوان‌لاري دولانديق،
کوچه‌لري دولانديق
دانيشمادي؛
بير ساعات‌دان سونرا دئديم :
– ايکي کلمه دانيش من‌له
باخدي منه ، ايکي دامجي دانيشدي !
بير دسته گول
چيراق يانير اوزاقلاردا
اولدوز يانير چيراقلاردا
هر اولدوزدا بير سئوگي وار
هر سئوگي‌ده بير دسته گول
هر گولده بير عطير
هر عطيرده بير کپه‌نک
هر کپه‌نکده بير شاعر.
یک پاسخ
پارچالاندیق، سینمادیق،……………………… عشق اولسون خاطیرالاردا کندیسینه اؤزه ل یئر توتان عمران اوستادیمیزا