چئویرن: ایشیق
ترجمه: ایشیق
ایشیق

ALIRZA
غربت نغمه‌لریندن
میانالی علیرضا

او باهار نفسلی گنجلیک ایللریم
قالدی گؤر نه قده‌ر مندن اوزاقـــدا.
غربتده یایدا دا اوشویور الیــــم
اوشومک بیلمزدی قاردا، سازآقدا.
***
ایندی او گونلردن نه قده‌ر اؤتوب
ده‌ییشیب چوخ شئیین دادی، لذتی.
غربتده دوشورسن دیلدن، داماقدان
بعضا سئچنمیرسن بالیقدان اتی.
***
بعضا ائله اولور، ائله اولورکی،
هئچ نه یه، هئچ یئره هوسین اولمور.
بعضا ائله اولور، ائله اولور کی،
گره‌کلی ایشـه‌ده نفسین اولمور.
***
بوردا عادی سؤزله دوشمن اولور دوست
سانکی بو دوستلوقلار بیر توک اوسته‌دی.
کئچمیشی اولمایان هر شئی بئله‌دی
اوردا هر نه وارسا، وار کؤک اوسته‌دی.
***
ائله اونا گؤره لاپ قیرام- قیرام
اؤزونه سن حؤرمت، شان قازانیرسان.
ائله اونا گؤره هر بیر کلمه‌نه
بؤیوکدن- کیچیکدن جان قازانیرسان.
***
اودور ساختا ایشه جرعتین اولمور
شه‌هر ده- کوچه ده تانی‌ییر سنی.
آزینی، چوخونو تئز گؤرور هامی
ان عادی سهو اوسته قیناییر سنی.
***
بورا باشقا یئردی، اورا باشقا یئر
بو فرقی دویاجاق هر دؤین اوره‌ک.
گزیب آختاردیغین یولو، ارکانی
آراییب تاپماغا جیغیر، ایز گره‌ک.
***
بوردا نه جیغیر وار، نه ده کی ایز وار
سنی ایره‌لییه گؤتوره بیلسین.
آخی کؤنول آچان نه ده بیر سؤز وار
سنی آیدینلیغا یئتیره بیلسین.
***
باهار یاغیشیندان سونرا گؤیه‌رن
گؤبه‌لک کیمی‌دیر بوردا اوجالماق.
اودا کی، شبهه‌سیز نئیله‌سن اولماز
بئش گونلوک عؤمورله یئتگین قوجالماق.
***
اوردا جیغیر تانیش، ایز ده تانیشدی
ائله بیل او یولو اؤزون چکیبسن.
ائله اولماسادا، ائله گلیرکی،
ایلک دفعه سن اؤزون اوردان کئچیبسن.
***
بوردا هامار یول‌دا باتلاق کیمی‌دیر
بئش آددیم ایره‌لی گئدن تاپیلماز.
آخی هامی بیر یوخ تک- تک دی بوردا
اوداکی، تک الدن هئچ بیر سس اولماز.
***
ان عادی داش سنه اوردا یولداشدی
بیلیرسن او هانسی قایادان قوپوب.
ائله بیل او داغلار سنه قارداشدی
هاواسی جانینا، قانینا هوپوب.
***
دنیز کناری‌نین آغاجلاری تک
کؤکو اوزده اولور بوردا هرنه یین.
بلکه ده بو خیصلت تورپاقدان گلیر
کؤکو درین اولور اوردا هر نه‌یین!

چاپ

2 پاسخ

  1. ساغ اول آی علیرضا بو آخشام سنه بیر قوشما یازدیم سونرا چاتدیرارام .ایشیق دان خواهیش ائدیرم کی، تازا شعرلریمدن اولان « اورمو گؤلو» شعریمی سنه چاتدیرسین .ایمیلنیز یوخومدور-۱۲-۶-۹۲- تهران- ائل اوغلو

    ائل اوغلو

    (اونودولماز دوستوم” حسین عاریف” ی خاطیرلایاراق)

    اورمو گؤلو

    بیر گؤزه قورویاندا،
    دردی ائله چاخناشدی،
    شاعیر بولودا دؤندو!
    آغلادی بولاق کیمی
    بوتون عالم یویوندو.

    بیر بولاق قورویاندا،
    یاندی بوتون وارلیغی.
    شاعیرده اودا دؤندو،
    یاغدی آغ یاغیش کیمی،
    ایچین – ایچین دؤیوندو.

    بیرچایلاخ قورویاندا،
    سوسوز آرخ کاناریندا
    دلی سؤیوده دؤندو.
    یولدو ساچینی شاعیر،
    ائله هارای قوپاردی
    بوتون عالم دییندی …..

    قورویور اورمو گؤلو
    چایلار بولاقلار هانی
    قوشاچایدان سوگلمیر
    نازلی چای ایلان کیمی
    سوسوزوندان مه له ییر.
    جیغاتی یولور یئنه
    یاسا باتمیش تئلینی
    وای دوشور، شیون قوپور
    ینه بیر میللت اؤلور.
    هانی اوغول ،هانی قیز،
    قورویور اورمو گؤلو
    تبریزی توز بورویور
    بیر میللتین وارلیغی
    دوز ایچینده چورویور
    طالعه باخ،باختا باخ!
    ، بونا دؤزوله جکمی؟
    ساوالانین، سهندین،
    یاشیل یایلاقلاریندان
    ائللر اوزوله جکمی؟
    داها عاشیق آلماسی
    گؤزله مه سینمی قیزلار
    باغمئشه دن، واسمیشدان
    شانسینین شورلوغوندان
    داها داش دوزا دؤنور
    ناغیلللاشیر وارلیغی
    تبریزین باختی سؤنور
    مارال باخیشلی قیزلار
    تبریزدن گئدجکمی؟
    شئر بیلکلی اوغوللار
    گؤزلردن ایتجکمی؟
    بیرده اوخویاجاقمی
    او تبریزلی سئوگیلی:
    « تبریزین کوچه لری دولانبا دولان
    قاراگیله دولان بادولان
    اگرمنی سئومیرسن گئت آیری دولان
    قاراگیله گئت آیری دولان
    نه منه قیزقحط دیر، نه سنه اوغلان،
    قارا گیله، نه سنه اوغلان
    قارا گیله گئت آیری دولان »
    بیر ده اوخویاجاقمی تبریز حسرتی چکن
    کرکوکلو بیر تورکمن:
    « گؤزه دیر،
    گوموش میل گؤزه دیر
    زولفون عجم ایپیی
    تئلین تبریزه دیر»
    اورموگؤلو قورویور
    ائله بیل کی جان وئریر ،
    او هایلی کویلو تبریز
    گؤرنئجه ساکیتیک بیز.
    ایچیمیزده سسیمیز،
    ارییر سس سیز- سس سیز
    دوداغی کؤپوکله نیب،
    اورمو گؤلو جان وئریر.
    گلین قان وئرک دوسلار
    بیزده جان وئرک دوسلار

    * دیرلی ایشیق بو شعری سایتا قویا بیلر.- ائل اوغلو

  2. ان عادی داش سنه اوردا یولداشدی
    بیلیرسن او هانسی قایادان قوپوب.
    ائله بیل او داغلار سنه قارداشدی
    هاواسی جانینا، قانینا هوپوب.

    —–

    بو شعری آخشام اوستو تبریزده ده اوخویاندا آدام داریخیر بیلیمرم نییه

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

غربت نغمه‌لریندن/ میانالی علیرضا

ایشیق
www.ishiq.net

آذربایجان ادبیات و اینجه‌صنعت سایتی

غربت نغمه‌لریندن/ میانالی علیرضا

ایشیق
www.ishiq.net

آذربایجان ادبیات و اینجه‌صنعت سایتی

غربت نغمه‌لریندن/ میانالی علیرضا

ایشیق
www.ishiq.net

آذربایجان ادبیات و اینجه‌صنعت سایتی